Met kopwe erá ika emén a eisinuk: “Ka mochen manawfóchofóch?” Lape ngeni aramas eli repwe apasa pwe ra mochen nge ra meefi pwe a lamotongaw le ekieki. Me rer máló kinikinin manawen aramas, ina pwúkútáách pwe sipwe máló.

Nge ika a siwil ena kapas eis, emén a eisinuk: “En mi mmólnetá le máló?” Lón fansoun mi núkúnúkéch lape ngeni aramas repwe apasa aapw. Iwe, met weween? Weween pwe ach mochen manaw pwúkún ina tipach, inaamwo ika sia nóm fán weires me riáfféú. Ewe Paipel a áiti ngenikich pwe Kot a fératá aramas pwe repwe tipeni me mochen manaw. Ren enletin, Paipel a erá: “A pwal atolonga ekiekin fansoun esemwüch lon letipen aramas.”​—Än Salomon Afalafal 3:11.

Nge ren enletin, aramas rese manawfóchofóch. Pwata, met a fis? A wor met Kot a fen féri pwe epwe pwákini ena mettóch? Minne ewe Paipel a pélúweni a mmen alúkúlúk, me a riri ngeni ewe popun Jesus a kúna riáfféú me máló.

Sópwun 1 ngeni 3 lón ewe puken Paipel itan Keneses a áiti ngenikich pwe Kot a isetiw mwen ewe áeúin pean pwúpwúlú Atam me Efa, ewe ápilúkúlúkún manaw esemuch, me a ereniir met a lamot repwe féri pwe repwe eáni. Mwirin, ewe pwóróus a áiti ngenikich ifa usun ra álleasolapa Kot me péútaaló ena ápilúkúlúk. Ewe pwóróus ese tichik me mecheres le weweiti ina popun ekkóch ra mwittir apwúngaló pwe ina eú chék tutulap. Nge Keneses a usun chék ewe Puken Kapas Allim masouan lón a pwúng.

Ifa mwirilóón án Atam álleasolap? Ewe Paipel a erá: “Ren eman mwän [Atam] tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Ren an álleasolapa Kot, Atam a tipis. A péút seni an we ápilúkúlúkún kúna manaw esemuch, me ló, ló, ló a máló. Pokiten kich mwirimwirin, sia pwal álemwiri tipis. Ina popun, sia semmwen, chinnapeló me máló. Ena áwewe usun ewe popun sia máló a riri ngeni minne sia silei usun ewe mettóch álemwiri. Nge itá Kot a féri och mettóch pwe epwe pwákini ena osukosuk?

Ewer, Kot a fen méénisefáli minne a péút seni Atam, weween ewe ápilúkúlúkún manaw esemuch. Ifa usun Kot a féri ena?

Iei alon Paipel lón Rom 6:23: “Liwinin tipis mäla.” Weween mwirilóón tipis máló. Atam a tipis ina popun a máló. Pwal ina chék usuch, sia tipis ina minne sia pwal nóm fán ewe liwinin tipis máló. Nge ach uputiw lón tipis esap tipisich. Iwe fán tong, Kot a tiinaato Néún we Jesus pwe epwe omusa senikich “liwinin tipis.” Ifa usun?

Ren emén mwán, ewe mi unuséch Atam, a ngenikich tipis me máló ren an álleasolap, iwe a lamot emén mwán mi unuséch epwe álleasochis tori máló pwe epwe angasakicheló seni ena osochou. Ewe Paipel a áwewe ei ren an erá: “Aramas meinisin ra tipis pokiten än ewe eman mwän aleasolap, ina chök usun chomong aramas repwe pwal küna pwüng me ren Kot pokiten än ewe eman mwän aleasochis.” (Rom 5:19) Ewe “eman mwän” ina i Jesus. A likitaló láng pwe epwe wiliti emén aramas mi unuséch *, mwirin, máló fán ásengesich. Pokiten ena, a atufichikich le úéch mwen mesen Kot me eáni ápilúkúlúkún manaw esemuch.

Nge pwata a lamot Jesus epwe máló ren an epwe apwénúetá ena? Ewe Kot mi Unusen Manaman ese chék tongeni erá pwe mwirimwirin Atam kewe repwe kúna manaw esemuch? Pwúngún pwe a wor an manaman le féri ena. Nge epwe wewe ngeni an atai ewe allúk a fen fférútiw pwe liwinin tipis máló. Ena allúk esap och allúk mi tongeni moneló are siwili ineet chék a mochen. Pún ina lóngólóngun enletin pwúngiéch​—Kölfel 37:28.

Ika Kot a likitaló pwúngiéch lón ena atun, aramas repwe ekieki pwe a tongeni féri ina usun lón pwal ekkóch fansoun. Áwewe chék, itá Kot epwe wenechar le filatá ié kewe me lein mwirimwirin Atam kewe repwe fich fán iten manaw esemuch? Kich mi tongeni lúkúlúkú pwe epwe apwénúetá  minne a pwonei? Án Kot fitipachei pwúngiéch fán iten ach kúna manaw a alúkúlúkúkich pwe epwe féri minne mi pwúng fansoun meinisin.

Ren án Jesus asoresini manawan, Kot a suuki ewe alen manaw esemuch lón Paratis wóón fénúfan. Ekieki alon Jesus lón Johannes 3:16: “Iei usun Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.” Án Jesus máló a ánnetatá esap chék án Kot pwúngiéch mi enlet nge ákkáeúin, an tong mi lap fán iten chón fénúfan.

Iwe nge, pwata epwe lamot án Jesus kúna riáfféú me máló fán weires usun minne a mak lón ewe Puken Kapas Allim? Ren án Jesus onómu pwisin i fán sóssót mi lululó me akkamwéchú an tuppwél, a unusen ánnetatá fán eú chék pwe mi chofona meinisin alon Tefil kewe pwe aramas resap tongeni tuppwél ngeni Kot ika ra nóm fán riáfféú. (Hiop 2:4, 5) Usun nge alon Satan a pwúng atun an etipetipa ewe mwán mi unuséch Atam an epwe tipis. Nge Jesus, ewe a wesewesen léllé ngeni Atam, a amwéchú an álleasochis inaamwo ika fán riáfféú watte. (1 Korint 15:45) Iwe a ánnetatá pwe Atam a pwal tongeni álleasochisi Kot ika pwe a filatá. Ren án Jesus likiitú fán sóssót, a isetiw ngenikich eú leenien áppirú ach sipwe tapweló mwirin. (1 Petrus 2:21) Kot a efeiéchú án Jesus unusen álleasochis ren an fang ngeni ewe sókkun manaw esemuch lón láng ewe esap tongeni taló me kitetteriló.

Án Jesus máló a wesewesen fis. Mi suuk ewe alen ach sipwe kúna manaw esemuch. Ka mochen manawfóchofóch? Jesus a erenikich met a lamot sipwe féri ren an erá: “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”​—Johannes 17:3.

Ewe chón féri ei puk a etiwok óm kopwe alapaaló óm sile usun ewe Kot mi enlet Jiowa me usun Néún we Jesus Kraist. Chón Pwáraatá Jiowa lón leeniom we repwe pwapwa le álisuk. Ka pwal tongeni kúna pwóróus mi álilliséch ren óm tétá wóón ám website, www.pr418.com.