Maol do si Gail, na dipaboa di halaman opat, mangalupahon hamamate ni si Rob, tungganedolina. Alai, marpangkirimon do ibana boi pajumpang muse dohot tungganedolina di tano na imbaru. Ibana mandok, ”Ayat ni Bibel na jotjot huingot, i ma Pangungkapon 21:3, 4.” Ayat i mandok, ”Debata sandiri saor tu nasida! Jadi apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i!”

Si Gail mandok, ”Janji on mambahen tarapul rohangku. Asi do rohangku mangida na marhabot ni roha, tarlumobi ala ndang diboto nasida boi pajumpang muse.” Alani i, rade do si Gail gabe sahalak pelayan sepenuh waktu, mangurupi angka halak mangantusi na so adong be hamatean bahenon ni Debata di ari na naeng ro.

Ra, olo do hamu mandok, ’Ndang tutu masa i!’ Alai, parrohahon ma na masa tu si Job. Mansai posa do sahitna. (Job 2:7) Nang pe alani sahit i boi ibana mate, pos do rohana paheheon ni Debata do ibana muse sian hamatean. Ibana mandok, ”Aut olo ma Ho nian manabunihon ahu di bagasan [kuburan] . . . Disi Ho joujou di ahu, pintor alusanku do Ho, halungunhononmu tahe jadijadian ni tanganmu.” (Job 14:13, 15) Pos do roha ni si Job na malungun Debata tu ibana jala paheheonNa ibana muse.

Satongkin nari, paheheon ni Debata ma si Job dohot torop halak na so taretong bilanganna di paradeiso. (Lukas 23:42, 43) Ulaon ni Apostel 24:15 mandok, ”Mulak mangolu sogot angka na tigor dohot angka na geduk.” Dung i, Jesus paposhon rohanta muse. Ibana mandok, ”Unang longang rohamu ala ni i, ai di na ro tingkina, begeon ni saluhut halak na di angka tanoman i ma soarana. Dung i ruar be ma.” (Johannes 5:28, 29) Idaon ni si Job ma Debata manggohi janji on. Boi ma ibana ”mulak poso” jala mangolu salelengna ”songon uju di haposoonna”. (Job 33:24, 25) On ma na laho masa tu sude halak na patuduhon pangargaion tu pangkirimon, na laho paheheon ni Debata halak na mate di tano on.

Molo marhabot ni roha hamu alani hamatean ni halak na dihaholongi, ra ndang sae holan hatorangan on na boi mangapul rohamuna. Alai, molo dirimangi hamu janji ni Debata sian Bibel, marpangkirimon ma hamu jala boi martahan.​—1 Tessalonik 4:13.

Lomo do rohamuna mandapot gumodang hatorangan taringot mangadopi habot ni roha? Manang, olo do ra adong sungkunsungkunmu songon, ”Boasa dipaloas Debata hajahaton dohot sitaonon?” Ida ma situs Webnami, www.pr418.com/bbc, laho mandapot alus na sian Bibel.