Kɛlɛŋgaa a loonuŋ ndɔ a Kaal naŋ soo a ndu okɔɔ o buŋgɛi tasei niŋndo. Kaal nɔ kiisaŋndo te o puɛɛnuŋ niŋ pɛ a piɔm pɔnɔ ndɔ wo. Kɛ a koŋ kpou, o cho lehɔl o nɛi le pɔnɔ ndɔ hunɔɔ chɔɔ o chieeŋ sɛnɛi Mɛlɛka dimi le naa kioo wo niŋ. Mi chuaa hoo dimi aa, “Bolle Baabuile ya hɛnaŋ tau leŋ le cho Sɔɔŋ Chɔɔmaŋndoŋ 21:​3, 4 ni.” Le dimi aa, “Mɛlɛka pila cho wa a nda latulu. . . . O cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa, kani fuule, nyɛ o nyɛ paandu chuu faŋaŋ.”

Mi Kaal dimi aa, “Sɔɔŋ kpou cho o diomnda mɛɛyaa laŋ ndaŋ niŋ. Mi nyɛiye bii ya le wanaa wanaa ndaa kaalaa vi wa kanifuule, a sina tiindaŋ Baabuiyo ke naa hoo maa wanaa naa kaalaa vi wa cho vɛlɛ miiŋgu yoomu wo le.” Mi Kaal tosa wallo o nyɛ o laalaŋndo choo le ndupila yɔŋgɔŋndo le wali lɔɔlɔɔ dimiaa yooŋgu kɛndɔɔ tosaa. O cho chaaŋaa nduaa dimullo nyɛ Mɛlɛka dimi le hunɔɔ tosaa o chilaŋ niŋndo, a teleŋ “wana o wana vi lɛ” niŋ te wo.

Kɛlɛŋgaa ma dimi aa, ‘I laalaŋ a keŋ te!’ Kɛ ŋ yaasiaŋndɔ tamaselii po ndoo nɔ diolaŋ aa, Choobu wo. Mi ndoo naa lakalu tei. (Choobu 2:​7) Mi che bɛɛ naa Choobu ndoo yeema piɔmndo, ndoo nɔ wɔ tiindaŋndo maa Mɛlɛka nɔ kpaayaa le ndu miŋgioo yoomu o chieeŋndo choo. Mi Choobu dimi a tiindaŋndo aa, “Oo Mɛlɛka, o bɛnda bɔɔ ma kɔ vioŋ ya o Sɛiyo niŋ mi wa loŋ. . . . A cho ya veelu okoŋ mi chɛl num diom. Nduyɛ a nɔ niŋ yeemɛi le chɔɔ vɛlɛ waŋchieeyaa ŋ toosiaa wa kpou yoomu.” (Choobu14:​13, 15, NW) Choobu ndoo nɔ tiindaŋndo maa Mɛlɛka nɔ yeemɛi le ndu miŋgioo yoomu.

Mɛlɛka cho suŋ keŋ tosa le Choobu vɛlɛ a wanaa bɔɔbɔɔ vi wa.Nduyɛ a teleŋ o cho chieeŋndo siiŋguu kpele hɛnɛkiɔɔ wo o cho keŋ tosa ni. (Luku 23:​42, 43, NW) Baabuiyo dimi o Walta Wanaa Chiisuaa 24:​15 niŋ aa, “Wana o wana vi, a cho vɛlɛ miiŋgu yoomu.” Nduyɛ mi Chiisu ke naa tiindaŋndo aa, “Kɔndɔfili bii nya le nyɛ ya I cho nya dimullo wo le. Ndu cho ni, maa teleŋ cho fuuluu mi wanaa vilɛiya kpou [o sɛila loonaŋndaŋ niŋ, NW] a tuei diom ndɔɔ o koŋ, ma fula o sɛilaŋ niŋ.” (Chɔŋ 5:​28, 29) Choobu cho hunɔɔ chɔ nyɛ Mɛlɛka dimi hoo wo o peelɔŋndo. O nɔ tiindaŋndo le “mbo miiŋgu o dialuŋ ndɔɔŋ niŋ maa paandu” nduyɛ mbo “miiŋgu vɛlɛ kpeŋgbeleŋ mɛɛ o wa o chuaambɔyɛi nduɛi niŋ yɛ.” (Choobu 33:​24, 25) Nyɛpilɛ koŋ kpe cho yɔŋnɔŋ wanaa cho balika melaa chɔmndo le nyɛiyii Mɛlɛka tuinuŋ niŋ waŋvilɛiya le nda miŋgioo yoomu o chieeŋndo choo wo ni.

Te o yɔŋ pɛ mi piɔm wana ŋ kaala wo saaŋgiaa num paandu, sɔɔŋ naŋ yaasiaa muŋ ndoŋ nɔla miŋ faŋa mɔnɛi ŋ cho biyɔɔ ve kpou le. Kɛ te a wa pɛ yiyaŋndo o sɔɔŋ Mɛlɛka dimi le tosaa o Baabuiyo niŋndoŋ choo, a nɔla ma saaluŋ tiindaŋ kpeekpeiyo, nduyɛ ma sɔla yoomuaŋ le biuwɔŋndo.—Tɛsaloniaŋ Tasoo 4:​13.

A yeema ma chɔɔlu pɛɛku a mɛɛ ŋ looku ma biunuŋ mɔnɛi yɛ? Ɔɔ a nɔ pa nyunala cheleŋ a hei okɔɔ mɛɛ hoo cho naa yɛ, “Le yɛɛ Mɛlɛka chɛllɛ dɛnɛ wɔɔŋndo a nyɛpalaa?” Yandii, kɔ o tɛɛŋgii nɛi jw.org, le ma che mɛɛ Baabuiyo ke naa mulila kɔl dɛɛniaalaŋ yɛ.