Hi capar a thawklei ah a kong chimmi Gail nih a vapa Rob a thihtak ruangah a ngaihchiatnak cu a dam kho ti lai lo tiah a ruahmi kha naa cinken ko lai. Asinain Pathian nih a kan kamhmi vawlei thar ah a vapa he i ton ṭhan lai kha aa ngaih tuk. “Ka duh bikmi Baibal cacaang cu Biathlam 21:3, 4 hi a si” tiah a ti. Mah ah hitin kan hmuh: “Pathian hrimhrim cu an sinah a um lai i amah cu an Pathian a si lai. An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”

Gail nih hitin a chim: “Mah biakamnak nih hnemhnak le ruahchannak a ka pek. Cucaah an dawtmi nih an thihtak hna i anmah he kan i tong ṭhan lai timi ruahchannak kong a hngal lomi hna kha ka zaang an fak tuk.” “Thihnak a um ti lai lo” timi Pathian biakam kong kha midang a chimh hna i caantling in Pathian rian a ṭuan.

‘Mah cu a si kho lomi a si’ tiah na chim men ko lai. Asinain Job kong kha ruathmanh. Anih cu fakpi in a zaw. (Job 2:7) Cucaah Job nih thih hmanh a rak duh ko nain Pathian nih hi vawlei ah a ka nunter ṭhan khawh timi zumhnak zong a rak ngei. Zumhnak he hitin a chim: “Pathian, Sheol ah khin ka thup law ka duh. . . . Na ka auh lai i kaan leh lai, na kut tuahmi thil cu hmuh na ka duh lai.” (Job 14:13, 15) Pathian nih a ka cinken lai i nunter ṭhan a ka duh lai ti kha Job nih a zumh.

A rauhhlan ah Pathian nih vawlei hi paradis ah a thlen dih hnuah Job le midang tampi kha a nunter ṭhan hna lai. (Luka 23:42, 43) Lamkaltu 24:15 nih mithi an ‘tho ṭhan lai’ tiah a ti. Jesuh nih hitin aamah a khaan: “Hi kongah hin lau hlah u; thlan chung i a ummi mithi vialte nih a aw an theih lai caan kha a ra lio. Cun an thlan khan an chuak lai.” (Johan 5:28, 29) Mah biakam a tlinmi kha Job nih a hmuh te lai. Job cu “a ṭhawn silingte ah khan a kir ṭhan lai” i “a tlanval lio nak khan a titsa a ṭha deuh lai.” (Job 33:24, 25) Vawleicung ah nun ṭhannak timi Pathian timhpiaknak a sunsakmi hna zong nih mah thluachuah kha an hmuh ve lai.

Nang cu na dawtmi pakhatkhat nih thihtakmi na si ahcun atu kan i ruahmi kong hna nih na lungfahnak kha a hlo kho dih men lai lo. Asinain Baibal ah hmuhmi Pathian biakam pawl ṭha tein na ruah ahcun ruahchannak taktak na hmuh lai i thazaang aan ngeihter lai.—1 Thesalon 4:13.

Ngaihchiatnak hna tawnghtham ning he aa tlaiin tam deuh in hngalh na duh maw? Asiloah “Zeicah Pathian nih sifah harnak hi umnak nawl a awnh?” ti bantuk biahalnak hna tah hngalh na duh maw? Hnemhnak a pemi Baibal a phi hna hngalh awkah zaangfahnak in kan website a simi jw.org/cnh ah zoh.