Munnimuupuwela Gail oromoliwe epaaxina 4 ya erevista ela? Owo khaakupali wira aamwaaweha-tho aiyawe akhwiiye, Rob. Masi vano oohakalala maana onnilipelela waaweha-tho elapo esya Muluku oleihenrye awe. Owo onihimya so: “Yoolepa yootepa okisivela ti Wisupulula 21:3, 4, yeeyo eni: ‘Muluku onokhala ni yawo. . . Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira’”.

Gail onihimya so: “Yooleiherya ela ennilavula mmensaya! Kinniwoonela othunku atthu akhweliwe ole yamphenta aya, masi nlelo ahinsuwela yoolipelela ela ya ohihimuxiwa”. Moovarihana ni ele Biibiliya eniixuttiha awe, Gail vano ohiivahererya waalaleerya atthu ihapari sa mBiibiliyani waahela muhina anamwaattamanani awe ovirihaka iwoora 70 khuta mweeri. Owo onnaaleela yooleiherya ya Muluku ya muhoolo yoowi “khunrowa okhala-tho okhwa”.

Woonasawene nyuwo munihimya so: ‘Nkinkupali!’ Masi muthokorerye ntakiheryo na Yobi yoowo ahaareere owereiwa. (Yobi 2:7) Nnaamwi aaphavela okhwa, owo aanaamini wira Muluku anwerya waahihimuxa alipa-okhwa. Moororomela aalavunle so: “Kaphavela wira nyuwo mukivithe mmahiye, . . . Vano nyuwo mwamukìhana, miyo kiwakhuleni: mwamusiveliwa ni miyo, kipattuxiwe ni nyuwo”. (Yobi 14:13, 15) Yobi aaniroromela wira Muluku awe, aamunkheliwa ni yena ni ammuttikiherya okumi muhoolo.

Moohipisa, elapo ela enrowa okhala eparayiisu, nto Muluku onoomuhihimuxa Yobi ni atthu anceene akhwiiye. (Luka 23:42, 43) Eliivuru ya Miteko 24:15 enooniherya wira onookhala ohihimuwa wa alipa-ookhwa. Yesu alavunle so: “Itthu iya sihotikiniheni, okhala wira onophiya okathi onìraya atthu othene ari mmahiye, yiwe nsu na Mwana a Mutthu, ekhume mmahiye”. (Yohani 5:28, 29) Yobi onimoona wiiraneya wa eprofesia eyo. Owo onootthikela “okhalana ikuru s’omiravo” awe, nto erutthu awe khenrowa-tho wuuluvala maana enokhala-tho “ntoko mahiku ònamwane” awe. (Yobi 33:24, 25) Etthu emosaru enoowiiraneela anamunceene, maana anoottottela mureerelo yoovaha ya omoriwa ikharari wa Muluku eyo piiyo, ohihimuxiwa wira yaakhele okumi valaponi.

Ekeekhai wira itthu silavunle ahu mwaha ola khasinrowa omaliha oriipiwa wanyu murima moomalela, akhala wira mootoko okhweliwa mmusi anyu. Masi, wuupuwelela yooleiherya ya Muluku yeeyo eri mBiibiliyani, onimoophwanyihani nlipelelo neekeekhai ni woolipihani wira nvikanihe ophavela okhala mukumi​.—1 aTesalonika 4:13.

Munniphavela wiixutta itthu sikina voohimya sa moota woovilela oriipiwa murima? Aahiiso munniphavela osuwela makoho makina ntoko nla nni: “Xeeni Muluku onihiya awe ohaawa ni sootakhala siiraneyaka?” Murumeele esaite ahu, jw.org, wira moone moota Biibiliya onaakhula awe makoho ootepa otthuneya a mookumini.