Mungkin ingetndu denga Gail, si ituriken i bas pemena artikel enda. Ia sangsi banci ntah lang itambarina pusuhna si ceda kenca kematen perbulangenna, Rob. Tapi, itimaina paksana ia banci jumpa mulihi ras Rob i doni si mbaru si ijanjiken Dibata. Nina Gail, ”Ayat kesukanku eme Ketangkasen 21:3, 4.” Nina, ”Ringan me Ia i tengah-tengah manusia janah Ia me jadi Dibata manusia. Iapusi Dibata me kerina iluh anak-anakNa e. Lanai pagi lit kematen, ceda-ate, tangis ntah pe si mesui. Sabap si pemena enggo lepas.”

Nina Gail, ”Janji enda erbahan salang kal ukurku. Mekuah kal ateku ngidah kalak si itadingken kalak si ikelengina, tapi la meteh kerna arapen maka ia banci jumpa mulihi ras kalak si nggo mate e.” Sentudu ras kinitekenna e, Gail ngelayani jadi perberita sepenuh waktu. Ipebetehkenna janji Dibata kerna wari si pepagi man kalak si deban, i ja ”lanai pagi lit kematen”.

Banci saja mamang atendu megi kalak mate nggeluh mulihi. Tapi cuba perdiateken usihen Jop. Ia kena sada pinakit si mekelek. (Jop 2:7) Amin gia pangen akap Jop mate, tapi tek ia maka Dibata ngasup mpekeke ia mulihi i doni. Nina, ”I bas doni kalak matelah buniken aku . . . I je kualoi me Kam, sanga aku ilebuhNdu. Tedeh ateNdu aku, bekas tinepaNdu.” (Jop 14:13, 15) Jop tuhu-tuhu tek maka tedeh ate Dibata ia janah ipekekeNa ia pagi mulihi.

Kentisik nari, enda me si ilakoken Dibata man Jop bage pe man nterem kalak si debanna, paksa doni enda iubah jadi pardis. (Lukas 23:42, 43) ”Lit nge kekeken i bas si mate nari,” janji Pustaka si Badia i bas Perbahanen 24:15. Nina Jesus man banta, ”Ola atendu mamang kerna si enda, sabap reh me paksana maka kerina kalak mate si i bas kuburen megi sora Anak e, jenari ndarat me ia kerina i bas kuburen e nari.” (Johanes 5:28, 29) Idah Jop nge pagi kerina janji e terjadi. Ia banci mulihi ”megegeh bagi sekalak anak perana”, janah ”pesing ka mulihi dagingna”. (Jop 33:24, 25) Si enda pe banci inanami kerina kalak si ngergai pemere Dibata eme kinikeken i doni.

Adi pernah ceda ukurndu erkiteken kematen kalak si keleng atendu, keterangen enda banci saja labo mis erbahan ceda atendu bene. Tapi, alu ngukuri janji Dibata i bas Pustaka si Badia, banci idatkenndu arapen situhu-tuhu si banci nampati kam megenggeng.​—1 Tesalonika 4:13.

Nggit nge kam meteh terbuen kerna uga carana ngatasi perasan ceda ate? Ntah, pernah nge kam tersungkun-sungkun, ”Engkai maka ipediat Dibata kejahaten ras kiniseran?” Banci nehenndu situs Web kami, jw.org/btx, guna meteh jabapen Pustaka si Badia si erguna ras mereken pengapul.