Maet yu tingbaot yet Gael we yumi tokbaot finis. Man blong hem, Robet, i ded, mo Gael i ting se neva bambae hem i harem gud bakegen. Be hem i bilif se bambae hem i luk Robet bakegen long niufala wol we God i promes blong mekem. Gael i talem se: “Vas we mi mi laekem tumas, hemia Revelesen 21:3, 4.” Vas ya i talem se: “God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”

Gael i talem se: “Nambawan promes ya i kavremap evri samting we yumi nidim. Mi mi sore tumas long olgeta we oli lusum wan famle, be oli no save se oli gat janis blong luk hem bakegen.” Gael i soemaot bilif blong hem taem hem i wok olsem volontia blong tijim ol man long Baebol, mo hem i talemaot long olgeta, nambawan promes ya se “bambae i no moa gat man i ded.”

Maet yu yu talem se: ‘!Nogat! Samting ya i no save hapen.’ Be yu traem tingbaot man ya Job. Hem i sik we i sik tumas. (Job 2:7) Hem i wantem ded nomo. Be hem i bilif yet se God i gat paoa blong mekem hem i laef bakegen long wol ya. Taswe, hem i talem wetem strong tingting se: “God. Mi mi wantem tumas blong yu haedem mi long Hom blong ol Dedman . . . yu singaot mi mi kam, mi bambae mi harem yu. Yu nao yu mekem mi, mo long taem ya, bambae yu save glad long mi.” (Job 14:13, 15) Job i bilif se God bambae i wantem tumas blong mekem hem i laef bakegen.

I no longtaem, God bambae i mekem Job mo plante narafala man oli laef bakegen, taem hem i mekem wol ya i kam paradaes. (Luk 23:42, 43) Long Ol Wok 24:15, i talem se: “God bambae i mekem olgeta man we oli ded oli laef bakegen.” Mo Jisas i talem se: “I nogud yufala i sapraes long samting ya, from we i gat taem i stap kam we ol dedman bambae oli harem voes blong mi, nao bambae oli aot long beregraon.” (Jon 5:28, 29) Job bambae i luk we promes ya i kamtru. Hem bambae i “kam strong olsem we i yangfala nomo,” mo bodi blong hem bambae i “kam gud bakegen” blong olwe. (Job 33:24, 25) Bambae i sem mak long olgeta evriwan we oli bilif long presen we God i wantem givim, hemia laef bakegen long wol ya.

Sipos yu yu stap harem nogud from wan famle we i ded, maet ol save ya i no tekemaot olgeta soa we i stap long hat blong yu. Be sipos yu tingting dip long ol promes blong God long Baebol, bambae yu gat hop, mo bambae yu kasem paoa blong gohed.​—1 Tesalonaeka 4:13.

?Yu yu wantem save moa, olsem wanem blong harem gud bakegen taem wan famle i ded? Maet yu gat sam narafala kwestin olsem, “?From wanem God i letem ol man oli harem nogud?” Plis yu luk Websaet blong mifala, jw.org/bi, blong faenem ansa blong Baebol we bambae i leftemap tingting blong yu.