Je Gail, xi jesa kinikʼaxkiaa ya kjoaʼmiya xi majaoni, kʼoasʼin síkjaʼaitsjen nga tsín cha̱jinle xʼinle. Tonga koyale nichxin nga skoe̱ ijngokʼani xʼinle ya sonʼnde chjotse xi tso Niná nga tsjoá. Je Gail itso: “Je testo xi nʼio tsjoake̱ kui Apocalipsis 21:3, 4”. Testo jebi itso: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato”.

Je Gail itsosa: “Je én jebi tsjoá kjoachoya. Mamana je ʼndíchjota xi xínkjín kʼien kʼoa xi tsín be je kjoachoya xi tsʼe kjoafaʼáya”. Nga ñaki makjainle je Gail je kjoachoya jebi kuinga fákaonajmíni je chjotandaindʼiale tʼatsʼe kjoachoya xi tjínle nga tsín tisʼe̱ni kjoabiya nichxin xi nroaján.

Tsakui nichxin kʼoasʼin nikjaʼaitsjain nga tsínkʼia kʼoakoa̱n. Si̱kjaʼaitsjenla je choa̱le Job xi nʼio tse chʼin kiskatʼale (Job 2:7). Ninga kʼoakitso je Job nga mele kuiyá tonga bení nga Niná koaanle sikjaʼáyale nga kʼoéjnakon ijngokʼani i̱ Sonʼnde. Kuinga i̱ kitsoni: “Tongisajin nda tsa yala Tsjó si̱kʼéjnaʼmanái [...]. Kuinókjoaní kʼoa kjuinrʼoele. Nʼio si̱metokuin jmeni xi kisinda ndsai” (Job 14:13, 15). Tojosʼin tiʼyaa, je Job alikui jao kisʼele nga mele Niná sikjaʼáyanile.

Je Jeobá jeme sikjaʼáyale je Job kʼoa miyón mani chjota xi kʼoati sikjaʼáyale, kʼoa ʼndenaxó sikao jngo tjíjtsa Sonʼnde (Lucas 23:42, 43, TNM). Ya Biblia kʼoatso nga je kʼien kjoaʼáyanile (Hechos 24:15). Je Jesús i̱ kitso: “Ali maxkónjinno jebi. Kjoaʼaí ora kʼia nga je ngatsʼi xi tjío ya nyʼoákʼen kjuinrʼoéle jta̱le kʼoa kuitjoni” (Juan 5:28, 29). Je Job skoee nga kuitjoson én jebi. Kʼoa koa̱nxtiya ijngokʼani kʼoa je yaole ñaki kʼoasʼe̱ ijngokʼani jokji nga sʼa xti (Job 33:24, 25). Kʼoa kʼoati koa̱n je chjota xi sʼe̱le kjoamakjain nga kjoaʼáyanile je chjota i̱ Sonʼnde.

Jmeni xi kaʼyaa ibi alikui kjoaʼaxinli kjoaba xi tijnajin kʼiatsa jekʼien jngo xíngi. Tonga je én xi faʼaitʼa Biblia koasenkaoli nga sʼe̱li kjoachoya kʼoa tsjoánganʼioli nga tosi tonda ska̱li (1 Tesalonicenses 4:13).

A mesali jchai jmesani xi koasenkaoli nga ska̱li je kjoaba xi tijnajin. Tsakui nichxin sakʼoa chjonangilai yaoli ánni nga tsjoáʼndeni Niná nga kjoatsʼen tjín kʼoa nga chjaʼatokoán. Tsa meli jchai xi tʼatsʼe jebi koaan kuitjásʼain ya Internet ya www.pr418.com kʼoa yaa koa̱nsjaili kjoafaʼaitsjen xi Biblia yʼangini xi koasenkaoli kʼoa xi tsjoánganʼioli.