Ano an sasabihon mo kun may maghapot saimo, “Gusto mo daw mabuhay nin daing katapusan?” Dakul an tibaad masabi na iyo gusto ninda, pero iniisip ninda na imposible iyan. Sabi ninda, parte talaga kan buhay nin tawo an kagadanan, na iyan an kasagkudan ta.

Pero, paano kun arog kaini an hapot, “Handa ka na daw na magadan?” Siguradong dai an simbag diyan kan kadaklan. An punto? Dawa pa may mga problema asin kasakitan, normal asin natural sa sato na gusto tang mabuhay. Ipinapahiling kan Bibliya na linalang nin Diyos an tawo na may pagmawot na mabuhay. Sa katunayan, sinasabi kaiyan na ‘ibinugtak niya man sa saindang puso an sagkod pa man.’—Qohelet [Parahulit] 3:11, An Banal na Biblia [Paulines].

Pero, an realidad iyo na dai nabubuhay nin daing katapusan an katawuhan. Ano an nagin problema? May ginibo na daw an Diyos para solusyunan iyan? May magayon na simbag an Bibliya. Asin igwa iyan nin koneksiyon sa kun taano ta si Jesus nagsakit asin nagadan.

Sinasabi sa sato kan inot na tulong kapitulo kan libro sa Bibliya na Genesis na tinawan nin Diyos nin oportunidad na mabuhay nin daing katapusan an inot na mag-agom, si Adan asin Eva, asin sinabi sa sainda kun ano an dapat nindang gibuhon tanganing makamtan iyan. Asin sinabi diyan na dai sinda nagsunod sa Diyos kaya nawara ninda an oportunidad na iyan. Simplehon an pagkasaysay kaya para sa iba bako iyan na totoo. Pero, an Genesis arog kan mga Ebanghelyo, napatunayan na totoong mga rekord. *

Ano an nagin resulta kan dai pagsunod ni Adan? Ini an simbag kan Bibliya: ‘Huli sa sarong tawo [ki Adan] an kasalan luminaog sa kinaban, asin an kagadanan huli sa kasalan; asin sa siring an kagadanan nakalakop sa gabos na tawo, huli ta an gabos nagkasala.’ (Roma 5:12) Nagkasala si Adan sa dai niya pagsunod sa Diyos. Kaya, nawara niya an oportunidad na mabuhay nin daing katapusan, asin pag-abot nin panahon nagadan. Nagmana kita nin kasalan huling gikan kita sa saiya. Huli kaiyan, nagkakahilang, naggugurang, asin nagagadan kita. Kauyon iyan kan paliwanag nin mga siyentista dapit sa kun paano namamana kan mga aki an partikular na mga karakteristiko kan saindang mga magurang. Pero may ginibo na daw an Diyos para solusyunan iyan?

Iyo, naggibo an Diyos nin mga areglo tanganing mabalukat o maibalik an nawara ni Adan para sa saiyang mga gikan, an oportunidad na mabuhay nin daing sagkod. Paano iyan ginibo nin Diyos?

“An bayad nin kasalan iyo an kagadanan,” an sabi kan Bibliya sa Roma 6:23. Nangangahulugan ini na kagadanan an resulta nin kasalan. Nagkasala si Adan, kaya nagadan siya. Nagkakasala kita, kaya magagadan man kita. Pero, ipinangaki na kitang makasalan, maski mayo pa kitang nagigibong sala. Kaya, mamumuton na isinugo nin Diyos an saiyang Aki, si Jesus, para iyo an ‘magbayad kan satong kasalan.’ Paano ini mangyayari?

Paagi sa pagsuway nin sarong perpektong tawo, si Adan, nagkakasala asin nagagadan kita, kaya kaipuhan an pagsunod nin saro man na perpektong tawo sagkod sa kagadanan tanganing mabalukat kita sa kasalan asin kagadanan. Arog kaini an paliwanag kan Bibliya: ‘Huli kan pagsuway kan saro an dakul nagin mga parakasala, siring man huli kan pagsunod kan saro, an dakul magigin mga matanos.’ (Roma 5:19) Si Jesus an “saro” na iyan na nagsunod. Nagbaba siya sa langit, nagin perpektong tawo, * asin nagadan para sa sato. Bilang resulta, posible sa sato na magkaigwa nin matanos na kamugtakan sa atubangan nin Diyos asin makamtan an oportunidad na mabuhay nin daing katapusan.

