Kāti e masaua ne koe a Gail telā ne taku atu muamua i te fakasologa tenei o mataupu, ne fakalotolotolua me ka mafai o gata atu tena loto fanoanoa i te mate o tena avaga, ko Rob io me ikai. Kae ko olioli eiloa tou fafine ke toe fetaui lāua i te lalolagi fou telā ne folafola mai ne te Atua. “Te ‵toe tusi faitau gali eiloa ki a au,” ko ana muna, “ko te Fakaasiga 21:3, 4.” E faitau penei: “Ka ‵nofo fakatasi eiloa te Atua mo latou. Kae ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.”

E fai mai a Gail: “E maua eiloa te fakamalosiga i te folafolaga tenei. E alofa eiloa au ki tino kolā ne ‵galo atu olotou tino pele kae e seai se lotou fakamoemoega ke toe fetaui mo latou.” Ne ola a Gail mo ana talitonuga mai te galue fakagamua e pela me se tino talai tumau, kae fakaasi atu ne ia ki ana tuakoi a te folafolaga a te Atua mō aso mai mua telā “ka se toe ai se mate.”

‘Au se talitonu!’ e mafai o fai mai koe. Kae mafaufau la ki te fakaakoakoga a te tagata ko Iopu. Ne masaki masei a ia. (Iopu 2:7) E tiga eiloa ne fia mate a ia, ne fakatuanaki a ia ki te ‵mana o te Atua ke toe fakaola mai a ia ki te lalolagi. Ne fai atu a ia mo te loto talitonu: “Aku muna eiloa ke fakamuni ne koe au i te lalolagi o tino ‵mate . . . Ka kalaga mai koe, kae tali atu au, kae ka fiafia ei koe ki a au, tau mea ola ne faite.” (Iopu 14:13, 15) Ne talitonu a Iopu me ka fanoanoa tena Atua kae ka olioli malosi eiloa te Atua ke toe fakafoki mai a ia ki te ola.

E se leva nei kae ka fai ne te Atua te mea tenā—ki a Iopu mo nisi tino e tokouke—māfai ko ‵fuli te lalolagi tenei ki se palataiso. (Luka 23:42, 43) “Ka toe‵tu mai a tino,” ko pati mautinoa i te Galuega 24:15. “Sa ofo koutou i te mea tenei, me ka oko mai eiloa te itula e lagona ei ne tino katoa kolā e i loto i tanuga a tena leo ko ulu mai ei ki tua.” (Ioane 5:28, 29) Ka lavea eiloa ne Iopu a te fakataunuga o te folafolaga tenā. Ka maua ne ia te fakamoemoega ke toe ‘tupu ‵lei tena foitino’ kae ka tumau i te “malosi” ‵lei o tena pakili i lō te taimi koi talavou ei a ia. (Iopu 33:24, 25) E penā foki eiloa te mea ka tupu ki tino katoa kolā e ‵saga atu mo te loto fakafetai ki te fakatokaga alofa a te Atua e uiga ki te toetu ki te ola i te lalolagi.

Kafai ko oti ne logo‵mae koe i te galo atu o se tino pele, a fakamatalaga kolā ne sau‵tala tatou ki ei, e mafai o se ave katoatoa keatea i ei tou loto mafatia. Kae mai te mafaufau ‵loto ki folafolaga a te Atua i te Tusi Tapu, e mafai o maua ei ne koe a te fakamoemoega tonu kae fakamalosi aka ei koe ke tumau i te malosi.—1 Tesalonia 4:13.

E a, e fia tauloto koe ki mea e uke atu e uiga ki te auala ke fakafesagai atu ki te loto mafatia? Io me e isi ne au fesili tai ‵pau, e pelā mo te “Kaia e talia ei ne te Atua a mea ma‵sei mo logo‵maega?” Fakamolemole ke āsi atu ki te motou fakatuatusi i te itaneti, jw.org, ke lavea atu a te auala e tuku mai ei ne te Atua a tali fakamafanafana kae aoga.