Ua mauiui mau Gail, tei faahitihia i to na mua ˈtu tumu parau, a pohe ai ta ˈna tane Rob. Te tiai ra râ oia i te taime e farerei faahou ai o ˈna ia ˈna i roto i te ao apî fafauhia e te Atua. Te parau ra Gail: “Te irava Bibilia ta ˈu e au roa ˈˈe, o te Apokalupo 21:3, 4.” Te na ô ra tera irava: “Ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”

Te faataa ra Gail: “Tera to tatou tiaturiraa! Te haapeapea ra vau no te feia e oto ra i tei pohe e aita ratou i ite i te tiaturiraa e nehenehe e farerei faahou i te feia here tei pohe.” Ia au i ta ˈna e tiaturi ra, te horoa ra Gail i to ˈna taime ma te tamoni ore ei taata poro evanelia no te faaite i te parau fafau a te Atua no a muri aˈe, “e ore roa te pohe.”

E parau paha oe: “E moemoeâ noa tera!” A hiˈo na râ i te hiˈoraa o Ioba. Ua roohia oia i te maˈi ino mau. (Ioba 2:7) Ua hinaaro Ioba e pohe, ua tiaturi papu râ oia e mana to te Atua no te faatia mai ia ˈna i te ora i nia i te fenua nei. Te na ô ra oia: “Ahiri oe e faatapuni ia ˈu i hade e . . . Na oe e tiaoro mai, e na ˈu e parau atu ia oe; e oto â oe i te ohipa a to rima i rave ra.” (Ioba 14:13, 15) Ua papu ia Ioba e hinaaro to ˈna Atua e faatia mai ia ˈna i te ora e e tupu iho â te reira.

Fatata roa te Atua i te na reira no Ioba e no te tahi atu mau taata ia faarirohia teie nei fenua ei paradaiso. (Luka 23:42, 43) Te haapapu ra te Bibilia i roto i te Ohipa 24:15: “E tia-faahou-raa to tei pohe.” Te na ô atoa ra Iesu: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:28, 29) E ite Ioba i te tupuraa o tera parau fafau. E nehenehe oia e hoˈi mai “tana ap[î]raa ra” e e fanaˈo i te iri apî aˈe i to ˈna tamariiraa. (Ioba 33:24, 25) Tera atoa te tupu no te feia e mauruuru i te faanahoraa hamani maitai no ǒ mai i te Atua, te tia-faahou-raa no te ora i nia i te fenua nei.

Ua pohe anei te tahi taata herehia? Eita paha teie tumu parau e faaore i to oe mauiui. Ma te feruriruri râ i nia i te mau parau fafau a te Atua i roto i te Bibilia, e noaa ia oe te tiaturiraa papu e te puai no te haere i mua.—Tesalonia 1, 4:13.

E hinaaro anei oe e ite atu â eaha te tamahanahana ˈtu? Ua ui aˈena anei oe “No te aha te Atua e vaiiho ai i te ino e te mauiui?” A haere i nia i ta matou reni Internet jw.org no te ite i te mau pahonoraa Bibilia tamahanahana mau.