¿Wan maʼ xjula kʼujol ja Gail, jtaʼatik tiʼal ja bʼa xchabʼil artikulo bʼa rebista it? Ja yeʼn mi snaʼa ta oj ya kulan yuja mixa teyuk sok ja statami, ja Rob. Pe mini xyila ora oj kʼotuk ja kʼakʼu oj yil ja Rob ja bʼa yajkʼachil luʼum skʼapunej ja Dyos. Ja Gail wa xyala: «Ja teksto jel xkʼulan gusto jaʼa Apocalipsis 21:3, 4». Ja bersikuloʼik it wa xyala: «Mi xa ni oj to ocʼuque otro vuelta. Mi xa ni oj couc mas ja xchamelei. Mi oj ajyuc ja syajal ja scuerpoei. Mi ni maʼ oj chamuca porque ja svidae jastal ajyi, ecʼ ta ni juntiroa».

Ja Gail wa xcha yala: «Ja skʼapjel it jaman lek wa xyala. Jel xnaʼa syajal ja matik chamelyuj jun spamilya sok mi snaʼawe oj ajyuk jun sakʼwelal». Ja yeʼn wani sjipa lek skʼujol sbʼaja it, ja yuj wa spila jitsan tyempo bʼa oj xcholyabʼ ja ixuk winike sbʼaja jas wa skʼapa ja Dyos ja bʼa jakumto bʼa «mi ni maʼ oj chamuca».

Bʼobʼta oja pensaruk mi oj ekʼ meran. Pe kʼela ja jas ekʼ sbʼaj jun winik sbʼiʼil Job, bʼa jelxa maloʼay ajyi (Job 2:7). Ama wanxa skʼana oj chamuk ajyi, wani skʼuʼan oj ajuk sakʼwuk yuja Dyos bʼa oj ajyuk sakʼan ja bʼa Luʼum. Ja yuj yala: «Ah tiʼukxta bʼi xa nolowon bʼa Kʼeʼen [...]. Weʼn oj paywanan, sok ja keʼn oj jakʼe. Wani xkʼankʼuni awuj yiljel jawa kʼulbʼeni» (Job 14:13, 15). Ja Job wa skʼuʼan ja Dyos ojni ajuk kumxukyi ja sakʼanili.

Pes jani jaw ja jas ojxta skʼuluk ja Dyos sbʼaja Job sok jitsan miyon ixuk winike, yajni ja Luʼum it oj paxuk jun tsamal kʼachinubʼ (Lucas 23:42, 43). Ja Biblia wa skʼapa: «Ja maʼ huax chami, tʼilan oj cho sac-huuc» (Hechos 24:15). Ja Jesús cha yala: «Oj ni cʼotuc ja cʼacʼu ja maʼ chamel xa, oj yab ja jcʼumali ti ni oj eluque ja ba sqʼuejnalei» (Juan 5:28, 29). Ja Job oj yil jastal oj kʼot smeranil ja skʼapjel it. Sok oj cha kumxuk ja bʼa «mero syawalil ja skwerpo» masto yuja ja bʼa skeremili (Job 33:24, 25). Junxtani oj ekʼ sbʼaje spetsanil ja matik wa skʼuʼane ja skʼapjel it wa xyaʼa ja Dyosi bʼa oj sakʼwuke ja ixuk winike ja bʼa Luʼumi.

Ta awabʼunej ja syajal ja xchamelal bʼa june maʼ jelxa kʼana, ja jas jpaklaytikta mini oj ya ekʼuk ja syajal xa wabʼi. Pe spensarajel sbʼaja skʼapjelik yalunej ja Dyos wa xtax bʼa Biblia oj ya kulan akʼujol bʼa kuchelawuj sok smajlajel man oj cha sakʼwuke (1 Tesalonicenses 4:13).

¿Wan maʼ xa kʼana oja naʼ mas bʼa jastal oj kuchukawuj ja syajali? ¿Ma waxa jobʼo abʼaj jas yuj ja Dyos wa xyaʼakan aʼekʼuk ja wokoliki? Ta jachuk, ochan ja bʼa sitio bʼa Internet jw.org bʼa oja taʼ ja sjakʼjelik bʼa jel oj skoltaya soka rasonik bʼa Biblia bʼa jel xmakuni.