Ya mo mo abingo tiro nga gene bero tipa ka undo gu boro narungo tipa pakpio gani boro te? Ti kura aregbo, ani arengbanga ka ino gupai si aida ani pehe watadu ani mangihe te, si kini sa gupai nga ani sungu kaa ngera gbua ni kina bangirani. Ono apai kinaho rengbe ani arengba ka mangaha si ki fu undo.

Dedede, gupai si aidaha gbua nga kadu pati gu boro re na ki pe afugo wa gu nga “Na gberẽ gupai re.” Rogo kura aringara, dungo gu boro re watadu ka wega giiniyo nayugo gupai nga mo naberãpa gu boro re aberã. Ka si du nga gu boro narungo tipa kpio gani boro re nafura, si naida mo degeturo wenengai. Gu nyakipaha gbe nga, mo mangipai fu gani aborokporo, isoke ka undo ni ti gu sunge adunga gene beni ka mangaha ya, wa manga riahe, ngerafuo agude, watadu gu mbakadapai nabipa kporokpee ka si du nga si naidaha. Ngbatunga gu mangapai re ima rengba kadu ni wenehe kisusi wene afugo gbua.

Fuo bete regbo kusa, mo ima rengba ka fura tipa gu boro na kpi, gbe tipa gu wenewene asinoni watadu gu wene apai ni amangihe. Ngbatunga agu afugo re ima rengba kafu wasa fu gu boro narungo tipa kpio gani boro re. Ni kpiapai, Pam kumbari akpi nga Ian agarã sita kusayo aya: “Aboro naapeka gu wenewene apai fere nga gu Ian anaamangaha nga gu mi ainongo pai tipaha ya, na gipai re nasa re mi du na ngbarago.”

Abawisigipai nape gupai nga agu aboro narungo tipa gayo aboro nagbia undo gbe kina ti tonatonaha, ono fuo abakureayo tona ka manga agu apai nabipa gayo raka, bangiriyo nago ti agu aboro re. Sidu tie, mo mangi ome dedede tipa kaa ndu ka bi bakureamo fuo kpio gani boro. * Dungu agu aboro gayo aboro akpi nidu na tambuahe tipa gi momu re mbiko si nasayo i dibe gu gberãrago du yo na ni.

Mo bingo gu kpiapai naadu tipa Kaori nga gu paranga degude du Japan yo naadu na bakere gberãrago tipa kpio nari na fuo adiwi 15 kusa unvurari ki kpi. Ri adu na bakere tambuahe mbiko gu undo ri agbiaha be wene anakureari. Gu kura wirina nga Ritsuko naima nyaka tiri aaida kadu ni wene nakureari. Kaori aya: “Ka pe kina rengo, mi aadunga na ngbarago tipa gipai re te. Mi aidanga boro diba nina te, na mi abingo ho nga boro rengbe ka diaba ri a te. Ono tie, gu gene Mama Ritsuko aamanga re ngbaha asa re mi du mbembedi nari. Aposo dunduko ani anaandu ku gene tungusapai yo sa na kini ndu tipa agu adunguratise nga ga aKristano a kina sa. Ri anaayamba re mi ye ani mbiri fofoi ime sa nari, kini ye na riahe fere, na kini keke awaraga fere dedede. Gu wene bipai Mama Ritsuko adu na ni re aima du na wene sangbanaha kurire.”

Agarã ima susa awere bawe na ue wa navungu Kaori akpi, na areme ri gbiati kumbari natungusapai ti aregbo dũ. Kaori aya: “Mama Ritsuko naberãpa re kindi. Ho mi andu ni ku kporo yo, wo mi naandu kaa bi ri na kini gbia ngbarago be ri.”

Poli nga gu kura boro berewe naagbia undo, ri nga Dezire Yekova rogo gu gbaria nga Kupurio. Kumba ku Poli angia wenesino boro rimoko angia Sozos, ko angia wenesino bakumba ni Kristano na kini yambu awirinyaure na adekurugbo ku kpuko yo i ni ri riahe. (Yakoba 1:27) Si nafu kina gberãrago nga, ho garã Sozos adani nga 53, ko akpi be gu kaza nahi ti berã boro. Poli aya: “Mi azanga bawene kumbami ani araki nako tipa agarã 33 ku rogo rogatise.”

Fuo nyasa kporokpee, Poli aga ka raka Canada yo na wiiri garãko adu 15 nga Daniere. I atona kaa ndu ku rogo kura dungurati nga ga aDezire Yekova. Poli aya: “Agu abakureami naadu rogo gimi  vovo dungurati re ainongo pai tipa gu kpakarapai namangi re kusayo te. Ono gipai re aakanga na yo ti ye fuo rani na kaa fu wasa furani rogo wene afugo gbiati undo te. Nairiwo wai gi undo re adu ni bawenehe ti gu regbo wire aida na bako ni bakerehe gbe! Agu aboro naangbembatayo rogo dungurati aima kpinyemu Daniere. Gu kura ko sa anaaye ka dia Daniere i nasungo sa na kini ndu na ko kaa ngi kandi.” A Daniere na nako dunduko areme wenengai.

Zanga kapa, dungu agene kinaho rengbe ani ngbaha kafu wasa fu agu aboro narungo tipa kpio gayo aboro. Ziazia Kekeapai nafu wasa furani a vurube gu kido du ani na ni kumbatayo.