Hamo mwanuka ngweni va Gail vatunavangele kwendeka ku maputukilo a ino mangazini vendekele ngwavo yanini ndi tangwa vakevala kuthsa kwa munalume wavo. Oloni vali na lilavelelo lya kukamona va Rob mu kaye kakaha kanatukulahetha Njambi. Va Gail ngwavo: “Njashaka manene mukanda wa Kujombolola 21:3, 4.” Ou mukanda ngwawo: “Njambi vavenya akakala amo navo . . . Akathikumuna mithothzi yoshe ku mesho avo. Cho kukukakala kuthsa nambe vuthiwa nambe kulila nambe kukemanga. Omwo vyuma vya laja vineti.”

Va Gail ngwavo: “Ou mukanda unendeka vyoshe. Njikathzivi ngothzi ha kuthinganyeka vanu vaje vanathsitha vanu vavathzema oloni kuvethi na lilavelelo lya kukamona vanu vavathzema lalo.” Va Gail vali na kuyoya mu ngila ije inalitombola na likulahelo lyavo. Vanalyana kupwa muka-kwambulula wa thimbu yoshe, cho vakalekeko vakwavo ngwavo Njambi nakulahetha ngwendi kulutwe “kukukakala kuthsa” lalo.

Munatha kuthinganyeka ngweni ‘vanu kuvakathanguka.’ Oloni anukeni Yombi. Wavinjile manene. (Yombi 2:7) Nameme Yombi washakele ngwendi athse lika, oloni wakulahelele ngwendi Njambi ali na ndthzili ya kukamuthangula na kukayoya hano hathi lalo. Wendekele mu kukulahela ngwendi: “Nga unatavele kunjishweka mu lifuti lya vathsi [mbumbo] . . . Ukanjithana, cho njikakutava. Cho nove ukashaka kutumbama nange, munu uje iwatangele.” (Yombi 14:13, 15) Yombi wakulahelele ngwendi Njambi yendi wamuthzemene, cho akamuthangula.

Ololo Njambi akathangula Yombi na vakwavo vavangi omwo akatengulula hathi hoshe hapwe palandaisi. (Luka 23:42, 43) Ku Vilinga 24:15, Mbimbiliya ngwayo “vanu voshe . . . Vakathanguka ku Vathsi.” Yesu nendi natukulahetha ngwendi: “Kethi mukomoke ha chuma echi. Omwo thimbu ili na kwija omwo vathsi voshe vakathziva lijwi lyendi, cho vakatuhuka mu vimbumbo vyavo.” (Yowano 5:28, 29) Yombi akalimwena muvakashulithilila echi chikulahetho. Akakala na thimbu ya kunyunga muvila wa “vukwenje vwendi” mangana ukatwaleleleho ‘kuvwaha kutuvakana uje wa vwanike.’ (Yombi 33:24, 25) Echi chikecho chikalingiwa kuli voshe vaje vali na likulahelo mu chikulahetho cha Njambi cha kukathangula vanu.

Nga neni muli mu vuthiwa vwa kuthsitha munu imwathzema manene, kutulumbununa ngwetu vithimpi vitunathimutwiya vivumanetha vwoshe embwe. Oloni omwo muthinganyeka ha vikulahetho vya Njambi vili mu Mbimbiliya, cho mukala na lilavelelo lya vuthunga na ndthzili ya kutwalelelaho kutakama.—1 Tesalonika 4:13.

Mushaka mithzimbu ikwavo ije imwetha mwakulifwitila na vuthiwa ndi? Indi hamo neni mukalihula vihula vyakulifwa nechi: “Mwafwa vika Njambi nechelela vuvi na tuyando?” Yeni ha wembusaiti yetu ya jw.org mangana mumone vikumbululo vya mu Mbimbiliya vije vyatha kumithzembeleka.