Ni nga vha ni tshi kha ḓi humbula Gail we a bulwa mathomoni a ino thero, we a vha a tshi timatima uri a nga kunda vhuṱungu ha u felwa nga munna wawe Rob. Naho zwo ralo, o lavhelela nga maṱo matswuku u dovha a mu vhona shangoni ḽiswa ḽa Mudzimu ḽo fulufhedziswaho. O ri: “Luṅwalo lune nda lu funesa ndi Nzumbululo 21:3, 4.” Lu ri: “Mudzimu ene a vha navho. U ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.”

Gail o ri: “Ḽeneḽi fulufhedziso ḽi amba zwoṱhe. Ndi pfela vhuṱungu vhathu vho felwaho nga vhane vha vha funa vhane vha si ḓivhe nga ha ḽeneḽi fulufhelo ḽa u dovha vha vhona vhane vha vha funa.” Gail u ita zwithu zwi tshimbidzanaho na lutendo lwawe zwine zwa vha mushumo wa u ḓifunela wa tshifhinga tshoṱhe wa u vhudza vhaṅwe nga ha fulufhedziso ḽa Mudzimu ḽa vhumatshelo musi ‘lufu lu si tsha ḓo vha hone.’

Ni nga vha ni tshi vhona u nga ‘a zwi konadzei.’ Fhedzi ṱhogomelani tsumbo ya muṅwe munna ane a pfi Yobo. O vha a tshi khou lwala vhukuma. (Yobo 2:7) Naho Yobo o tama u fa, fhedzi o vha e na lutendo kha maanḓa a Mudzimu a u mu vusa uri a dovhe a tshile kha ḽifhasi. O amba nga tshivhindi a ri: “Ngavhe wa tou mbulunga vhafuni . . . Ndi misi U tshi ḓo mbidza nda aravha; ndi misi U tshi ḓo ṱuvha tshivhumbiwa tsha zwanḓa zwau.” (Yobo 14:13, 15) Yobo o vha e na vhungoho ha uri Mudzimu wawe u ḓo mu humbula nahone u ḓo ṱulutshela u mu vusa.

Hu si kale Mudzimu u ḓo ita zwenezwo, u ḓo vusa Yobo na vhaṅwe vhanzhi musi ḽeneḽi ḽifhasi ḽi tshi shandulwa ḽa vha paradiso. (Luka 23:42, 43) Kha Mishumo 24:15, Bivhili i khwaṱhisedza uri “hu ḓo vha na mvuwo.” Yesu u ri khwaṱhisedza uri, “Ni songo kanuka zwenezwi, ngauri hu ḓa tshifhinga tshine vhoṱhe vha re mavhiḓani vha ḓo pfa ipfi ḽawe vha bva.” (Yohane 5:28, 29) Yobo u ḓo vhona ḽeneḽo fulufhedziso ḽi tshi ḓadzea. U ḓo lavhelela u dovha a “vhuyelela maḓuvhani a vhutuka” na uri ṋama yawe i dzule yo “khwaṱha ya fhira ya ḓafu.” (Yobo 33:24, 25) Hu ḓo itea zwi fanaho kha vhoṱhe vhane vha dzhiela nṱha ndugiselelo ya tshilidzi tsha Mudzimu ya u vusa vhathu kha ḽifhasi.

Arali no felwa nga muthu ane na mu funa, zwe ra zwi haseledza zwi nga si fhelise vhuṱungu haṋu lwa tshoṱhe. Nga u elekanya nga ha mafulufhedziso a Mudzimu a wanalaho Bivhilini, ni nga wana fulufhelo ḽa vhukuma na nungo dza u konḓelela.—1 Vhathesalonika 4:13.

Naa ni nga takalela u guda zwo engedzeaho nga ha nḓila ya u sedzana na vhuṱungu? Kana naa ni na mbudziso dzi ngaho “Ndi ngani Mudzimu a tshi tendela vhuvhi na tshengelo?” Nga khumbelo, dalelani website yashu ya jw.org u itela u vhona nḓila ine Bivhili ya khuthadza ngayo na phindulo dzi shumaho.