Bie a ɛbahakye kɛ Gail, mɔɔ yɛlimoa yɛha ɔ nwo edwɛkɛ la adwenle nu yɛle ye kesee kɛ saa ɔbahola yeagyinla ɔ hu, Rob ewule ne anloa a. Noko akee, ɔ nye la kɛ ɔbanwu ye bieko wɔ ewiade fofolɛ ne mɔɔ Nyamenle ɛbɔ nwolɛ ɛwɔkɛ la anu. Ɔka kɛ, “Ngɛlɛlera mɔɔ me nye die nwolɛ kpalɛ la a le Yekile 21:3, 4.” Ɔkenga kɛ: “Nyamenle mumua ne nee bɛ badɛnla. . . . Ɔbakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”

Gail ka kɛ: “Ɛwɔkɛ ɛhye tɛla biala. Medi bɛdabɛ mɔɔ bɛ kulovolɛ bie ɛwu noko bɛnze anyelazo ɛhye kɛ bɛbanwu bɛ bieko la anwo nyane.” Gail yɛ ye diedi ne anwo gyima ɔlua ɔ nwo mɔɔ yedu yemaa na ɔlɛfa ye mekɛ kɔsɔɔti yeaha edwɛkpa ne mɔɔ fale ɛwɔkɛ mɔɔ Nyamenle ɛbɔ kɛ kenle bie “ewule ɛnle ɛkɛ bieko” la yeahile ɔ gɔnwo mɔ.

Bie a ɛbaha kɛ, ‘Ɔnle nɔhalɛ!’ Noko suzu nrenyia bie mɔɔ bɛfɛlɛ ye Dwobu la neazo ne anwo. Ɛnee ɔnde kpɔkɛ fee. (Dwobu 2:7) Ɛnee Dwobu kulo kɛ ɔwu ɛdeɛ, noko ɛnee ɔlɛ diedi kɛ Nyamenle lɛ tumi, na ɔbahola yeadwazo ye yeara azɛlɛ ye azo. Ɔvale anwodozo ɔhanle kɛ: “Anrɛɛ wɔava me wɔavea ɛbolɔ, . . . Ɛbavɛlɛ, na mebalie wɔ zo; ɛ nwo balɔ ɛdawɔ ɛ sa anloa gyima.” (Dwobu 14:13, 15) Ɛnee Dwobu die di kɛ ye Nyamenle ne anwo balɔ ye yɛɛ ɔbahulo kɛ ɔbadwazo ye yeara ngoane nu.

Ɔnrɛhyɛ, Nyamenle bayɛ ye zɔ yeamaa Dwobu nee menli dɔɔnwo wɔ mekɛ mɔɔ azɛlɛ ɛhye bahakyi paladaese la. (Luku 23:42, 43) Baebolo ne ka ye wɔ Gyima ne 24:15 kɛ, ‘Menli badwazo ara ngoane nu.’ Gyisɛse hanle kɛ, “Bɛmmamaa ɛhye yɛ bɛ azibɛnwo; mekɛ ɛlɛba mɔɔ mɔwuamra amuala bade ɔ ne wɔ bɛ nla ne mɔ anu, na bɛvi bɛ nla ne mɔ anu bɛbavinde.” (Dwɔn 5:28, 29) Dwobu bava ɔ nye anwu kɛ ɛwɔkɛ ɛhye ɛra nu. Ɔbanyia “ye mgbavolɛ nu anwosesebɛ” ne bieko na ye nwonane ne ‘azia ayɛ kɛ ye mgbavolɛ’ nu ɛdeɛ ne dahuu. (Dwobu 33:24, 25) Bɛbayɛ zɔhane ala bɛamaa bɛdabɛ mɔɔ bɛkile anyezɔlɛ wɔ Nyamenle anwunvɔnezelɛ nziezielɛ ne mɔɔ fale azɛlɛ ye azo ewudwazo ne anwo la.

Saa wɔli nyane wɔ wɔ kulovolɛ bie ewule nwo a, edwɛkɛ mɔɔ yɛzuzu nwo la ɛnrɛye wɔ nyane ne ɛnrɛvi ɛkɛ ne bɔkɔɔ. Saa ɛdwenledwenle Nyamenle ɛwɔkɛ ne mɔ anwo a, ɛbanyia anyelazo nee anwosesebɛ mɔɔ baboa wɔ a.​—1 Tɛsalonaekama 4:13.

Ɛkulo kɛ ɛsukoa dɔɔnwo ɛfale kɛzi ɛbagyinla nyanelilɛ nloa la ɔ? Anzɛɛ ɛbahola wɔazuzu kpuya mɔɔ le kɛ “Duzu ati a Nyamenle maa ɛtaneyɛlɛ nee amaneɛnwunlɛ nwo adenle a?” Yɛsɛlɛ wɔ, kɔ yɛ wɛbsaete, jw.org ne azo na nwu kɛzi Baebolo ne maa yɛ arɛlekyekyelɛ nwo mualɛ kpalɛ la.