Sosep kapinte en Nasaret, me wia pahpa ong seri pwekipwekda, Sises. Ahpw ihs en Sosep eh pahpa? Rongamwahu en Madiu kasalehda irekidien sapwellimen Sises peneinei oh ohl emen me ede Seikop me semen Sosep ahpw Luk koasoia me Sosep “nein Eli.” Dahme kahrehda mwomwen me ira sohte pahrekpene?​—Luk 3:23; Madiu 1:16.

Rongamwahu en Madiu koasoia: “Seikop me semen Sosep,” lepin lokaiahn Krihk me kadoadoahk wasaht kawehwehda me Seikop uhdahn semen Sosep. Eri Madiu koasokoasoia irekidien ahn Sosep peneinei me kohsang peneinei soupeidi en Depit, me pwuhng en kaunda kohwohng serio me Sosep pwekada, Sises.

Ni pali teio, rongamwahu en Luk koasoia: “Sosep nein Eli.” Lepin lokaia “nein” kak wehwehki e wia “nein Eli” pwehki e pwoudiki nah serepeino. Soahngohte pil dierek nan Luk 3:27, duwen Seatiel, me uhdahn samanki Sehoiakin ahpw kileldi me ih “nein Neri.” (Luk 3:27; 1 Kronikel 3:17; Madiu 1:12) Seatiel pwoudiki emen nein Neri serepein me sohte sansalda edeo, met kahrehda e wiahla nein Neri pwehki e pwoudiki nah serepeino. Pil duwehte Sosep eh wiahla “nein” Eli, pwehki eh pwoudiki nein Eli serepein Mery. Eri Luk koasokoasoia duwen irekidien peneinei en inen Sises, Mery, me kaipwiedi. (Rom 1:3) Eri Paipel kin padahkihong kitail ni sansal duwen sapwellimen Sises peneinei riau me wekpeseng oh me kitail kak wehwehki.

Wunen sihpw kin kalapw kadoadoahk en wiahda likou nan Middle East mahso oh pil wunen kuht oh kamel. Mwein likou me kalapw kadoadoahk iei wunen sihpw, oh Paipel kin kalapw kasalehda duwen sihpw, sehkasang wunen sihpw, oh likou me wiawihdahsang wunen sihpw. (1 Samuel 25:2; 2 Nanmwarki 3:4; Sohp 31:20) Wahntuhke me kin kadoadoahk pwehn wiahda likou linen iei plaks, me re kin kakairada nan Isip oh Israel. (Senesis 41:42; Eksodus 9:31) Mehn Israel kan ni mwehin Paipel ele sohte kin padok koatin, ahpw Paipel kin kasalehda me soangen likou koatin wet me mehn Persia kan kin doadoahngki. (Ester 1:6) Likou silik iei soangen mwein likou me pweilaud, ihte sounetinet kan me kin seiloak me kin netiki ni ar kin alehsang sahpw laud kan ni Palimese.​—Kaudiahl 18:11, 12.

Pwuhken Jesus and His World koasoia: “Likou me kohsang wunen sihpw kin mi ni soangsoangen poh kan, poh kin kak uhdahn pwetepwet kohla lel poh pwehl ni soangsoangen poh kan nanpwungara.” Oh pil, wunen sihpw kin kalapw kaduh nan ehu poh. Mehn kaduh pweilaud poh ntahnmwel kin kohsang ni soangen menihkehn nansed kei, oh soangsoangen tuhke, kalewen tuhke, tehn tuhke oh kisin mahn tikitik kan pil kin wiahda soangen wini ong kaduh ni soangen poh kan duwehte weitahta, oangoahng, mei, oh toantoal.