Kai jabapndu adi kam isungkun, ”Nggit nge kam nggeluh si rasa lalap?” Banci jadi teremen kalak njabapsa nggit, tapi la mungkin iakapna. Kalak enda erpengakap maka kematen bagin i bas kegeluhen janah enda wajar.

Tapi, uga adi penungkunenna iganti janah kam isungkun, ”Nggit nge kam mate?” Teremen kalak biasana njabapsa lang. Jadi, situhuna sura-sura manusia nggeluh si rasa lalap, amin gia arus ngadapi melala perbeben. Pustaka si Badia ncidahken maka Dibata nepa manusia alu kerincuhen guna nggeluh. Nina Pustaka si Badia, ”Ia [Dibata] nge si mereken man banta kerincuhen lako meteh warinta si pepagi.”​—Pengerana 3:11.

Tapi kenyatanna, manusia la nggeluh si rasa lalap. Jadi, kai si salah? Janah, nggo nge ibahan Dibata sada tindaken guna mpesikap keadan e? Pustaka si Badia mereken jabapen si erbahan tenang pusuhta. Jabapenna erhubungen kal ras alasen ngkai maka Jesus ngenanami kiniseran janah dungna mate.

Telu pasal pemena buku Kejadin i bas Pustaka si Badia njelasken pengaturen Dibata man manusia si pemena, Adam ras Hawa. Ibereken Dibata man kalak enda kegeluhen si rasa lalap janah ipebetehkenNa uga cara mpertahankenca. Tapi dungna kalak enda la patuh man Dibata janah kebenen kegeluhen si rasa lalap. Kejadin enda ituriken alu sederhana si erbahanca nterem kalak erpengakap maka enda sada dongeng saja. Tapi, cara penulisen buku Kejadin ncidahken maka buku enda buku cataten sejarah si banci iteki, bali bagi kitap Injil. *

Kai akibat kinilapatuhen Adam? Nina Pustaka si Badia, ”Dosa enggo ngkenai kerina manusia i bas doni enda arah sekalak manusia, janah dosana e maba kematen. Erkiteken si e kematen enggo ngelangketi kerina manusia, sabap tep-tep kalak enggo erdosa.” (Roma 5:12) Adam ndabuh ku bas dosa erkiteken la patuh man Dibata. Ia kebenen kegeluhen si rasa lalap janah dungna mate. Erkiteken kita kesusurenna, kita pe ndatken warisen dosa. Enda me si erbahanca kita sakit, metua ras mate. Penjelasen enda sentudu ras penelitin ilmuwan si ngataken maka lit hal-hal tertentu si iwarisken orang tua man  anak-anakna. Tapi, nggo nge ibahan Dibata sada tindaken guna mpesikap keadan e?

Dibata nggo erbahan sada pengaturen guna ndatken mulihi kai si nggo ibeneken Adam man kesusurenna, eme kegeluhen si rasa lalap. Uga Dibata ngelakokenca?

Nina Roma 6:23, ”Upah dosa eme kematen”. Enda ertina kematen lit perban dosa. Erkiteken Adam erdosa, mate me ia. Kita pe bage. Kita erdosa janah ndatken upah dosa, eme kematen. Kita tubuh nggo erdosa. Tapi, enda labo salahta. Emaka, Dibata ngutus anakNa, Jesus, guna nanggung ”upah dosa” man banta. Uga carana?

Dosa ras kematen lit erkiteken kinilapatuhen sada manusia si sempurna, Adam. Emaka, guna mulahi kita i bas upah dosa nari, iperluken sada manusia si sempurna si patuh seh ngasa mate. Nina Pustaka si Badia, ”Bagi kerina manusia jadi kalak perdosa erkiteken kinilapatuhen si sekalak jelma e, bage me pe kerina manusia iperembak ras Dibata erkiteken kepatuhen sekalak jelma si deban, e me Jesus Kristus.” (Roma 5:19) Jesus me ”sekalak jelma” e. Itadingkenna surga, jadi manusia si sempurna *, janah mate guna man banta. Hasilna? Banci sidatken hubungen si mehuli ras Dibata janah ndatken kesempaten guna nggeluh rasa lalap.

Tapi, ngkai maka Jesus arus mate gelah si enda kerina banci terjadi? La kin banci mis ibahan Dibata si Mada Kuasa kesusuren Adam nggeluh si rasa lalap? Situhuna banci. Tapi, adi ilakokenNa si e, enda banci ertentangen ras hukum si nggo ibahanNa eme upah dosa e kematen. Hukum enda la banci iganti bage saja. Sabap, enda me ciri keadilen situhu-tuhu.​—Masmur 37:28.

Adi kompromi Dibata i bas bidang enda, banci saja kalak erpengakap maka i bas bidang si deban pe Dibata banci kompromi. Misalna, adil nge Dibata paksa nentuken ise saja kesusuren Adam si banci  nggeluh si rasa lalap? Banci nge kita tek maka Dibata pasti nepati janjiNa? Tapi, erkiteken Dibata ertindak sentudu ras janjiNa janah la kompromi, banci kita tek maka terus ilakokenNa kai si benar.

Erkiteken Jesus mate guna banta, Dibata banci mbuka dalan man manusia gelah banci ngenanami kegeluhen si rasa lalap bas Pardis i doni. Nina Jesus i bas Johanes 3:16, ”Bage pengkelengi Dibata doni enda, e maka iberekenNa anakNa sitonggal, gelah ola bene ise pe si tek man bana, tapi gelah dat kegeluhen si tuhu-tuhu si la erkeri-kerin.” Kematen Jesus eme bukti keadilen Dibata janah bukti maka Ia tuhu-tuhu ngkelengi manusia.

Tapi, ngkai maka Jesus arus ngenanami kiniseran janah arus mesui kal perpatena bagi si ijelasken bas Injil? Alu tetap setia amin gia ngadapi kiniseran si mberat, Jesus mbuktiken alu jelas ras erkedungen maka tuduhen Setan e salah. Ituduh Setan maka manusia la banci tetap setia man Dibata paksa ngadapi percuban. (Jop 2:4, 5) Paksa Adam ngelakoken dosa, tuduhen e bagi tempa-tempa tuhu. Tapi, Jesus si sempurna, si keadanna bali bagi Adam, banci tetap setia amin gia ngenanami kiniseran. (1 Korinti 15:45) Jesus mbuktiken maka situhuna Adam pe banci setia adi ia nggit. Jesus la nerah paksa ngadapi percuban janah ia jadi usihen si mehuli man banta. (1 Petrus 2:21) Dibata masu-masu Jesus erkiteken kepatuhenna si sempurna alu mereken kegeluhen si la erkeri-kerin i surga.

Kematen Jesus tuhu-tuhu terjadi janah enda mereken kesempaten man banta guna nggeluh si rasa lalap. Nggit nge kam nggeluh si rasa lalap? Ipebetehken Jesus carana alu ngataken, ”Kegeluhen si tuhu-tuhu si la erkeri-kerin e: Itandai kalak Kam ngenca Dibata si tuhu-tuhu, dingen itandaina Jesus Kristus si suruhNdu.”​—Johanes 17:3.

Penerbit majalah enda ngundang kam gelah ipelajarindu terbuen kerna Dibata situhu-tuhu, Jahwe, ras anakNa, Jesus Kristus. Meriah ukur Saksi-Saksi Jahwe si lit i daerahndu guna nampati kam erlajar. Kam pe banci ndatken keterangen si debanna si erguna man bandu alu ngenehen situs web kami, www.pr418.com/btx.