Ove uhinangela okuti Gail wapopiwa mononthele mbotete, ankho ketyii inkha metyivili okukoleleya oluihamo wononkhia mbomulume wae Rob. Mahi, pahe ukevelela omuvo mavekelivasa vali nae mouye omupe Huku alaa. Gail wati: “Otestu ndyihole unene, oya Revelação [Apocalipse] 21:3, 4.” Yati: “Huku muene makakala navo. Huku makasekuna ononkhuka momaiho avo, ononkhia, nokulila, no nongembia kamavikakala-ko vali. Mokonda ovipuka ovio aviho mavikalamba.”

Gail wati: “Omulao oo upopia atyiho. Ame ndyina okankhenda novanthu vasiwa-po no vavo vehole unene, mahi vehei ekevelelo olio liokukelivasa vali navo.” Gail ukahi nokulinga etyi etavela mokueliava movilinga viokuivisa omuvo auho, opo apopile ovomunthele yae etyi Huku alaa komutwe okuti, “ononkhia kamambukakala-ko vali.”

Ove upondola okuti ‘otyo hityitavela!’ Mahi tala ongeleka yomulume utiwa o Job. Ankho wavela unene tyihena ekevelo liokuveluka. (Jó 2:7) Namphila Job ankho elipeleyila ononkhia, mahi ankho nkhele una ekolelo liokuti Huku upondola okumututilisa akala vali nomuenyo kombanda yohi. Nonthumbi wati: “Inkha watavelele vala, ñgeno wanthyoleka . . . Ove moihana, iya ame andyikutavela. Moivaluka ovilinga waundapa nomake ove.” (Jó 14:13, 15) Job ankho una onthumbi yokuti Huku yae memuivaluka iya emukondola vali komuenyo.

Apa katutu, Huku meketyilinga. Makapindula-po Job novanthu ovakuavo ovanyingi, tyina ohi ino yamapilululwa omphangu yombembwa. (Lucas 23:42, 43) Mu Atos 24:15, Ombimbiliya ipopia okuti: “Makukakala etutilo liovaviuki na vana vehevaviuki.” Jesus wetulaa nonthumbi okuti: “Etyi tyihemuhuvise, mokonda makuya omuvo aveho vekahi mehinangelo lia Huku mavekeiva ondaka yae, iya avatundu-mo, vana valinga ovipuka oviwa, pala etutilo liomuenyo, vana valinga ovipuka ovivi, pala etutilo liekoyeso.” (João 5:28, 29) Job makamona etyi omulao oo maufwisua-po. Makakala nekevelelo liokukala vali ‘no nonkhono mbae mbo poukuendye,’ iya olutu lwae malutuala-ko okukala “luatalala vali nawa tyipona pouna.” (Jó 33:24, 25) Tupu, Huku makalinga ngotyo aveho vana vetavela nokupanda okankhenda Huku etulingila, mokutuavela ekevelelo lietutilo kombanda yohi.

Inkha ove ukahi mononkhumbi mbokuankhisa wove uhole, onondaka tuapopia, mbupondola kamambukupolo oluihamo aluho una. Mahi, okusokolola nawa omilao via Huku vivasiwa mo Mbimbiliya, movasi ekevelelo lio tyotyili nepameko opo uhasoye.​—1 Tessalonicenses 4:13.

Okuti uhanda okunoñgonoka vali oñgeni mofindi omuihamo wokusiwa-po? Ine uhole okulipula okuti “Omokonda yatyi Huku ayekelela-ko ovivi no nonkhumbi?” Mbambavo, tala mo site yetu jw.org, opo utale oñgeni Ombimbiliya ituavela omakumbululo aungumanesa.