Inabat ka na ba nga baga hin waray ka naibubulig ha usa nga namatayan nga duok ha imo? Usahay diri kita maaram han aton isisiring o bubuhaton, salit nahilom na la kita ngan waray ginhihimo. Kondi may praktikal nga mga butang nga aton maibubulig.

Kasagaran, igo na an imo presensya ngan an imo pagsiring, “Nasusubo gud ako ha nahitabo.” Ha damu nga kultura, epektibo nga paagi ha pagpakita hin pagpaid an paghangkop o pag-agbay. Kon karuyag makiistorya an namatayan, pamati hin maopay. Mas maopay liwat kon bubuligan an namatayan nga pamilya ha mga buruhaton nga diri nira nahihimo sugad han pagluto, pag-ataman ha kabataan, o pag-asikaso han lubong kon karuyag nira. Posible nga mas daku an maibubulig hito kay han mag-opay nga mga pulong.

Ha paglabay han panahon, bangin mahimo ka na mag-istorya mahitungod han namatay, posible mahitungod han iya mag-opay nga kalidad o makalilipay nga mga eksperyensya. An sugad nga pakiistorya mahimo makalipay ha namatayan. Pananglitan, hi Pam nga namatayan hin bana unom ka tuig na an naglabay, nagsiring: “Usahay may mga nagsusumat ha akon mahitungod han mag-opay nga ginbuhat ni Ian nga diri ko hinbabaroan, ngan nakakalipay ito ha akon.”

 An mga parasaliksik nasiring nga ha tinikangan, damu nga bulig an nakakarawat han mga namatayan, kondi kon nagigin sagipo na an ira kasangkayan ha personal nga kinabuhi, nangangalimtan na hira. Salit, siguroha nga regular nga makaistorya an imo sangkay bisan katapos han lubong. * Inaapresyar gud ini han damu nga nagtataguminatay tungod kay nakakabulig ito nga maibanan an ira kasubo.

Pananglitan hi Kaori, usa nga batan-on nga taga-Japan, nasakitan gud han mamatay an iya nanay nga ginsundan pa han kamatay han iya ate paglabay la hin 15 ka bulan. Maopay na la, padayon hiya nga ginsuportaran han iya maunungon nga kasangkayan. An usa ha ira, hi Ritsuko nga mas magurang kan Kaori an nangalimbasog nga magin duok ha iya. Hi Kaori nagsiring, “Ha pagkatinuod, waray ako malipay hito. Waray bisan hin-o nga makakasaliwan ha akon nanay, ngan waray makakahimo hito. Kondi, tungod han maopay nga pagtratar ha akon ni Mama Ritsuko, nagin duok ako ha iya. Kada semana, magkaupod kami nga nagsasangyaw ngan natambong ha Kristiano nga mga katirok. Pirme niya ako gin-iimbitar mag-isnak, gindadad-an hin pagkaon, ginsusuratan, ngan ginpapadad-an hin kard. Daku an naibulig ha akon han pagin positibo ni Mama Ritsuko.”

Dose ka tuig na tikang han mamatay an nanay ni Kaori, ngan hiya ngan an iya bana nag-aalagad yana sugad nga bug-os-panahon nga mga ebanghelisador. Hiya nagsiring, “Padayon nga iginpapakita ni Mama Ritsuko an iya pagtagad ha akon. Kon nauli ako, pirme ko hiya ginbibisita ngan nalilipay gud ako ha makaparig-on nga pakig-upod ha iya.”

An usa pa nga nagpahimulos hin padayon nga suporta amo hi Poli, usa han mga Saksi ni Jehova ha Cyprus. An iya bana nga hi Sozos, buotan ngan maopay nga susbaranan nga Kristiano nga paramangno nga agsob mag-imbitar hin mga ilo ngan mga balo ha ira balay basi magdinasigay ngan mangaon. (Santiago 1:27) Makasurubo, ha edad nga 53, namatay hi Sozos tungod hin tumor ha utok. “Namatay an akon maunungon nga bana nga nakaupod ko hin 33 ka tuig,” siring ni Poli.

Katapos han lubong, hi Poli ngan an iya 15 anyos nga puto nga anak nga hi Daniel, binalhin ha Canada. Didto, nagin bahin hira ha usa nga kongregasyon han mga Saksi ni Jehova. Hiya nagsiring, “Diri maaram an kabugtoan ha amon bag-o nga kongregasyon han amon gin-agian ngan kakurian. Kondi waray ito makapugong ha ira nga abiabihon kami ngan liawon pinaagi han ira mapinairon nga mga pulong ngan praktikal nga bulig. Daku gud ito nga bulig, labi na ha panahon nga kinahanglan gud han akon anak an iya tatay! An mga nangunguna ha kongregasyon nagpakita hin daku nga interes kan Daniel. Ginsiguro han usa ha ira nga upod hi Daniel kon may pagkatitirok an kabugtoan o kon nag-uuyag hira.” Yana, maopay an kahimtang han magnanay.

Oo, damu an paagi basi makaghatag kita hin praktikal nga bulig ngan pagliaw ha mga nagtataguminatay. Ginliliaw liwat kita han Biblia pinaagi han makalilipay nga paglaom ha tidaraon.