Gail, le máax tsʼoʼok k-yáax aʼalikoʼ tu yaʼaleʼ mix bikʼin kun xuʼulul u muʼyaj úuchik u kíimil u yíicham. Baʼaleʼ táan u tsʼíiboltik u yilik teʼ túumben luʼum u yaʼalmaj Diosoʼ. Gaileʼ ku yaʼalik: «Le teksto maas jatsʼuts in wilkoʼ Apocalipsis 21:3, 4». Teʼeloʼ ku yaʼalik: «Dios kun yantal tu yéeteloʼob. Letiʼeʼ yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil. Le baʼaxoʼob yanoʼob kaʼachoʼ tsʼoʼok u máanoʼob».

Gaileʼ ku yaʼalik xan: «Jach jatsʼuts le promesaaʼ. Kin chʼaʼik óotsilil tiʼ le máaxoʼob tsʼoʼok u kíimil wa máax tiʼob yéetel maʼ u yojloʼob wa yaan u kaʼa kuxtal le kimenoʼoboʼ». Gaileʼ jach ku creertik le baʼax ku yaʼalik le Bibliaoʼ, le oʼolal ku máansik yaʼab tiempo táan u tsikbaltik tiʼ u vecinoʼobeʼ ichil junpʼíit kʼiineʼ «maʼ tun yantal kíimil».

Maʼ xaaneʼ maʼ ta creertik wa jeʼel u yúuchul lelaʼ. Koʼox tʼaan tiʼ juntúul máak jach kʼojaʼanchaj ku kʼaabaʼtik Job (Job 2:7). Letiʼeʼ hasta tu tsʼíiboltaj ka kíimik, kex beyoʼ ku creertik kaʼach jeʼel u kaʼa kuxkíintaʼal tumen Dioseʼ. Le oʼolal tu yaʼalaj: «¡Kexiʼ wa ka páatchajak in taʼakbeskinba tu tsʼuʼ le luʼum[oʼ] [...]. Techeʼ bíin a tʼanen, teen xaneʼ bíin in núuk a tʼaan; bíin wal a pakten yéetel yaakunajeʼ, tumen teech beetmilen» (Job 14:13, 15). Jeʼex k-ilkoʼ Jobeʼ jach ku creertik kaʼach jeʼel u kaʼa kuxkíintaʼal tumen Dioseʼ.

Maʼ tun xáantaleʼ Dioseʼ yaan u sutik Paraísoil le Luʼumaʼ yéetel yaan u kuxkíintik Job bey xan u millonesil máakoʼob (Lucas 23:42, 43). Le Bibliaoʼ ku yaʼalikeʼ yaan «u kaʼa kuxkíintaʼal le kimenoʼob[oʼ]» (Baʼaxoʼob [Hechos] 24:15). Tsʼoʼoleʼ Jesuseʼ tu yaʼalaj xan: «Maʼ u jaʼakʼal a wóoleʼex yoʼolal lelaʼ, tumen yaan u kʼuchul u kʼiinileʼ, tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan» (Juan 5:28, 29). Jobeʼ yaan u yilik u béeychajal le promesaaʼ. Teʼ kʼiinoʼoboʼ «bíin pʼáatak bey tu táankelmil tu kaʼatéeneʼ» (Job 33:24, 25). Tuláakal le máaxoʼob ku creertikoʼob le baʼax ku yaʼalik Dios u beetkaʼ yaan xan u kaʼa kuxkíintaʼaloʼob way Luʼumeʼ.

Wa tsʼoʼok u kíimil juntúul máax a yaabiltmeʼ, le baʼax tsʼoʼok a xokik teʼ revistaaʼ maʼ xaaneʼ tu líiʼsaj a wóol. Chéen baʼaleʼ wa ka tuukulnakech tiʼ u promesaʼob Dios yaan teʼ Bibliaoʼ maas jeʼel u líikʼil a wóoleʼ (1 Tesalonicailoʼob 4:13).

¿A kʼáat wa a wojéelt baʼax uláakʼ jeʼel u yáantkech utiaʼal maʼ u sen lúubul a wóoleʼ? ¿A wojel wa baʼaxten ku chaʼik Dios u yantal kʼasaʼanil yéetel muʼyajil? Ookkech www.pr418.com/yua utiaʼal a wilik baʼax ku yaʼalik le Biblia tu yoʼolaloʼ.