Cai revistapa página 4​pi Gail shuti huarmiguca paipa cusa Robert huañushcamanda ali sintirinata o nali sintirinataca na yachanllu. Shinapash paipa cusa causarinataca shuyajunmi. Gailca ninmi: “Ñucaca Apocalipsis 21:3, 4​tami ashtahuan alicachini. Chaipica nijunmi: ‘Taita Diosmi paicunapa ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami’ nishpa.

Gailca ninbashmi: “Cai textoca tucui ima pasanatami nijun. Ashtacacunaca huañushcacuna causarinataca na yachanllu. Paicunataca ninandami llaquinayan” nin. Gailca huañushcacuna cierto causarinata crimandami vecinocunamanga shamuj punllacunapi “huañuipash ñana tiangachu” nishpa villachin.

Na crinai shina cajpipash huañushcacunaca causaringami. Jobta yaripashun. Paica ungushcapachami carca (Job 2:7). Huañungapaj munashpapash Taita Dios cutin causachijpi cai Alpapi causanataca seguro cashpami nirca: ‘Huañushcacuna cana pushtupi pacajugri nishpachari ali canguiman. Chashna shuyajushpami can cayajpi tigrachisha. Chaipimi canba maquihuan rurashcataca ninanda ricungapaj munangui’ nishpa (Job 14:13, 15, NM). Imashinami ricunchi, Taita Dios causachinataca Jobca seguromi carca.

Cai Alpa shuj paraíso tucujpimi Taita Diosca Jobtapash, ashtaca millón gentecunatapash causachinga (Lucas 23:42, 43). Bibliapica ninmi: ‘Huañushcataca Taita Diosmi causachinga’ nishpa (Hechos 24:15). Jesuspash nircami: “Ñuca cashna nishcataca, na manllarinachu canguichi. Huañushpa pambai tucushcacunaca, tucuillami ñuca rimajta uyanga” nishpa (Juan 5:28, 29). Jobca causarishpami chai shimicuna pactarijtaca ricunga. Chai punllacunapimi Jobpa ‘cuerpoca, llullu huahuapa aichashna tucushpa chairalla viñai cashca punllacunaman tigranga’ (Job 33:24, 25). Huañushcacunata Taita Dios causachijpi cai Alpapi causanata crijcunapash Jobshnami bendiciai tucunga.

Shuj juyashca familia huañushca cajpica cai revistapi yachajushca yuyaicunaca quiquinba llaquicunataca na tucuchingachu. Shinapash Taita Diospa nishcacunata Bibliapi liishpami huañushcacuna causarinata crishpa ñaupaman catingapaj shinlli tucungui (1 Tesalonicenses 4:13).

¿Huañui tiajpi llaquicunata aguantangapaj imatalla ashtahuan ruranata yachangapaj munapanguimanllu? ¿Imamandata Taita Diosca nali ruraicuna, llaquicuna tiachun saquishca nishpa tapuripashcanguichu? Chaita yachangapaj munashpaca Internetpi jw.org paginamanmi yaicuna capangui. Chaipimi Bibliapa yuyaicunahuan alillata sintirichun ayudanga.