Ohwo rọ kẹrẹ owẹ hẹ ẹdia rẹ uvweri, jẹ wo se ru emuvuọvo vwọ chọn uko-o. Wọ mrẹ oma wẹn vwẹ ẹdia nana jovwo re? Ọkiọvo, avwanre riẹn obo ra ta yẹrẹ obo re ru-u, kẹ avwanre di fotovwin. Ẹkẹvuọvo, o vwo erọnvwọn evo re se ru vwọ chọn ohwo na uko.

Ọke buebun, oborẹ ayen ghwa guọnọ ọyen ayen vwọ mrẹ wẹ, ji nyo eta kerẹ, “Ọ da vwẹ mamọ.” Vwẹ ẹkuotọ sansan, idjerhe ọvo re vwo dje ọdavwẹ phia, ọyen ra vwọ gbane ohwo na yẹrẹ ghwa abọ kpahen igabọ rọyen. Ohwo rọhẹ ẹdia rẹ uvweri na da guọnọ ta ota, nabọ kerhọ kẹ vẹ erorokẹ. Ọ rọ ma rho, wo se ru erọnvwọn evo vwọ chọn ohwo na uko, kerẹ wo vwo chere emu vwọ kẹ, je vwẹrote emọ rọyen, yẹrẹ nene yan oyan rẹ ughworivwin na, ọ da dia obo ri shephiyọ. Enana yen a tobọ ma guọnọ vrẹ eta.

Ọke vwọ yanran na, wọ sa ta ota kpahen ohwo ro ghwuru na, tẹnrovi uruemu esiri rọyen vẹ erọnvwọn iyoyovwin ro ruru. Eta tiọyena sa nẹrhẹ ohwo rọhẹ ẹdia rẹ uvweri na hwẹ. Kerẹ udje, ọshare rẹ Pam re se lan ghwuru ẹgbukpe esan re wanre, Pam da ta: “Ọkiọvo, ihwo vuẹ vwẹ erọnvwọn iyoyovwin evo rẹ ọshare mẹ ruru rẹ me riẹn kpahe-en, ọnana nẹrhẹ oma vwerhen ovwẹ.”

Kirobo rẹ iyẹnrẹn djere, ihwo buebun rehẹ ẹdia rẹ uvweri mrẹ ukẹcha ẹsosuọ, jẹ a kpairoro vrẹ ayen siẹrẹ igbeyan rayen de rhivwin kpo nu. Ọtiọyena, davwẹngba wo vwo se ugbeyan wẹn rọhẹ ẹdia rẹ uvweri ọkieje. * Ọnana kẹ ayen omavwerhovwẹn kidie ọ chọn ayen uko vwo yerẹn ghene uvweri na.

Roro kpahen udje rẹ eghene aye re se Kaori, ohwo rẹ Japan. Ughwu rẹ oni rọyen nẹrhẹ ubiudu rọyen hra totọ, emeranvwe 15 vwọ wan nu, oniọvo rọyen de rhe ghwu. Ẹkẹvuọvo, igbeyan rọyen vwẹ ukẹcha kẹ ọkeneje. Ọvo usun rẹ igbeyan na ọyen mama ọvo re se Ritsuko. Kaori da ta: “Vwọrẹ uyota, oma vwerhen ovwẹ-ẹ. Me guọnọ nẹ ohwo vuọvo reyọ ẹdia rẹ oni mẹ-ẹ, jẹ me je vwẹ ẹro roro nẹ ohwo vuọvo sa reyọ ẹdia rọye-en. Ẹkẹvuọvo, uruemu rẹ mama nana, nẹrhẹ ovwẹ nabọ sikẹrẹ kpẹkpẹkpẹ. Kudughwrẹn kudughwrẹn, ọyen avwanre vwo kpo uyono vẹ aghwoghwo kuẹgbe. O durhie uvwe kpo uwevwin rọyen ra da iti, yẹrẹ o mu emu bru uvwe cha, o ji si ileta yẹrẹ ikadi rhe vwe ọke buebun. Uruemu rẹ mama nana, djobọte vwe mamọ.”

Oni rẹ Kaori vwo ghwu na, o te ẹgbukpe ihwivẹ re. Asaọkiephana, Kaori vẹ ọshare rọyen ghwoghwo ota rẹ Ọghẹnẹ ọkieje. Kaori da ta: “Ọkieje yen me je vwọ mrẹ ẹguọnọ rẹ mama na vwo kpahen ovwẹ. Mi de rhivwin kpo, me kọn bro ra ọkieje, je riavwerhen rẹ oyerinkugbe rọyen.”

Ohwo ọfa rọ je mrẹ erere vwo nẹ ukẹcha rẹ ọkieje, yen Poli, rọ dia Oseri rẹ Jihova vwẹ Cyprus. Ọshare rẹ Poli re se Sozos, ọyen ọkpako rẹ ukoko, ro vwo omamọ rẹ uruemu. Ọkieje yen o vwo durhie emọphrorivwin vẹ eyauku cha uwevwin rayen, kẹ ayen riemu, ji gbikun kuẹgbe. (Jems 1:27) Ọ da ohwo mamọ nẹ, ọke rẹ Sozos vwọ hẹ ẹgbukpe 53, ọga rẹ ubi da djẹ vwẹ afọnrhe de rhi hwe. Poli da ta: “Ẹgbukpe 33 yen avwanre rọvwọnre tavwen ọshare ọghanghanre mẹ ki ghwu ju vwe vwo.”

Re vwo sho nu, Poli vẹ ọmọ rọyen otete re se Daniel rọhẹ ẹgbukpe 15, da kua kpo Canada.  Ayen de rhi kuomakugbe ukoko rẹ Iseri rẹ Jihova rọhẹ asan na. Poli vwọ karophiyọ, ọ da ta: “Iniọvo rehẹ ukoko kpokpọ na ghwa riẹn obo re phia kẹ vwẹ vẹ ebẹnbẹn ri mi hirharoku-u. Ẹkẹvuọvo, ayen reyọ eta rayen vwo bru avwanre uche ọkieje, ayen je vwẹ ukẹcha kẹ avwanre. Ukẹcha nana ghanre mamọ ma rho vwẹ ọke yena rẹ ọmọ mẹ vwọ guọnọ ọsẹ rọyen na. Ekpako na vwo ẹguọnọ rẹ Daniel mamọ. Ọvo usun rayen se Daniel ọkieje siẹrẹ ayen da ra fa ibọrọ.” Asaọkiephana, oma vwerhen oni na vẹ ọmọ rọyen.

Vwọrẹ imuẹro, idjerhe sansan herọ ra sa vwọ vwẹ uchebro vẹ ukẹcha vwọ kẹ ihwo rehẹ ẹdia rẹ uvweri. Iphiẹrophiyọ rọhẹ Baibol na ji se bru ayen uche.