IBUOTIKỌ MAGAZINE EMI | NTAK EMI JESUS ỌKỌBỌDE UFEN ONYỤN̄ AKPADE?
Ndi N̄kpọ Emi Ama Etịbe?
Ke isua 33 C.E., ẹma ẹwot Jesus eyen Nazareth. Ẹma ẹdori enye ikọ ẹte ke ọsọn̄ ibuot ye ukara, ẹmia enye ẹnọ unan, ẹnyụn̄ ẹkọn̄ enye ke eto. Enye ama ọkọn̄ọ do amian̄a tutu akpa. Edi Abasi ama anam enye eset, ndien ke usen 40 ama ekebe, enye ama afiak ọnyọn̄ heaven.
N̄wọrọnda mbụk emi odu ke Gospel inan̄ emi ẹdude ke N̄wed Abasi Usem Greek, oro ẹsikotde Obufa Testament. Ndi n̄kpọ emi ama etịbe? Ata akpan mbụme edi emi, sia edieke n̄kpọ emi mîketịbeke, ọwọrọ se mme Christian ẹkpepde edi nsu, ndien ndidori enyịn ke iyodu uwem ke nsinsi ke Paradise ekpetie nte owo ndidaba ndap. (1 Corinth 15:14) Edi edieke edide n̄kpọ emi ama etịbe, ọwọrọ idotenyịn odu ke n̄kpọ ọyọfọn ke ini iso, ndien afo emekeme nditiene ndia ufọn. Ntre, ndi se mme Gospel ẹtịn̄de edi akpanikọ m̀mê nsu?
SE NDỤN̄ỌDE OWỤTDE
Mme Gospel itiehe nte n̄wed n̄ke, mmọ ẹtịn̄ nnennen se iketịbede ẹnyụn̄ ẹtịn̄ mme n̄kpọ en̄wen oro anamde mbụk mmọ enen̄ede an̄wan̄a. Ke uwụtn̄kpọ, mmọ ẹsiak nsio nsio obio emi ẹkedude ini oro, ndien mme owo mfịn ẹsika ẹkese mme obio emi. Mmọ ẹtịn̄ n̄ko ẹban̄a mbon emi ẹkedude uwem ini oro, ndien mme ewetmbụk ererimbot ẹsiak mbon emi n̄ko.—Luke 3:1, 2, 23.
Mme ewetmbụk eset emi ẹkedude ke eyo Jesus ye mbon oro ẹkedude isua ifan̄ ke oro ebede ẹma ẹwet n̄kpọ n̄ko ẹban̄a Jesus. * Se mme Gospel ẹtịn̄de ẹban̄a nte ẹkewotde Jesus onyụn̄ edi ukem ye nte mbon Rome ẹkesiwotde owo ini oro. N̄ko, ẹwet nnennen se iketịbede, owo idịpke n̄kpọ, utọ nte ndusụk se mme mbet Jesus ẹkenamde emi mîfọnke. (Matthew 26:56; Luke 22:24-26; John 18:10, 11) Kpukpru emi owụt ke se mme andiwet Gospel ẹkewetde ẹban̄a Jesus enen onyụn̄ edi akpanikọ.
NDI EDI AKPANIKỌ KE JESUS AMA ESET?
Ndusụk owo ẹnịm ke Jesus ama odu uwem ke isọn̄ emi onyụn̄ akpa, edi mmọ inịmke ke enye ama eset. Mme apostle Jesus ikakam inịmke ke enye ama eset akpa ini emi mmọ ẹkekopde. (Luke 24:11) Edi mmọ ẹma ẹnịm ke ini mmọ ye mme mbet eken ẹkekụtde Jesus. Jesus ama owụt mmọ idem ke nsio nsio ini. Isan̄ kiet, se ibede owo 500 ẹma ẹkụt enye.—1 Corinth 15:6.
Kpa ye oro mme mbet Jesus ẹkediọn̄ọde ke ẹkeme ndimụm mmimọ n̄wot, mmọ ẹma ẹnen̄ede ẹsịn idem ẹkwọrọ ke Jesus ama eset. Mmọ ẹma ẹtịn̄ ẹnọ kpukpru owo, esịnede mbon oro ẹkewotde Jesus. (Utom 4:1-3, 10, 19, 20; 5:27-32) Ndi mmọ ẹkpekenyene uko ntre edieke mmọ mîkpekenịmke ke Jesus ama eset? Jesus ndikeset akakam anam mme Christian oro ẹkedude ke eyo esie ye mbon oro ẹdude idahaemi ẹnen̄ede ẹsịn idem ẹnam n̄kpọ Abasi.
Se ẹwetde ke mme Gospel ẹban̄a n̄kpa ye ediset ke n̄kpa Jesus edi ata ofụri akpanikọ. Edieke etịn̄de enyịn okot se ẹwetde do, oyokụt ke n̄kpọ emi ama etịbe. Ndien edieke ọdiọn̄ọde ntak emi Jesus akakpade, eyenen̄ede enịm se ẹwetde ke mme Gospel ẹban̄a enye. Ibuotikọ oro etienede eyetịn̄ ntak emi Jesus akakpade.
^ ikp. 7 Tacitus emi akamanade ke n̄kpọ nte isua 55 eyo mme apostle ekewet ete: “Christ, emi ẹdade enyịn̄ oro Christian ẹto, ama ọbọ ọkpọsọn̄ ufen ke ini ukara Tiberius ke ubọk andikara nnyịn kiet, Pontius Pilatus.” Mme ewetmbụk eset en̄wen oro ẹkewetde n̄kpọ ẹban̄a Jesus ẹdi Suetonius (emi okodude ke eyo Jesus); Josephus eyen Jew (emi okodude ke eyo Jesus); ye Ekpri Pliny, andikara Bithynia (emi okodude isua ifan̄ ke eyo Jesus ama ekebe).
