Mwine akukumbucila kuti Gail jwatumkolasile mu ngani jaŵili jila, ŵakayicilaga naga cacikombola kumalana ni canasa ligongo lya ciwa ca ŵamkwakwe, lina lyawo Rob. Nambope, akwete cembeceyo cakuti caciwoneganasoni m’cilambo casambano. Jwalakwe ŵaŵecete kuti, “Lilemba lyangusalinonyela mnope lili Ciunukuko 21:3, 4.” Lilembali likusati: “Mlungu taciŵa nawo. Jwalakwe cacipukuta misosi josope m’meso mwawo, nipo ciwa ngasicipagwasoni. Ngasipapagwasoni kulila, kuwuwula kapena kupikana kupweteka. Yindu yakala yiciŵa yimasile.”

Gail ŵaŵecetesoni kuti: “Lilembali likusandamika mtima pasi. Nambo ngusinatendela canasa ŵandu ŵele jwakunonyelwa jwawo ŵawile nambo ŵangali cembeceyo cakuti caciwonegana nawosoni.” Apano Gail akusanonyela kamula masengo gakulalicila soni akusiŵasalila ŵandu yindu yalagucisye Mlungu yakuti kusogoloku “ciwa ngasicipagwasoni.”

Mwine mpaka ajile kuti yeleyi ngaŵa mkomboleka. Nambo ganicisya yaŵaŵecete Yobu ali alwasile mnope mpaka yitukamucisye. (Yobu 2:7) Atamose kuti Yobu ŵasakaga ali awile, nambo jwalakwe ŵakwete cikulupi cakuti Mlungu akwete macili gakuti cacimjimusya. Jwalakwe ŵaŵecete kuti: “Mkasisile uneji m’Malembe . . . Ŵalakwe caciŵilanga, nipo une cinjajanga. Cacigasacilila masengo ga magasa gawo.” (Yobu 14:13, 15) Yobu ŵakwete cikulupi cakuti Mlungu jwakwe ngasamliŵalila nipo ali jwakusacilila kumjimusya ku ŵawe.

Pacangakaŵapa, Mlungu cacimjimusya Yobu soni ŵandu ŵane ŵajinji ŵaŵawile. Cacitenda yeleyi pacacicenga cilamboci kuŵa paladaiso.(Luka 23:42, 43) Lilemba lya Masengo 24:15 likusati, ‘Kuciŵa kwimuka kwa ŵawe.’ Yesu ŵatusimicisye kuti, “Akasimonga ni yeleyi, pakuŵa jikwisa ndaŵi jele ŵandu ŵali m’malembe gacikumbucilo cacipikana maloŵe gakwe ni cacijimuka.” (Yohane 5:28, 29) Yobu cacigawona maloŵe gelega gali mkukwanilicikwa. Jwalakwe caciŵasoni ni ‘macili’ nambosoni cilu cakwe ciciŵa cakusalala ‘kulekangana ni mwaŵaŵelele ali mnyamata.’ (Yobu 33:24, 25) Nombe nawo ŵandu wosope ŵacacajimusya Mlungu ku ŵawe cacisangalala ni umi welewu.

Komboleka kuti yatutagulilene mu nganiji ngaŵa mkumasya canasa cosope cakwete ligongo lya ciwa ca jwakunonyelwa jwawo. Nambope ganicisya yatulagucisye Yehofa yayikusasimanikwa m’Baibulo, mpaka yitukamucisye kumanyilila kuti yicikomboleka kuwoneganasoni ni jwakunonyelwa jwetu juŵawile.—1 Atesalonika 4:13.

Ana akusaka kumanyililasoni yine yampaka yakamucisye kuti amalane ni canasa? Kapena akusaka kumanyilila kwanga kwa yiwusyo, mpela cakuti, “Ligongo cici Mlungu akusakunda yakusakala kutendekwa, soni yipwetesi?” Ajawule pa webusayiti jetu ja jw.org/yao, kuti apate songa sine syampaka syakamucisye nambosoni kwanga kwa yiwusyo yakwete.