Pamo muchili nakwanuka Gail uze twavulukanga muchihande chamuchivali, uze ahuhwasanyine numba nge mwakecha kulishona lunga lyenyi Robert. Oloze ou pwevo atalilila kukamona cheka lunga lyenyi mukaye kakahya kaze atushika Kalunga. Ambile ngwenyi, “Chisoneka ngwazanga chikuma shina chaKusoloka 21:3, 4.” Chamba ngwacho: “Ivene Kalunga mwakapwanga navakiko hamwe. Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”

Gail ambile ngwenyi: “Lushiko kana lweji kunguvendejekanga. Ngweji kwivwilanga keke vatu vaze vafwisa vatu javo vazanga, vaze kavatachikiza ngwavo navakavamona chekako.” Gail apwa muka-kwambulula washimbu yosena, kaha eji kwambulilangako vakwavo vyuma afwelela vize atushika Kalunga ngwenyi “kufwa kacheshi kukapwako chekako.”

Pamo munahase kwamba ngwenu, ‘Chuma kana kacheshi kukalingiwako.’ Oloze achitalenu chakutalilaho chaYopa uze avijile chikuma. (Yopa 2:7) Numba tuhu Yopa ashinganyekele ngwenyi atelele kufwa, oloze afwelelele ngwenyi Kalunga akwechi ngolo jakumusangula nakuyoya cheka. Ambile ngwenyi: “Nachiwaha nge mungusweka muFuka . . . Naukasanyika, kaha nangukakwitava. Naukafwila milimo yamavoko ove.” (Yopa 14:13, 15) Yopa afwelelele ngwenyi Kalunga mwamwanukanga nakufwila kumusangula.

Kalinwomu Kalunga asangule Yopa navatu veka vavavulu vaze vafwa omu mwalumuna mavu kupwa palachise. (Luka 23:42, 43) Mukanda waVilinga 24:15 wamba ngwawo: “Nakukapwa kusanguka.” Yesu atufwelelesa ngwenyi: “Kanda kulikomokela hali echiko, mwomwo ola yili nakwiza omu vosena vaze vali muvimbumbe navakevwa lizu lyenyi nakulovokamo.” (Yowano 5:28, 29) Lushiko kana nalukatesamo hali Yopa. Mwakakinduluka ‘kuukweze,’ kaha nyama yenyi nayikapwanga lika “yayivwovu kuhambakana muze apwile haukweze wenyi.” (Yopa 33:24, 25) Omu mukiko nachikapwa nakuli vatu vosena vaze vafwelela ngwavo Kalunga mwakavasangula nakutwama hano hamavu.

Nge nayenu mwafwisaho lyehi mutu mwazanga, pamo vishina vino tunashimutwila kavyeshi kuhasa kukumisa ushona wenu wosenako. Oloze kushinganyekanga hajishiko jaKalunga jamuMbimbiliya nachimikafwa mupwenga nalutalililo lwamwenemwene nangolo jakumikafwa mumike nge muli nakulishona.—Wavaka-Tesolonyika 1, 4:13.

Kutala muli nakusaka kutachikiza vyuma vikwavo vyakumikafwa mumike nge muli nakulishona tahi? Nyi pamo mweji kuhulisanga vihula vyeka vyakufwana nge chino: “Mwomwo ika Kalunga etavishila upi nakuyanda?” Yenunga hakeyala yetu ya jw.org, mumone omwo Mbimbiliya yinahase kumivendejeka hakukumbulula vihula vyenu.