Panango musakumbuka kuti Gail, adalongwa nduli, akhapenula khala mbapidakwanisika kuna iye kukunda kutsukwala thangwi ya kufa kwa mamunace Robert. Mbwenye, iye asanyerezera ntsogolo toera kumuona pontho n’dziko ipswa idapikira Mulungu. Iye alonga: “Lemba isakomerwa na ine kakamwe ndi Apokalipse 21:3, 4.” Isalonga: ‘Mulungu anadzakhala pabodzi na anthu. Anthumbo anadzakhala mbumba ya Mulungu. Iye ene Mulungu anadzakhala pabodzi na anthu, mbapukuta misozi yonsene m’maso mwawo. Kufa hakunadzakhalapo pontho tayu, nee kutsukwala, nee kulira, nee nyatwa, thangwi pyakale pyamala.’

Gail alonga: “Pikiro iyi isalonga pyonsene. Ndisabvera ntsisi anthu adaluza munthu wakufunika akuti nkhabe dziwa cidikhiro cakuona pontho anyakufunika awo ntsogolo.” Gail asacita pinthu mwakubverana na pinakhulupira iye mukuperekeka ninga m’mwazi mphangwa wa ndzidzi onsene, mbalonga kuna anyakuendekana ace pya pikiro ya Mulungu ya ntsogolo mu ndzidzi wakuti ‘kufa hakunadzakhalapo pontho tayu.’

Panango munalonga: Pyenepi nkhabe citika! Mbwenye dingani citsandzo ca mamuna anacemerwa Yobe. Iye akhali na utenda wakugopswa kakamwe. (Yobe 2:7) Ngakhale Yobe akhanyerezera kuti mbadafa mbipidakhala pyadidi, iye apitiriza kukhulupira mphambvu ya Mulungu yakumulamusa toera kukhala pa dziko yapantsi. Iye alonga mwacinyindiro: ‘Mbamudandisiya pyanga na kundibisa n’nthumbi, imwembo munadzacemera, na ine ndinadzakutawirani. Munadzakhala na citsuwo ca basa ya manja anu.’ (Yobe 14:13, 15, NM) Yobe akhanyindira kuti Mulungu wace mbadantsuwa na kumulamusa muli akufa ntsogolo.

Mwakukhonda dembuka, Mulungu anacita pyenepi, kuna Yobe na kuna anthu azinji kakamwe, dziko ingacinjwa kudza paradhizu. (Luka 23:42, 43) Bhibhlya isalonga pa Machitiro 24:15: “Kunadzaoneka kulamuka muli akufa.” Yezu asatipasa cinyindiro: ‘Lekani kudzuma napyo thangwi unadzafika ndzidzi wakuti anthu onsene anagona n’nthumbi anadzabva mafala ace. Penepo iwo anadzalamukambo.’ (Jwau 5:28, 29) Yobe anadzaona kukwanirisika kwa pikiro ineyi. Iye ali na cidikhiro ca kukhala pontho na mphambvu ninga ikhali na iye ‘mu uphale,’ pontho manungo ace anadzakhala ‘ninga a m’phale’ kwenda na kwenda. (Yobe 33:24, 25) Pibodzi pyene pinadzacitikambo kuna ale onsene anapasa ntengo masasanyiro aufuni a Mulungu akulamusa anthu muli akufa toera akhale pa dziko yapantsi.

Khala musatsukwala thangwi ya kulowa kwa nyakufunika wanu, mphangwa zidadinga ife panango nee zinamalisiratu kutsukwala kwanu. Mbwenye munganyerezera mwacidikhodikho mapikiro a Bhibhlya, munakhala na cidikhiro candimomwene na mphambvu toera kupitiriza.​—1 Atesalonika 4:13.

Musafuna kudziwa mphangwa zakuthimizirika zinalonga pya kuthimbana na kutsukwala? Peno muli na mibvundzo yakulandana, ninga “Thangwi yanji Mulungu asasiya kuti uipi na pinentso picitike?” Taphata miyendo, pitani mu website yathu, jw.org toera kuona kuti Bhibhlya isapereka tani cibalangazo na matawiro akuphindulisa.