နကသ့ၣ်နီၣ်ဘၣ်က့ၤ က့လ်အဂ့ၢ်လၢ ဘၣ်တၢ်တဲဖျါထီၣ်အီၤလၢ လံာ်ကဘျံးပၤလၢအမဲာ်ညါတဖၣ်အပူၤန့ၣ်လီၤ. မ့ၢ်လၢအဝၤ ရီးဘ် သံအဃိ အဝဲဆိကမိၣ်ဝဲလၢ အသးမုာ်ထီၣ်က့ၤတသ့လၢၤဘၣ်. ဘၣ်ဆၣ် အဝဲဆၢထံၣ်ဘၣ်က့ၤအဝၤလၢ ဟီၣ်ခိၣ်ပၤရဒံစူးအပူၤလီၤ. အဝဲစံးဝဲလၢ “လံာ်စီဆှံတဆၢလၢ ယဘၣ်သူၣ်ဘၣ်သးအီၤ အဒိၣ်ကတၢၢ်န့ၣ်မ့ၢ်ဝဲ လီၣ်ဖျါ ၂၁:၃, ၄ န့ၣ်လီၤ.” ပဖးဘၣ်အီၤဒ်အံၤ “ကစၢ်ကအိၣ်ဝဲဆိးဝဲဒီးအီၤ. . . ဒီးယွၤကထွါကွံာ်အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်, အဂ့ၢ်ဒ်အံၤ တၢ်အိၣ်လၢအခီၣ်ထံးတဖၣ်ပူၤကွံာ်လံ.”

က့လ် စံးဝဲလၢ– “တၢ်အၢၣ်လီၤအီလီၤအဝဲအံၤ မၤမုာ်ထီၣ်ယသးဒိၣ်မးလီၤ. ဘၣ်ဆၣ် ပှၤလၢအသးဘၣ်ဖှီၣ်လၢ ပှၤလၢအအဲၣ်ဘၣ်ဝဲတဖၣ်သံအဃိ ဒီးတသ့ၣ်ညါစ့ၢ်ကီး တၢ်မုၢ်လၢ်လၢ ပှၤသံသ့ၣ်တဖၣ်အဂီၢ်န့ၣ် ယသးကညီၤ အဝဲသ့ၣ်လီၤ.” က့လ်အိၣ်မူမၤထွဲဒ် အတၢ်စူၢ်တၢ်နာ် ခီဖျိမၤဝဲပှၤစိာ်တၢ်သးခုကစီၣ်လၢ ဆၢကတီၢ်လၢပှဲၤလီၤ. ဒီးမ့ၢ်လၢအဝဲတဲဘၣ်ပှၤဂၤလၢ ယွၤအတၢ်အၢၣ်လီၤ မုၢ်ကအိၣ်ဝဲတနံၤလၢ “တၢ်သံတအိၣ်လၢၤဘၣ်” အဃိန့ၣ်လီၤ.

ဘၣ်သ့ၣ်သ့ၣ် နကစံးလၢ ‘ကစၢ်ယွၤ အတၢ်အၢၣ်လီၤအီလီၤအံၤ ကဲထီၣ်အသးတသ့ဘၣ်.’ ဘၣ်ဆၣ် ဆိကမိၣ်ကွၢ် စီၤယိၤဘးအဂ့ၢ်န့ၣ်တက့ၢ်. အဝဲဆိးက့ နးနးကလဲာ်လီၤ. (ယိၤဘး ၂:၇) ခီဖျိလၢအဆိးက့အဃိ စီၤယိၤဘးအဲၣ်ဒိးသံဝဲဒၣ်န့ၣ်လီၤ. ဘၣ်ဆၣ် အဝဲနာ်ဒံးဝဲလၢ ယွၤအိၣ်ဒီးတၢ်စိတၢ်ကမီၤ လၢကမၤသမူထီၣ်က့ၤအီၤ လၢဟီၣ်ခိၣ်ချၢန့ၣ်လီၤ. အဝဲစံးဝဲလၢ “အိ, မ်နပာ်တဒၢယၤလၢပျုၤပူၤ. . .ကိးထီၣ်တက့ၢ်, ဒီးယကစံးဆၢနၤလီၤ. မ်နသးအိၣ် တၢ်လၢနစုတ့အီၤတက့ၢ်.” (ယိၤဘး ၁၄:၁၃, ၁၅) စီၤယိၤဘးနာ်ဝဲလၢ ယွၤသးအိၣ်အီၤ ဒီးကအဲၣ်ဒိးမၤသမူထီၣ်က့ၤအီၤလီၤ.