Taano ta kaipuhan pang magadan ni Jesus? Taano ta dai na lang naggibo an Diyos na Makakamhan sa Gabos nin bagong pagbuot na matugot sa mga naggikan ki Adan na mabuhay nin daing sagkod? May awtoridad nanggad siyang gibuhon iyan. Pero, magigin kontra iyan sa saiyang ley na kagadanan an kabayadan nin kasalan. Bako iyan na simpleng ley sana na puwedeng baliwalaon o ribayan nin basta sana. Kaipuhan iyan para sa tunay na hustisya.—Salmo 37:28.

Kun binaliwala nin Diyos an hustisya sa pagkakataon na iyan, tibaad isipon kan mga tawo na arog man kaiyan an gigibuhon niya sa ibang mga bagay. Halimbawa, magigin patas pa daw kaya siya sa pagpili kun sairisay sa mga naggikan ki Adan an magkakamit nin  buhay na daing sagkod? Makakapagtiwala pa daw kita na uutubon niya an saiyang mga panuga? An kaimbudan nin Diyos sa hustisya kan naggigibo siya nin paagi para iligtas kita nagtatao sa sato nin kasiguraduhan na pirmi niyang gigibuhon kun ano an tama.

Paagi sa kagadanan ni Jesus bilang atang, binuksan nin Diyos an dalan pasiring sa buhay na daing katapusan sa Paraisong daga. Ini an sinabi ni Jesus sa Juan 3:16: ‘An Diyos namuot na gayo sa kinaban, na itinao niya an saiyang Aking bugtong, tanganing an siisay man na minatubod sa saiya dai mapahamak, kundi magkaigwa nin buhay na dai nin katapusan.’ Kun siring, an kagadanan ni Jesus bako sanang kapahayagan kan mapagkakatiwalaan na hustisya nin Diyos, kundi lalo na, kapahayagan man iyan kan dakulang pagkamuot niya sa katawuhan.

Pero, taano ta kaipuhan ni Jesus na magsakit asin magadan sa makulugon na paagi arog kan sinasabi sa Ebanghelyo? Paagi sa pagdadanay ni Jesus na maimbod dawa may grabeng pagbalo, lubos niyang napatunayan na sala an sahot kan Diyablo na dai makakapagdanay na maimbod an mga tawo sa Diyos kun nasa pagbalo. (Job 2:4, 5) Garo baga may punto an sahot na iyan ni Satanas huling nasutsutan niya kaidto an perpektong si Adan na magkasala. Pero si Jesus—na perpektong katumbas ni Adan—nagdanay na masinunod sa ibong nin grabeng pagsakit. (1 Corinto 15:45) Pinatunayan niya na kun ginusto ni Adan, kaya kutana kaini na magin makinuyog sa Diyos. Paagi sa pagtagal sa mga pagbalo, nagwalat si Jesus nin marahayon na halimbawa na dapat tang arugon. (1 Pedro 2:21) Asin bilang balos sa perpektong pagkuyog kan saiyang Aki, tinawan nin Diyos si Jesus nin imortal na buhay sa langit.

Talagang nagadan si Jesus. Bukas na an dalan pasiring sa buhay na daing katapusan. Gusto mo daw mabuhay nin daing katapusan? Sinabi ni Jesus kun ano an dapat tang gibuhon: ‘Ini iyo an buhay na dai nin katapusan, na sinda makamidbid saimo, na ika sana an tunay na Diyos, asin ki Jesu-Cristo na saimong sinugo.’—Juan 17:3.

Iniimbitaran ka kan mga kagpublikar kan magasin na ini na makanuod nin urog pa manungod ki Jehova, an tunay na Diyos, asin sa saiyang Aki, si Jesu-Cristo. Mauugma an mga Saksi ni Jehova sa lugar nindo na tabangan ka. May nakakatabang man na mga impormasyon sa samong website na www.pr418.com/bcl.