Te lö olifu’ö zotöi Gail si no mututunö moroi furi. Aombö dödönia hadia tola itayaigö wa’abu dödönia börö me no mate wo’omonia. Hewa’ae simanö, omasi ia falukha khö Rob ba gulidanö si bohou nifabu’u Lowalangi. Imane, ”Ayati somasido sibai ya’ia da’ö Fama’ele’ö 21:3, 4.” No tesura ba da’ö, ”Ba ya’ia, Lowalangi, ba awöra, ba i’osi dania daŵa hörö fefu, ba höröra, ba lö fa’amate sa’ae, ba lö fa’abu dödö, ba lö fege-ege, ba lö fa’afökhö sa’ae, me no numalö zi föföna andrö.”

Imane Gail, ”Omuso dödögu ba nifabu’u andre. Ahakhö dödögu niha si no göna fangabu dödö börö me no mate niha ni’omasi’öra, hiza’i, lö khöra fa’aboto ba dödö wa so dötönafö ba niha si no mate ba tola ifuli falukha ira.” Ifaudugö gamuatania Gail ba zi no ifaduhusi tödö, ba ibe’e ginötönia ba wangai halöwö fanuriaigö safönu inötö ba wanolo niha sanandrösa ba zi no ifabu’u Lowalangi ba zi so föna wa ”lö fa’amate sa’ae”.

Te ömane tödöu ’lö faduhu dödögu!’ Hiza’i, faigi atö duma-duma sotöi Yobi. No irai göna ia fökhö sabölö-bölö. (Yobi 2:7) Itötöna Yobi ena’ö mate ia, hiza’i mamati ia ba wa’abölö Lowalangi wa tola isusugi niha si no mate ba gulidanö. Si fao fa’afaduhu dödö imane, ”Ena’ö na ba mbanua tou öbini’ö ndra’o . . . Ba mu’ao ena’ö ndra’ugö, ba utema liu; humulu ena’ö dödöu ba gomböila dangau andre.” (Yobi 14:13, 15) Faduhu dödö Yobi wa omasi sibai Lowalangi khönia hegöi ba wangorifi ya’ia zui.

Lö aratö ifalua zimane da’ö Lowalangi ba ginötö ibali’ö faradaiso gulidanö andre, he khö Yobi hegöi ba niha tanö bö’ö si tebai mu’erai wa’ato. (Luka 23:42, 43) Imane ba Halöwö Zinenge 24:15, ”So wemaoso zi mate.” Ifaduhu’ö khöda Yesu göi, ”Böi ahöli-höli dödömi ba da’ö! Irugi baŵa dania, ba larongo linia dozi si so ba lewatö. Ba möi ira yawa.” (Yohane 5:28, 29) Aboto ba dödö Yobi wa alua zi no mufabu’u andrö. Tola mangawuli ia ba ’götö wa’ono matuania’ ba ”abe’e nösinia, timba nono matua”. (Yobi 33:24, 25) Simanö göi niha so’ame’egö tödö wa’omasi Lowalangi tesusugi ira ba gulidanö andre.

Na no irai göna’ö fa’abu dödö börö me mate niha ni’omasi’öu, te ambö terara dödöu ba zi no tafatunö andre. Hiza’i, na ö’angerönusi fefu zi no ifabu’u Lowalangi ba Zura Ni’amoni’ö, tola ösöndra wanötöna ba fa’abölö ena’ö anau gölöu.​—I Tesalonika 4:13.

Hadia omasi’ö öfaha’ö ndra’ugö nasa sanandrösa ba wanaögö abula dödö börö wa’amate? Mazui hadia no irai manofu’ö ”Hana wa itehegö Lowalangi wa’alösökhi ba famakao?” Tola öbokai situs Web, jw.org/nia ba wamaigi hadia wondrara dödö moroi ba Zura Ni’amoni’ö hegöi fanema li si tefaudu.