Mwapibva kale ninga wakucimwana kubalangaza mukhatsukwala munthu adaluza wakufunika wace? Midzidzi inango tisapenula kuti tinalonganji​—natenepa, tisaona kuti pyadidi ndi kumatama pyathu. Mbwenye, pana pinthu pyakuphedza pyakuti tinakwanisa kupicita.

Kazinji kene, cinafunika ndi kukhala cifupi na nyakuferwa mbamulonga mafala ninga “ndisatsukwala na pidacitika.” M’misambo mizinji, kukhumbatira munthu peno kum’phata manja ndi njira yakupangiza kuti musantsalakana. Khala nyakuferwa akulonga, mbvesereni mwakukoma ntima. Kupiringana pyonsene, citani cinthu kuna banja yakuferwa, panango kucita basa yakuti nyakuferwa acimwana kuicita, ninga kuphika, kukwata anang’ono peno kuphedza masasanyiro a kuikha nyakufa, khala mphyakufunika. Macitiro anewa anakwanisa kulonga pizinji kupiringana mafala adidi.

Pa ndzidzi wakuthema, cedzani thangwi ya munthu adalowa, makamaka makhaliro ace adidi peno midzidzi yakutsandzayisa idakhala na iye. Makani anewa panango anacitisa nyakuferwa kumwetulira pang’ono. Mwacitsandzo, Pam​—wakuti aferwa na mamunace akhacemerwa Ian pyaka pitanthatu nduli, alonga: “Midzidzi inango anthu asandipanga pinthu  pyadidi pidacita Ian pyakuti ine nee ndikhapidziwa, pyenepi pisandicitisa kubva mwadidi muntima.”

Anyakufufudza adzindikira kuti anyakuferwa azinji asatambira ciphedzo cakunjipa mu ndzidzi wakutoma, mbwenye axamwali angabwerera m’mabasa awo asaduwala kuphedza anyakuferwa. Natenepa, wangisirani kucedzera xamwali wakuferwa mwakukhonda phonya kutomera ntsiku idalowa nyakufunika wace. * Anyakuferwa azinji asapereka takhuta kakamwe na miyai ineyi thangwi asapungula mabvero awo akutsukwala mu ndzidzi uzinji.

Dingani citsandzo ca ntsikana wa ku Japau anacemerwa Kaori, wakuti akhanentseka kakamwe na kulowa kwa mai wace, na pidapita nthanda 15 mbalowa m’bale wace wankulu wankazi. Iye asasimba thangwi akhatambira ciphedzo ndzidzi onsene bulukira kwa axamwali ace akunyindirika. Nkazi anacemerwa Ritsuko ndi nkulu kupiringana iye, mbwenye aperekeka toera kukhala xamwali wace wapantima. Kaori alonga: “Mwandimomwene, nee ndikhakomerwa na pyenepi. Nee ndikhafuna kuti munthu unango anditsalakane ninga mai wanga, pontho ndikhanyerezera kuti nee m’bodzi mbadafuna. Mbwenye, thangwi ya njira ikhanditsalakanira Mama Ritsuko, ndatoma kukulisa uxamwali na iye. Masumana onsene, tikhaenda pabodzi m’basa yakumwaza mphangwa na ku misonkhano Yacikristu. Iye akhandicemera toera kumwa xaya na iye, akhandibweresera pyakudya, pontho akhalemba matsamba mbanditumizira ndzidzi onsene. Makhaliro adidi a Mama Ritsuko andikhuya kakamwe.”

Papita pyaka khumi na piwiri bulukira padalowa mama wa Kaori, cincino iye na mamunace ndi amwazi mphangwa a ndzidzi onsene. Kaori alonga: “Mama Ritsuko asapitiriza kunditsalakana. Ndingaenda kunyumba, ndzidzi onsene ndisaenda kunyumba kwawo kacedza na kubalangazwa.”

Citsandzo cinango ca munthu adaphindula na kupitiriza kucedzerwa pakumala kuferwa ndi Poli, m’bodzi wa Mboni za Yahova wa ku Chipre. Sozos, mamunace Poli, akhali munthu wakukoma ntima, wakuti akhazikisa citsandzo cadidi ca nkumbizi Wacikristu mu kucemera kazinji kene kunyumba kwace ana amphawi na azice toera kucedza na kudya pabodzi. (Tyago 1:27) Mwakutsukwalisa, mukhali iye na pyaka 53 Sozos alowa thangwi ya utenda wa ongo. Poli alonga: “Ndaluza mamunanga wakukhulupirika wakuti ndamala naye pyaka 33 pya kumanga banja.”

Mudamala kuikhwa mamunace, Poli afuluka na mwanace wang’ono wa pyaka 15 anacemerwa Daniel, kuenda ku Kanada. Kweneku, iwo atoma kusonkhana na mpingo wa Mboni za Yahova. Poli asakumbuka: “Axamwali a m’mpingo wanga upswa nee akhadziwa pinthu pidaticitikira, pontho makhaliro athu akunentsa. Mbwenye, pyenepi nee pyaacimwanisa kutibalangaza na mafala awo adidi na ciphedzo cakuphata basa. Ciphedzo cikhali cakufunika kakamwe, makamaka mu ndzidzi wakuti mwananga akhali na citsuwo ca babace! Akulu a mpingo apangiza citsalakano cawo cikulu ku pifuno pya mwananga Daniel. Nkulu m’bodzi acita masasanyiro a kunkwata konsene kunaenda iye kacedza peno kagwa bhola.” Cincino, mama na mwana asapibva akubalangazwa.

Kulonga undimomwene, pana njira zizinji zakuti tinakwanisa kupereka ciphedzo na cibalangazo kuna anyakutsukwala. Bhibhlya isatibalangazambo mukuphatisira cidikhiro cakutsandzayisa kakamwe ca ntsogolo.