E sula mosekalo e gasedni, e wawuoyo e wi dhako moro ma nyinge Gail ma ne nigi kiawa kabe obiro neno jaode ma notho miluongo ni Robert. Sani Gail geno neno Robert kendo e piny manyien ma Nyasaye osingo. Owacho niya: “Ndiko ma aheroga ahinya e Muma en Fweny 21:3, 4.” Ndikono wacho kama: “Mi Nyasaye owuon nobed kodgi. Kendo obiro yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.”

Gail wacho niya: “Singono jiwa ahinya. Awinjoga malit ahinya sama ng’ato olalo ng’ate e tho to ok ong’eyo ni Muma singo ni obiro neno ng’ateno kendo.” Gail osechiwore puonjo jomoko e thuolone duto weche ma Nyasaye osingo ni e kinde ma biro “tho ok nobedie kendo.”

Inyalo wacho ni, ‘Mano ok nyalre!’ Kata kamano, parie ranyisi mar Ayub. Tuwo malit nogoye. (Ayub 2:7) Kata obedo ni Ayub ne gombo ni mondo otho, pod ne en gi yie ni Nyasaye ne nyalo miyo obed mangima kendo e pinyka. Nowacho ka en gi geno kama: “Mad ipandae e liel . . . Diluong nyinga eka daduoki wach: chunyi doher tich mar lueti.” (Ayub 14:13, 15) Ayub ne ni gadier ni Nyasaye ohero tij lwete kendo nodhi miyo ochak obed mangima.

Machiegnini, Nyasaye biro timo mano ne Ayub kod jo mamoko mang’eny e kinde ma ibiro lok pinyni obed paradiso. (Luka 23:42, 43) Muma wacho kama e Tich Joote 24:15: “Chier nobedie.” Yesu nosingonwa kama: “Kik uwuor wachni nikech sa biro ma ji duto manie liete nowinj dwonde mi giniwuog oko.” (Johana 5:28, 29) Ayub biro neno ka singono chopo kare. Kendo obiro neno ka ‘dende bedo mapoth moloyo dend nyathi,’ kendo ka tekone siko kaka mar “rawera.” (Ayub 33:24, 25) Mano bende e gima biro timore ne joma nigi yie kuom geno majaber mar chier ma Nyasaye osingo. Obiro chierogi mondo gidag e piny kae.

Weche ma wasewuoyoegi ok nyal goloni kuyo chuth kapo ni iselalo ng’at migeno e tho. Kata kamano, kiparo matut kuom singo mag Nyasaye manie Muma, gibiro konyi bedo gi geno kod teko mar nyagruok gi kuyo.—1 Jo-Thesalonika 4:13.

Be diher yudo weche momedore kuom kaka inyalo nyagori gi kuyo sama ilalo ng’ato migeno e tho? Koso dibed ni in gi penjo mamoko kaka, “Ang’o momiyo Nyasaye oweyo dhano mondo ochandre?” Dhi e websaitwa mar jw.org/luo, mondo ine kaka Muma chiwo dwoko mahoyo chuny kendo makonyo.