တယံာ်လၢၤဘၣ် ဖဲဟီၣ်ခိၣ်အံၤကဲထီၣ် ပၤရဒံစူးအခါ ကစၢ်ယွၤကမၤသမူထီၣ်က့ၤ စီၤယိၤဘး ဒီးပှၤလၢအကကွဲၢ်တဖၣ်န့ၣ်လီၤ. (လူၤကၣ် ၂၃:၄၂, ၄၃) မၤတၢ် ၂၄:၁၅ ပာ်ဖျါထီၣ်ဝဲလၢပှၤသံသ့ၣ်တဖၣ် “ကဂဲၤဆၢထၢၣ်က့ၤ” ဝဲလီၤ. ယ့ၣ်ၡူးစံးဝဲလၢ “သုတကမၢကမၣ်လၢတၢ်အံၤအဃိတဂ့ၤ. အဆၢကတီၢ်ဟဲဝဲလၢ ကယဲၢ်ပှၤအိၣ်လၢတၢ်သွၣ်ခိၣ်အပူၤ ခဲလၢာ်န့ၣ် ကနၢ်ဟူအကလုၢ်သီၣ် ဒီးကဟဲက့ၤထီၣ်ဝဲ” လီၤ. (ယိၤဟၣ် ၅:၂၈, ၂၉) စီၤယိၤဘး ကထံၣ်ဘၣ်ဝဲလၢ တၢ်အၢၣ်လီၤအဝဲအံၤ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်လီၤ. တကးဒံးဘၣ် အဝဲအိၣ်ဒီးတၢ်မုၢ်လၢ်လၢအ “ကလီၤက့ၤဆူအဖိၣ်သၣ်ခွါအမုၢ်နံၤ” ဒီး “အဖံးအညၣ်ကဂ့ၤန့ၢ်ဖိသၣ် အဖံးအညၣ်” န့ၣ်လီၤ. (ယိၤဘး ၃၃:၂၄, ၂၅) ပှၤလၢအတူၢ်လိာ် ကစၢ်ယွၤအတၢ်ရဲၣ်တၢ်ကျဲၤ လၢအမ့ၢ်တၢ်ဂဲၤဆၢထၢၣ်သမူထီၣ်က့ၤ လၢဟီၣ်ခိၣ်ချၢတဖၣ်န့ၣ် ကဒိးန့ၢ်ဘၣ် တၢ်ဆိၣ်ဂ့ၤအံၤလီၤ.

နမ့မ့ၢ်ပှၤလၢ အိၣ်ဒီးတၢ်သးအုး ခီဖျိပှၤလၢနအဲၣ်ဘၣ်အီၤတဂၤ သံအဃိန့ၣ် တၢ်ဂ့ၢ်လၢပပာ်ဖျါထီၣ်တဖၣ်အံၤ တမ့ၢ်လၢအကမၤဟါမၢ်ကွံာ် နတၢ်သူၣ်အုးသးအုးခဲလၢာ်ဘၣ်. ဘၣ်ဆၣ် ခီဖျိလၢနဆိကမိၣ်ထံ ကစၢ်ယွၤအတၢ်စံးပာ်လၢ လံာ်စီဆှံပူၤအဃိ နကအိၣ်ဒီးတၢ်မုၢ်လၢ်ဒီးတၢ်ဂံၢ်တၢ်ဘါလၢ နတၢ်အိၣ်မူ ခါဆူညါအဂီၢ်လီၤ.—၁ သ့းစၤလနံ ၄:၁၃.

မ့ၢ်နအဲၣ်ဒိးသ့ၣ်ညါအါထီၣ် ဘၣ်ဃးဒီး ပလဲၤခီဖျိ တၢ်သူၣ်အုးသးအုးသ့လၢကျဲဒ်လဲၣ်အဂ့ၢ်န့ၣ်ဧါ. မ့ၢ်နအိၣ်ဒီးတၢ်သံကွၢ်တဖၣ် ဒ်သိးဒီး “ဘၣ်မနုၤအဃိ ကစၢ်ယွၤပျဲ တၢ်နးတၢ်ဖှီၣ်ဒီး တၢ်အၢတၢ်သီလဲၣ်” န့ၣ်ဧါ. ဝံသးစူၤနုာ်လီၤကွၢ် ပပှာ်ယဲၤသန့ jw.org/ksw, ဒ်သိးနကသ့ၣ်ညါဘၣ် တၢ်စံးဆၢလၢ ကမၤမုာ်ထီၣ်က့ၤနသးန့ၣ်တက့ၢ်.