Gail lesike sakhuluma ngaye utsi akaboni kutsi uyoke akukhohlwe kufa kwendvodza yakhe Rob. Nanobe kunjalo, unelitsemba lekutsi utawuphindze ambone emhlabeni lomusha lowetsenjiswe nguNkulunkulu. Gail utsandza umBhalo weSembulo 21:3, 4 lotsi: “Nkulunkulu utawuba nabo. Utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.”

Gail utsi: “lelivesi likuchaza kahle loko Nkulunkulu latakwenta. Ngibavela buhlungu kakhulu bonke bantfu labangalati lelivesi leli, ngoba abati kutsi batawuphindze batibone tihlobo tabo.” Kungako Gail asebentisa sikhatsi lesinyenti ashumayela, atjela labanye ngelikusasa lelihle lesetsenjiswe lona nguNkulunkulu, lapho khona ‘kufa kungeke kusaba khona.’

Kungenteka ucabanga kutsi loku angeke kwenteke. Usamkhumbula yini Jobe? Bekagula abangwa netibi. (Jobe 2:7) Noma Jobe besekafisa kufa, bekakholwa kutsi Nkulunkulu unemandla ekumvusa. Aciniseka ngaloko, watsi: “Ngifisa shangatsi ungangifihla ethuneni . . . Uyawungibita, mine ngikuphendvule. Uyawufisa kubona leso sidalwa lesentiwa tandla takho.” (Jobe 14:13, 15) Jobe bekaciniseka kutsi Nkulunkulu utamkhumbula nekutsi utawuphindze amvuse.

Sekusedvute kutsi Nkulunkulu avuse Jobe kanye nalabanye labanyenti. Loku utakwenta nakashintja umhlaba uba lipharadisi. (Lukha 23:42, 43) UmBhalo weMisebenti 24:15 utsi: “Kutawuba neluvuko.” Jesu wasicinisekisa watsi: “Kunganimangalisi loku ngobe sikhatsi siyeta lapho bonkhe labasemathuneni batawuliva livi layo futsi baphume.” (Johane 5:28, 29) Jobe utakubona kufezeka kwalesetsembiso. Umtimba wakhe ‘utawubuyela ube musha njengasebusheni bakhe’ uphindze ‘uvuseteleke ube musha njengeweluswane.’ (Jobe 33:24, 25) Bantfu labakholwako kutsi Nkulunkulu utawubavusa labafile, nabo batakubona kufezeka kwalesetsembiso.

Loku lesesikhulume ngako kungenteka kungabucedzi buhlungu lobuvako ngenca yekushonelwa ngumuntfu lomtsandzako. Kodvwa nangabe uzindla ngaletetsembiso letiseBhayibhelini, utawuba nelitsemba futsi ukhone kuchubeka nemphilo.​—1 Thesalonika 4:13.

Ungatsandza yini kufundza ngetintfo letinyenti letingakudvudvuta nawufelwe? Mhlawumbe unaleminye imibuto lotibuta yona lenjengekutsi, “Nkulunkulu utivumelelani tintfo letimbi kanye nekuhlupheka?” Sicela ungene ku-website yetfu i-jw.org lawutawufike ubone khona kutsi liBhayibheli liyiphendvula kanjani imibuto.