De o nanuma tiko na veika baleti Gail, a vakamacalataki ena itekitekivu ni vica na ulutaga qo, a vakabauta ni na sega ni guilecavi watina rawa o Rob. Ia e vakanamata tu me raici koya tale ena vuravura vou e yalataka na Kalou. E kaya: “Au dau taleitaka na Vakatakila 21:3, 4.” E tukuni kina: “Na Kalou ena tiko vata kei ira. Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”

E kaya o Gail: “Na ka kece au diva tu sa vakamatatataki ena yalayala qori. Au dau vakasamataki ira tu na lolosi era sega ni kila na inuinui qori, nira na rawa tale ni raici ira na nodra dau lomani.” E cakacakataka o Gail na nona vakabauta ni bole me vakaitavi vakatabakidua ena cakacaka vakaitalatala, me tukuna kina vei ira e levu na yalayala ni Kalou ni “sa na sega tale na mate.”

De o na kaya ‘Sa sega tu ga ni dina qori!’ Ia vakasamataki Jope mada. A tauvimate bibi. (Jope 2:7) A diva o Jope me mate, ia e nuitaka na kaukaua i Jiova ni na vakaturi koya lesu mai vuravura. E kaya ena nuidei: “Moni tabonaki au ena iBulubulu. . . Oni na kaci mai, au na rogo yani. Oni na vinakata vakalevu na cakacaka ni ligamuni.” (Jope 14:13, 15) E vakadeitaka o Jope ni na dau nanumi koya tu ga na nona Kalou, e vinakata tale ga me vakaturi koya tale.

Sa voleka sara ga ni cakava qori na Kalou—vei Jope kei na levu tale era sega ni wiliki rawa—ena gauna sa vukici kina na vuravura qo me parataisi. (Luke 23:42, 43) E vakadeitaka na Cakacaka 24:15 ‘ni na yaco na veivakaturi.’ E vakadeitaki keda kina o Jisu: “Ni kua ni kurabui ena ka qo, ni sa voleka mai na gauna mera rogoca kina na domona o ira kece na tu ena ibulubulu nanumi mera tucake mai.” (Joni 5:28, 29) Ena raica sara ga o Jope ni sa vakayacori na yalayala qori. Ena rawata tale na “kaukaua vakaitabagone” qai sega ni vuca rawa na yagona ni sa “bulabula cake na lewena mai na lewena ni se itabagone.” (Jope 33:24, 25) Ena yaco tale ga qori vei ira kece na taleitaka na nona yalayala vakayalololoma na Kalou me baleta na veivakaturi ena vuravura qo.

Ke mate e dua o dau lomana se drau veivolekati, na itukutuku era se qai vakamacalataki ga qori ena rairai sega ni vakaotia sara nomu lolosi. Ia ni o vakasamataka vakatitobu na yalayala ni Kalou ena iVolatabu, ena tiko nomu inuinui, ena uqeti iko tale ga mo kua ni soro.—1 Cesalonaika 4:13.

O via kila eso tale na ka mo vosota kina na nomu lolosi? Se so na nomu taro ena vuku ni veika o se qai wilika ga qo, me vaka “Na cava e vakalaiva tiko kina na Kalou na veika ca kei na rarawa?” Yalovinaka ni rai ena neimami website, na jw.org, moni vulica kina na veivakacegui ni iVolatabu kei na yaga ni kena ivakasala.