O ka ba o gopola gore Gail, yo go boletšwego ka yena pejana dihlogong tše, o be a ipotšiša ge e ba a tla ka a tsoga a amogetše gore monna wa gagwe e lego Rob o hlokofetše. Lega go le bjalo, o fela pelo ya go tlo mmona gape lefaseng le lefsa leo Modimo a re holofeditšego lona. O re: “Lengwalo leo ke le ratago kudu ke la Kutollo 21:3, 4.” Lona le balega ka gore: “Modimo ka noši o tla ba le bona. O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”

Gail o re: “Kholofetšo ye e a kgahliša. Ke kwešwa bohloko ke batho bao ba hwetšwego ke batho bao ba ba ratago eupša ba sa tsebe ka kholofelo ye ya gore bahu ba tlo tsoga.” Gail o phela ka go dumelelana le ditumelo tša gagwe ka go ruta batho Beibele ka nako e tletšego, a botša batho ba bangwe ka kholofetšo ya Modimo ya gore “lehu le ka se hlwe le sa ba gona.”

Mohlomongwe o re: ‘Seo ga se kgonege!’ Eupša nagana ka mohlala wa monna yo a bitšwago Jobo. O ile a babja kudu. (Jobo 2:7) Le ge Jobo a be a duma go hwa, o be a sa dumela gore Modimo o na le matla a go mo tsoša bahung gomme a phela mo lefaseng. O ile a re: “A mola o ka be o nkuta Bodulabahu . . . O tla bitša, gomme nna ke tla go araba. O tla hlologela modiro wa diatla tša gago.” (Jobo 14:13, 15) Jobo o be a kgodišegile gore Modimo wa gagwe o be a tla mo gopola gomme a mo tsošetša bophelong.

Kgauswinyane, ge Modimo a fetoša lefase le gore e be paradeise, o tla tsoša Jobo bahung le batho ba bangwe ba bantši. (Luka 23:42, 43) Beibele go Ditiro 24:15 e tiišetša seo ka gore: “Go tla ba le tsogo.” Jesu o re kgonthišetša ka gore: “Le se ke la makatšwa ke se, gobane nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa.” (Johane 5:28, 29) Jobo o tlo bona ge kholofetšo yeo e phethega. O tla ba le kholofelo ya go boelwa ke “matla a bofseng bja gagwe,” gomme nama ya gagwe e tla dula e le e “nanana go feta bofseng” ka mo go sa felego. (Jobo 33:24, 25) Batho ka moka bao ba bontšhago tebogo tokišetšong e lerato ya Modimo ya go tsošetša batho bophelong mo lefaseng, ba tla diragalelwa ke se se swanago.

Ge e ba o hwetšwe ke motho yo o mo ratago, tsebišo yeo re e ahlaahlilego e ka no se tloše manyami a gago ka mo go feletšego. Eupša ge o naganišiša ka dikholofetšo tša Modimo tšeo di hwetšwago ka Beibeleng, o ka ba le kholofelo ya kgonthe le matla a go tšwela pele ka bophelo.​—1 Bathesalonika 4:13.

Na o ka rata go ithuta ka mo go oketšegilego mabapi le kamoo o ka swaraganago le manyami a go hwelwa? Goba na o na le dipotšišo tšeo di sepedišanago le taba ye, tše bjalo ka e rego, “Ke ka baka la eng Modimo a dumelela bobe le tlaišego?” Hle eya Wepesaeteng ya rena ya jw.org/nso go bona kamoo Beibele e neago dikarabo tše homotšago le tše holago.