Ame Iosefa, keme i Iesu qa Nazareta, ke, ka tratrau sinöe. Ngo, drei la keme i Iosefa? Kola qaja ngöne la tusi Mataio, ka hape, Iakobo la ëje i nyidrë, ngo ame pe Luka, tre, angeic a qeje Iosefa ka hape, “matra i Heli.” Pine nemene matre ka isazikeu la itre hna qaja?—Luka 3:23; Mataio1:16.

Ame la kola qaja e hnine la tusi Mataio ka hape: “Iakobo a hnaho Iosefa,” kolo hi lai a qaja ngöne la qene heleni ka hape, Iakobo la sipu keme i Iosefa. Celë hi matre, hnei Mataio hna qaja trongëne la itre xötrapane i Iosefa, lo itre matra i Davita joxu nge uti hë Iesu lo hna hiane hnei Iosefa, nge atr ka ijije troa cilëne la mus.

Ame ngöne la ketre götran, kola qaja ngöne la tusi Luka ka hape: “Iosefa, matra i Heli.” Ame la hnëewekë hna hape, “matra i,” tre, kola qaja ka hape, “tresi.” Easë mina fe a öhne lai ngöne Luka 3:27, laka, Sealetiela, sipu keme i Iekonia, hna qaja ka hape, “matra i Neri.” (1 Aqane Lapa Ite Joxu 3:17; Mataio 1:12) Maine jë hna faipoipo hnei Sealetiela memine la neköi Neri jajiny, celë hi matre tresi Neri hë Sealetiela. Easa trotrohnine mina fe laka, ame la kola qaja ka hape, Iosefa la “matra” i Heli, ke, hnei angeic hna faipoipo me Maria, neköi Heli jajiny. Celë hi matre, hnei Luka hna e trongëne la itre xötrapane i Iesu “thenge la ngönetei,” ngöne götran e Maria, thine i Iesu. (Roma 1:3) Haawe, Tusi Hmitrötr a hamëne la lue xötratr hnei Iesu hna xulu qa ngön.

Hna xome la ipene mamoe matre troa ca imaano ekö ngöne la itre götrane ekoihë, ketre tune mina la itre pene nani me kamela. Hna majemine cane la itre mano qa ngöne ipene mamoe, celë hi matre Tusi Hmitrötr a qeje mamoe me xötre pene mamoe me ihetr ka keukawa. (1 Samuela 25:2; 2 Ite Joxu 3:⁠4; Iobu 31:20) Ame la itre lino tre, hna can qa ngöne la ketre feja hna hëne ka hape flax, ketre feja ka cia ekö e Aigupito me Isaraela. (Genese 41:42; Iosua 2:6) Tha ka tra koto kö angetre Isaraela ekö, ngo Tusi Hmitrötr a qeje koto ka xulu qa Peresi. (Esetera 1:⁠6) Ame la silek, ke, ka tru thupene catr, hna traqa fë hnene la itre ka salem ka xulu qa ngöne la itre nöj ahië.​—Hna Amamane 18:​11, 12.

Kola qaja hnene la itus Jesus and His World, ka hape: “Nyimu hane la ipene mamoe, qane la ka wië xaca koi ka miti han me itre xane ju kö.” Ketre, hna lapaa nyihane la ipene mamoe. Hetrenyi la ketre han ka tru thupene catr, tune la han hna xome qa ngöne la ketre coquillage. Ame itre xan, tre, hna xome qa ngöne itre feja, me iwaan me dröne sinöe, me itre neköi öni, nyi hane ka madra jë hi maine ka hmedr, maine ka bulu, maine ka wetrewetr.