¿Yabal xjul ta awoʼtan te Gail te la kilbeytik skʼoplal ta schebal articulo yuʼun te revista ini? Ya snop ta yoʼtan te maniwan xjuʼ yuʼun stsʼikel te skʼuxul mel-oʼtan ta skaj laj te smamlale. Jaʼukmeto yoʼtanuk ya yilxan te Robert te kʼalal pastajemix ta yachʼil te Balumilal te yaloj Dios ya spase. Te Gail jich la yal: «Te texto bayal ya jmulane, jaʼ te Apocalipsis 21:3, 4». Te versiculoetik jich ya yal: «Ya xnahinix Dios ta yohlil te ants-winiquetic, ya me sjoquin ta nahinel, ha pueblo ya xcʼoht yuʼun, ha nix ya xjoquinot yuʼun Dios soc ha Dios yuʼunic ya xcʼoht. Ya me xcusticlambot yaʼlel sitic yuʼun te Diose; mayuquix lajel, mel-oʼtan, oqʼuel o te bin cʼux, como cʼaxix spisil te bintic ay ta nahil to».

Te Gail jich la yalxan: «Jamal ya yal te bin ya xkʼot ta pasele. Ya jnaʼbey yoʼbolil sba te machʼatik ay lajem yuʼunik te machʼa kʼax kʼux ta yoʼtanik sok te ma snaʼik te ay chaʼkuxajele». Swenta ya yakʼ ta ilel te schʼuunej yoʼtan te bin ya yal te Gaile, bayal ya slokʼes stiempo swenta ya scholbey yaʼiy te spatxujk ta swenta te bin jamal yaloj Dios ya spas ta pajel chaʼbeje, jaʼ te «mayuquix lajel».

Wokolniwan ya schʼuun awoʼtan. Jaʼukmeto nopa awaʼiy ta swenta te Job te tsakot ta tulan chamele (Job 2:7). Manchukme la skʼan te ya xlaje, la smukʼulin yoʼtan Dios te bitʼil jaʼ ya xchaʼkuxajtesot ta Balumilal. Jaʼ yuʼun jich la yal: «Ayuc bitʼil ya anacʼon bael ta yawil te lajele [o mukenal] [...]. Ya awicʼon, te joʼone ya me jacʼbat [...] binax me awoʼtan ya awilon, melel jaʼat la apason» (Job 14:13, 15, XCD). Jich bitʼil la kiltikixe, te Job jkʼaxel schʼuunej yoʼtan te ya xchaʼkuxajtesote.

Jich ya spas Dios ta stojol te Job sok te bayal miyon ta tul ants winiketik te kʼalal yak ta kʼatpʼujel ta nichimal kʼinal ta swolol te Balumilale (Lucas 23:42, 43). Te Biblia ya yal: «Ay chaʼcuxajel yuʼun te machʼatic chamenic» (Hechos 24:15). Jaʼnix jich te Jesús la yal: «Ma me xchamuc awoʼtanic yuʼun, como ya me sta yorahil te spisil machʼatic ayic ta muquenal ya me yaʼiybeyic scʼop soc ya me xloqʼuic talel» (Juan 5:28, 29). Te Job yame yil bitʼil ya xkʼot ta pasel-abi. Jich yuʼun yame smulan te ya schaʼta «te bin utʼil querem to a» sok jich «ya xcʼoht xan te sbaqʼuetal te bin utʼil alal» (Job 33:24, 25). Jaʼnixme jich ya xpastaj ta stojol te machʼatik ya yakʼ schʼuunel yoʼtanik ta swenta te mukʼul majtʼanil ya yakʼ te Dios, jaʼ te ya schaʼkuxajtes ta Balumilal te machʼatik lajemikixe.

Teme ay machʼa lajem awuʼun te kʼux ta awoʼtane, te bin la jnopbeytikix skʼoplale maba ya yakʼ tupʼuk ta jkʼaxel te skʼuxul mel-oʼtan ya awaʼiye. Jaʼukmeto teme ya anopilan ta awoʼtan te bin jamal yaloj ya spas Dios te jich ya yal te Bibliae, ya yakʼbat smukʼul awoʼtan sok ya yakʼbat yip awoʼtan ta stsʼikel te skʼuxul mel-oʼtane (1 Tesalonicenses 4:13).

¿Yabal akʼan anaʼxan te bin ya xjuʼ ya apas swenta ya stsʼik awuʼun te skʼuxul mel-oʼtane? ¿O aybal ajojkʼoybeyoj aba bin yuʼun maba slajinoj Dios te bintik chopol sok te wokolile? Ta swenta-abi, ochan ta pajina kuʼunkotik ta Internet jw.org tey ya atabey sujtib te jojkʼoyeletik te ya yakʼbat yip awoʼtan sok tsitsel te bayal ya xtuun awuʼun te lokʼemik ta Bibliae.