Uelis tikilnamiki Gail, katli tikijtojkej ipan tlamachtili ome tlen ni pilamochtsi. Ya moiljuia nochipa mokuesojtos uan kitemojtos iueue Rob. Tlauel kineki kiitas iueue ipan Xochimili kej toTeotsij kitenkajtok. Gail kiijtoua: “Tlauel nechpaktia tlen kiijtoua Apocalipsis [Revelación] 21:3, 4, nopaya kiijtoua: ‘ToTeko iselti itstos ininuaya keja ininTeko. Uan toTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli’”.

Gail nojua kiijtoua: “Xitlauak kiijtoua tlake panos ika mijkatsitsij. Nechyolkokoua kema nikinita maseualmej mokuesojtokej pampa mijki se akajya uan amo kimatij tlaj mijkatsitsij uelis moyolkuisej”. Gail nelia kineltoka moyolkuisej katli miktokej, yeka tlauel tlajtolmoyaua uan kiniljuia maseualmej teipa “ayok kema aki mikis”.

Uelis timoiljuia amo nelia moyolkuisej. Tlaj kiampa timoiljuia, xikilnamiki tlen kipanok Job, katli tlauel mokokok (Job 2:7). Maske kinekiyaya mikis, motemachiyaya toTeotsij ueliskia kiyolkuis uan sampa itstos ipan Tlaltipaktli. Yeka kiijtok: “Kuali eliskia intla tinechtlatiskia ipan nopa ueyi ostotl kampa itstokej mijkatsitsij [...]. Intla ta tinechnotsaskia, na niaskia. Uan ta tinechseliskia ika miak tlaiknelijkayotl pampa tinechchijchijki ika moma” (Job 14:13, 15). Tlen kiijtok kinextia kimatiyaya toTeotsij kinekiskia kiyolkuis.

ToTeotsij nechka kiyolkuis Job ininuaya miakej maseualmej kema kichiuas ni Tlaltipaktli se xochimili (Luc. 23:42, 43). Biblia kiijtoua toTeotsij kinyolkuis maseualmej (Hech. 24:15). Jesús nojkia kiijtok: “Amo xinechsentlachilikaj ika tlen niinmechiljuia. Asis se tonali nojkia kema nochi tlakamej tlen miktokej uan tlen kintlalpachojtokej, nechkakisej uan pankisasej” (Juan 5:28, 29). Job kiitas kema moaxitis ni tlajtoli uan “uajka itlakayo” mochiuas “keja se konetl itlakayo. Kipias chikaualistli keja se telpokatl” (Job 33:24, 25). Kiampa itstosej nochi katli motemachiaj toTeotsij nelia kinyolkuis mijkatsitsij.

Tlaj mijki se tlen mochampoyouaj o se kuali mouampo, tlen tikixtontokej uelis mitspaleuis. Maske amo kichiuas ayokmo ximokueso, tlaj timoyoliljuis ipan tlen Biblia kiijtoua, timotemachis nelia moyolkuisej mijkatsitsij uan nopa mitspaleuis amo tlauel ximokueso (1 Tes. 4:13).

¿Tijnekiskia tijmatis tlake nojua uelis tijchiuas uan kiampa ayokmo tlauel timokuesos? ¿O timotlajtlania kenke toTeotsij kikaua ma pano tlen amo kuali uan ma titlaijiyouikaj? Uajka xikita ipan Internet jw.org, nopaya tikitas kenijkatsa Biblia kinankilia ni tlajtlanili uan tlen tijpouas tlauel mitspaleuis.