DI TƆPIK NA DI FRƆNT PEJ | WETIN MEK JIZƆS BIN SƆFA ƐN DAY?
I Bin Rili Apin?
Dɛn bin kil Jizɔs we kɔmɔt Nazarɛt, insay di ia 33. Dɛn bin lay pan am se i want fɔ tɔn pipul dɛn agens di gɔvmɛnt, dɛn bit am bad bad wan, ɛn nel am na stik. I bin fil siriɔs pen bifo i day. Bɔt Gɔd gi am layf bak, ɛn afta 40 dez, Jizɔs go na ɛvin.
Dis stori de insay di 4 buk dɛn we nem Matyu, Mak, Lyuk, ɛn Jɔn. Ɛn dɛn buk ya de insay di Kristian Grik Skripchɔ dɛn we pipul dɛn kin kɔl Nyu Tɛstamɛnt. Yu tink se dɛn tin ya bin rili apin? Dis na impɔtant ɛn siriɔs kwɛstyɔn. If dɛn nɔ bin apin, di fet we Kristian dɛn gɛt na fɔ natin ɛn di op fɔ se dɛn go gɛt layf we go de sote go na Paradays, in bak na fɔ natin bikɔs i go jɔs tan lɛk drim we nɔ go ɛva bi. (Fɔs Lɛta Fɔ Kɔrint 15:14) Bɔt if dɛn tin ya bin rili apin, dat min se fayn fayn tin dɛn de fɔ mɔtalman tumara bambay we yusɛf go ɛnjɔy. So, di stori dɛn we de na Matyu, Mak, Lyuk, ɛn Jɔn, na tru ɔ nɔto tru?
WETIN SHO SE NA TRU?
Di tin dɛn we Matyu, Mak, Lyuk, ɛn Jɔn rayt, ɔl na tru ɛn dɛn tɛl wi bɔku ɔda tin dɛn, so i nɔ tan lɛk ɔda stori dɛn we nɔto tru. Fɔ ɛgzampul, dɛn sho di nem fɔ bɔku ples dɛn we bin de dɛn tɛm dɛn de, ɛn bɔku pan dɛn say dɛn de, pipul dɛn kin go de tide. Dɛn tɛl wi bɔt rial pipul dɛn we bin de dɛn tɛm dɛn de, ɛn ivin di wan dɛn we de rayt bɔt istri gri wit wetin dɛn se.—Lyuk 3:1, 2, 23.
Masta sabi bukman dɛn we bin de di tɛm we di apɔsul dɛn bin de ɛn di wan dɛn we bin de lɛk 200 ia afta Krays, dɛnsɛf bin rayt bɔt Jizɔs. * Di we aw Matyu, Mak, Lyuk, ɛn Jɔn ɛksplen bɔt aw Jizɔs bin day, na di sem we di Roman dɛn bin de kil pipul dɛn, dɛn tɛm dɛn de. Dɛn rayt di stori dɛn as sɔntin we rili apin ɛn dɛn nɔ ayd di tru, dɛn ivin tɔk bɔt wetin Jizɔs in disaypul dɛn bin du we nɔ fayn. (Matyu 26:56; Lyuk 22:24-26; Jɔn 18:10, 11) Ɔl dɛn tin ya de sho se Matyu, Mak, Lyuk, ɛn Jɔn tɔk di tru ɛn dɛn nɔ ayd ɛnitin we dɛn de rayt bɔt Jizɔs.
JIZƆS BIN RILI GƐT LAYF BAK?
Bɔku pipul dɛn biliv se Jizɔs bin liv na dis wɔl ɛn day, bɔt sɔm de dawt if i bin gɛt layf bak. Ivin in apɔsul dɛn nɔ bin biliv wantɛm wantɛm we dɛn yɛri se i dɔn gɛt layf bak. (Lyuk 24:11) Bɔt dɛn kam fɔ biliv we dɛn ɛn ɔda disaypul dɛn bin si Jizɔs we bin dɔn gɛt layf bak. Dɛn bin si am difrɛn tɛm dɛn. Infakt, wan tɛm, i pas 500 pipul dɛn we si Jizɔs we i bin gɛt layf bak.—Fɔs Lɛta Fɔ Kɔrint 15:6.
Bɔku disaypul dɛn bin gɛt maynd fɔ tɛl ɔlman bɔt di layf we Jizɔs bin gɛt bak, ɛn dɛn ivin tɛl di wan dɛn we bin kil Jizɔs, pan ɔl we dɛn bin no se dɛn go arɛst dɛn ɛn kil dɛn. (Di Apɔsul Dɛn Wok [Akt] 4:1-3, 19, 20; 5:27-32) Yu tink se dɛn disaypul dɛn ya fɔ dɔn gɛt maynd fɔ tɔk bɔt Jizɔs if dɛn nɔ bin shɔ se i rili gɛt layf bak? Infakt, di layf we Jizɔs bin gɛt bak na in na di men tin we bin mek bɔku pipul dɛn bi Kristian trade ɛn ivin tide.
Di tin dɛn we dɛn rayt na Matyu, Mak, Lyuk, ɛn Jɔn bɔt Jizɔs in day wan ɛn di layf we i bin gɛt bak, gɛt ɔltin we de sho se wetin dɛn rayt na tru. We yu tek tɛm rid dɛn, yu go biliv se ɔl dɛn tin ya bin rili apin. Wan tin we go mek yu biliv mɔ na we yu ɔndastand wetin mek dɛn tin ya bin apin. Di nɛks atikul go sho di rizin.
^ par. 7 Tasitɔs, we bin bɔn arawnd di ia 55 afta Krays, bin rayt se “Kristɔs, we na frɔm am [Kristian dɛn] gɛt dɛn nem, bin gɛt di pɔnishmɛnt we pas ɔl ɔda pɔnishmɛnt dɛn di tɛm we Taybiriɔs bin de rul ɛn na wan pan wi bigman dɛn na di Roman gɔvmɛnt, we nem Pɔnchɔs Pilatɔs bin pɔnish am.” Sɔm ɔda pipul dɛn bak we bin rayt bɔt Jizɔs na Switoniɔs (we bin de insay di apɔsul dɛn tɛm); wan Ju man we bin de rayt bɔt istri, we nem Josifɔs (we bin de insay di apɔsul dɛn tɛm); ɛn Plini di Yɔnga, we na bin gɔvnɔ na Bitinya (we bin de arawnd 200 ia afta Krays).
