Kasin asalim la ya nen walay inatey ed pamilya na kaarom et agmo amtay ibagam o gawaen mo? No maminsan et nagagawa itan, kanian anggapo la laingen so ibaga odino gawaen tayo. Balet wala ray nayarin nitulong tayo.

Mabetbet ya say kaukolan labat et wadman ka tan ibagan, “Maermen kamid agawa.” Diad dakel ya kultura, anggan say ilakap labat odino pamemben ed lima na inateyan et duga la pian nipanengneng moy pililikna. No labay na inateyan so mitongtong, dengelen tan talosan mo. Balet say sankaabigan ya gawaen et tulongan so pamilyan inateyan, nayarin diad saray kimey ed abung ya agda la nagawaan, singa say panluto, pangasikaso ed saray ugugaw, odino diad saray uksoyan na pangiponpon no kaukolan da. Mas makatulong iratan nen say antokaman ya balibalin ibagam.

Nasabi lanlamang ya naistoryam iray maong ya ugali na inatey odino saray maliket ya impanulop yo. Ompan napaimis mo ni ingen ed satan imay maneermen. Singa bilang, oniay inkuan nen Pam ya anem taon lan inatey so asawa to: “No maminsan et ibabagad siak na totoo iray maong ya  agawaan nen Ian ya agko amta, tan makapaliket iman.”

Ibabaga na saray manag-obserba ya diad gapo et dakel so kakaaron ontutulong ed inateyan, balet no busy lamet ira ed bilay da, nalilingwanan da la imay inateyan. Kanian manggaway paraan pian tuloytuloy ya kumustaen so kaaron inateyan. * Naapresyan maong iya na saray inateyan ta nainawaan irad abayag lan paneermen da.

Ontan so naeksperiensya nen Kaori, biin taga Japan ya nanermen ya maong ed impatey na nanay to insan 15 bulan ni labat et sinmublay so atsi to. Maong labat ta tuloytuloy ya tinulongan na saray tuan kakaaro to. Sakey ed sikara si Ritsuko a mas matatken a maong nen si Kaori tan labay toy mikaaro ed sikato. “Diad tua, agko labay,” kuan nen Kaori, “ta parad siak et anggapo lay makapipara ed si nanay ko. Balet lapud maomaong ed siak si Mama Ritsuko, apaapit ak ed sikato. Kada simba, saniba kamin manpupulong tan bansag kamin oonlad Kingdom Hall. Iimbitaan to ak ya oninum na tsa, iyaawitan to ak na naakan, tan lanang to ak ya papawitan na sulat tan kard. Maong so epektod siak na balibalin ugali nen Mama Ritsuko.”

Labinduan taon lay linmabas manlapu nen inatey so nanay nen Kaori. Natan, sikara nen asawa to et full-time ed panagpulong. “Lanang ak ya kukumustaen nen Mama Ritsuko,” kuan nen Kaori. “No onsesempet ak, bibisitaen ko tan napapabiskeg ak ed sikato.”

Say sakey nin tuloytuloy ya tinulongan na kakaaro to et si Poli, sakey ya Tasi nen Jehova diad Cyprus. Si Sozos ya asawa to et mabai-bait tan maong ya alimbawa bilang Kristianon pastol, lanang ton iimbitaan ed abung da iray ulila tan abalo pian mangan tan manpapabiskegan. (Santiago 1:27) Makapaermen ta inatey si Sozos lapud tumor ed utek tan 53 años to ni labat. “Naandi so maar-aron asawak ya 33 taon kon akaiba ed bilay,” kuan nen Poli.

Kayari ponpon to, si Poli tan say 15 taon ya anak ton bolirek a si Daniel et nanayam ed Canada. Diman et intuloy day miulop ed kongregasyon na saray Tasi nen Jehova. Oniay nanonotan nen Poli: “Ag-amta na saray agagi ed balon kongregasyon mi so agawad sikami tan saray mair-irap ya dinalan mi. Balet aasinggeran da kami, maar-aro so pitotongtong da, tan tutulongan da kami. Balbaleg ya tulong iman, lalo la ta kakkaukolan ed saman na ana’ko so ama to! Saray responsablin agagi ed kongregasyon et makaaro ed si Daniel. Aglilingwanan na sakey ed sikara ya ipila si Daniel no walay gathering o no manggalaw ira.” Natan et malikeliket iran sanina.

Dakel so paraan ya nagawaan tayo pian natulongan tan naligliwa iramay maneermen. Ipapaseguro met ed sikatayo na Biblia ya walay makapalikliket ya nagawa ed arapen.