Neman ka chechchemeni Gail, ewe sia fen pwóróus usun me akkomwan, i a tipemwaramwar ika epwe tongeni wesiló an meefi letipeta ren málóón pwúlúwan we itan Rob. Iwe nge, a mwétéresiti an epwe kúnasefáli i lón ewe mineféén ótóten fénúfan, ewe Kot a fen pwonei usun. Gail a erá “Ua fókkun sani ewe wokisin lón Pwärätä 21:3, 4.” Iei masouan: “Püsin Kot epwe etiir pwe epwe ar Kot. Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”

Gail a erá: “Masouen ei pwon a fen unus. Ua wesewesen tongei ekkewe aramas mi péút seniir emén attongeer nge rese silei ei ápilúkúlúk pwe repwe tongeni kúnasefáli attongeer we.” Gail a eáni féffér mi tipeeú ngeni minne a lúkú pún a kan afalafala ewe kapas allim úkúkún 70 awa iteiten maram, a apwóróusa ngeni chón órun kewe usun án Kot we pwon fán iten mwachkkan, ewe atun “esap chüen wor mäla.”

Neman kopwe erá, ‘Ese fókkun tufich ena!’ Nge nengeni pwóróusen ewe mwán itan Hiop. I a úri watteen semmwen. (Hiop 2:7) Inaamwo ika Hiop a áneánei an epwe máló, nge i a chúen lúkúlúk wóón án Kot tufichin amanawasefáli i seni máló ikeei ie wóón fénúfan. Iei alon fán an lúkúlúk: “Amwo kopwe aopaei lon ewe lenien sotup . . . En kopwe köriei, nge ngang üpwe pälüenuk. En kopwe positiei, ngang ätewe poum a föri.” (Hiop 14:13, 15) Hiop a fókkun lúkúlúk pwe an we Kot epwe pwosiiti i me epwe mochen amanawasefáli.

Ekiseló chék, ina met Kot epwe féri, epwe amanawasefáli Hiop me pwal chómmóng chómmóng aramas lupwen ei fénúfan epwe wiliti eú paratis. (Lukas 23:42, 43) Ewe Paipel a affata lón Föför 24:15 pwe epwe wor “manausefäl seni mäla.” Jesus a pwal alúkúlúkú ngenikich ena, a erá: “Ousap weitifengenikemi ren ekei kapas. Pun epwe war ewe fansoun lupwen ekewe sotup meinisin repwe rong mwelian o towu seni peiaser.” (Johannes 5:28, 29) Hiop epwe kúna pwénúetáán ena pwon. I epwe tongeni “liwiniti pöchökülan lealüalün” me “inisin epwe wiliti inisin eman alüal” tori feilfeiló chék. (Hiop 33:24, 25) Ina met epwe pwal fis ngeni meinisin chókkewe mi etiwa me aúcheani án Kot úméúméch le awora ewe ápilúkúlúkún manawsefál wóón fénúfan.

Ika ka fen letipechou ren málóón emén attongeom, minne ka álleani lón ei pwóróus neman esap unusen amóeló óm letipeta. Nge óm ekilonei án Kot kewe pwon lón Paipel epwe tongeni álisuk le kúna ewe ápilúkúlúk mi enlet me eáni ewe péchékkúl epwe tongeni elikiituk.​—1 Tesalonika 4:13.

Ka mochen alapaaló óm silei ifa usun emén epwe tongeni likiitú fán an letipeta? Are, mi wor óm kapas eis mi weneiti ei pwóróus, áwewe chék ren “Pwata Kot a mutatá minne mi ngaw me án aramas repwe kúna riáfféú?” Kese mochen tétá wóón Internet lón ám ei website jw.org me ppii ifa usun pélúwen ekkena esin kapas eis seni ewe Paipel ra tongeni álilliséch ngonuk me oururu letipom.