Kai maua aka eiloa ne koe se lagonaga o te seai o sou aoga i te taimi ne nofo pili atu ei ki a koe se tino loto mafatia i te galo atu o se tino pele? I nisi taimi, e se iloa tonu ne tatou me ne a pati mo mea ka fai atu—telā e seai ei ne ‵tou pati e fai atu io me fai ne tatou se mea. Kae e isi ne mea aoga kae fesoasoani kolā e mafai o fai ne tatou.

E masani o manakogina fua tou nofo atu mo te fai atu a vaegā pati penei, “Kalofa la.” I tuu e uke, a te ‵sai malie atu io me ko te na malie atu fua o tou lima ki te tino e fai eiloa mo fai te ‵toe auala magoi ke fakaasi atu tou atafai. Kafai e fia faipati te tino fanoanoa, fakalogologo atu ki ei mo te atafai. A te ‵toe mea sili, ke fai se mea mō te kāiga fanoa‵noa, kāti mai te faiga o se galuega telā ko se mafai ne te tino fanoanoa o fai, e pelā mo te faiga o te kuka, te tausi atu ki tama‵liki, io me ko te fesoasoani atu ki fakatokaga o te fanoanoa māfai e ma‵nako latou ki ei. E sili atu te magoi o vaegā faifaiga penā i lō toe pati ‵gali e mafai o fai.

Kāti fakamuli e mafai o fakamalosi aka koe ke faipati atu e uiga ki te tino mate, mai te taku atu o ana nisi uiga ‵gali io me ko tala fakafiafia. E mafai eiloa o lavea atu se fakamisikata i mata o te tino fanoanoa i vaegā sau‵talaga penā. E pelā mo Pam—tela ne galo tena avaga, ko Ian, i te ono tausaga ko ‵teka—ne fai mai: “E  fai mai ne nisi tino a mea ‵lei ne fai ne Ian kolā e se iloa ne au kae ne fiafia eiloa toku loto.”

Ne lipoti mai ne tino fai sukesukega a te uke o fesoasoani e maua ne tino fanoa‵noa i te taimi muamua kae ne kamata o puli atu te manakoga tenā i te taimi ko toe kamata ei o fakalave‵lave a taugasoa kae toe ‵foki atu ki olotou olaga masani. Tela la, taumafai ke fesokotaki sāle atu ki te taugasoa fanoanoa mai tua ifo o te matega o tena tino pele. * Ne lasi eiloa te loto fakafetai o tino loto mafatia e tokouke ki te avanoaga tenei ke faka‵lei aka ei te lotou loto mafatia mō se taimi leva ‵ki.

Mafaufau ki te fakaakoakoga a Kaori, se talavou fafine mai Tiapani telā ne logo‵mae malosi i te galo atu o tena mātua kae ‵soko atu ki ei ko tena taina matua i se 15 masina mai tua ifo i ei. Fakafetai me ne fesoasoani atu faeloa ki a ia a taugasoa a‵lofa fakamaoni. E tokotasi mai i ei ko Ritsuko telā ne matua fakafia atu ki a Kaori kae ne ofo atu ke fai mo fai tena taugasoa pili. “A te ‵tonuga loa,” ko muna a Kaori, “ne seki fiafia au ki te mea tenā. Ne seki manako au ke sui ne se isi tino toku mātua, kae ne seki mafaufau au me e mafai ne se tino o fai penā. Kae ko faifaiga a Mama Ritsuko ki a au, ne kamata ei o pili te ma fesokotakiga. I vaiaso katoa, e olo fakatasi atu māua ki te galuega talai mo fakatasiga Kelisiano. Ne ‵kami ne ia au ke olo māua o inu tī, aumai ne ia aku meakai, kae tusi sāle mai ne ia a tusi i taimi e uke. Ne fakaasi mai faeloa ne Mama Ritsuko se kilokiloga aoga kae ne fakamalosi mai ki a au.”

Ko 12 nei a tausaga talu mai te matega o te mātua o Kaori, kae ko fai nei tou fafine mo tena avaga mo fai ne tino talai tumau. “Ne tumau eiloa a Mama Ritsuko,” muna a Kaori, “o fakaasi mai ne ia te atafai. Kafai e fanatu au ki toku fenua, e āsi atu faeloa au ki a ia kae fakamalosi mai a te sau‵tala fakatasi mo ia.”

A te suā fakaakoakoga o se tino ne aoga ki a ia a fesoasoani tumau ko Poli, se Molimau a Ieova i Kupelu. Ne maua eiloa ne Poli se avaga atafai, telā ne fai foki ne ia se fakaakoakoga ‵lei e pelā me se tausi mamoe Kelisiano mai te ‵kami mai ki te lā fale a tamaliki seai ne mātua mo fāfine ko ‵mate olotou avaga ke ta‵fao kae ‵kai fakatasi. (Iakopo 1:27) Se mea fakafanoanoa me i te taimi ko 53 ei ana tausaga, ne mate a Sozos i te kenisa o te faiai. “Ne galo atu taku avaga alofa fakamaoni telā ne ‵nofo fakatasi māua i tausaga e 33 o te ma fakaipoipoga,” ko muna a Poli.

Mai tua o tena mate, ne olo atu a Poli mo tena toekimuli, ko Daniel, telā ko 15 ana tausaga, ki Kanata. I konā ne kamata ei o ‵kau atu māua ki se fakapotopotoga a Molimau a Ieova. “A taugasoa ‵fou i taku fakapotopotoga fou,” ko muna a Poli, “ne seki iloa ne latou a mea mua e uiga ki a māua mo te tulaga faigata ne fepaki mo māua. Kae ne seki taofi aka ei latou mai te o‵mai kae ‵sai mai māua fakatasi mo pati atafai mo te fesoasoani aoga. Ko oko eiloa i te tāua o te fesoasoani tenā, maise eiloa i taimi kolā ne manako malosi ei taku tama ki tena tamana! Ne ‵saga malosi atu a tino kolā e fai ne latou te takitakiga i te fakapotopotoga ki a Daniel. E tokotasi mai i a latou ne fakamautinoa aka ne ia me e aofia faeloa a Daniel i maopoopoga mo taugasoa io me e olo atu latou o ta‵fao.” Ko oko eiloa i te ma‵losi o te mātua mo tena tama i aso nei.

E mautinoa eiloa me e uke a auala e mafai o fesoasoani kae fakamafanafana atu tatou ki tino fanoa‵noa. E tuku mai foki ne te Tusi Tapu a fakamafanafanaga e auala i se fakamoemoega fakafiafia mō aso mai mua.