“Zungzal in nun na duh maw?” tiah an in hal ahcun zeitindah na leh lai? Mi tampi nih cun kan duh tiah an ti ko lai. Asinain mah cu a si kho lomi a si tiah an ruah. Thih cu a phung a si ko, nun hnuah cun thih pei a hau cu tiah an ti.

Mah biahalnak he i ralkah in “Thih na duh maw?” tiah an in hal ah tah zeitin? Mi tam deuh nih cun thih kan duh lo tiah an ti ko lai. Mah nih zeidah a langhter? Harnak le buaibainak kan ton hmanhah nun kan duh rihmi cu a phung a si ko. Zeicahtiah Pathian nih “zungzal nun duhnak kha minung kan lungthin chungah a chiah” tiah Baibal nih a ti.—Phungchimtu 3:11, NW.

A taktak ah minung cu zungzal in an nung lo ti cu a hmaan ko. Cu a si ah zeidah a palh? Mah thil sining remh awkah Pathian nih thil pakhatkhat a tuah maw? Mah kong he aa tlaiin Baibal chimmi cu lungthawh awk ngai a si, mah cu Jesuh nih fahnak in buin a thihnak he direk in aa pehtlai.

Baibal chung i Genesis cauk a hmasa dal 3 ah hmasa bik nuva, Adam le Evi nih an hmuh khawhmi zungzal nunnak kong le zungzal nunnak an hmuh khawh nakhnga an tuah dingmi kong hna aa tel. Mah lengah Pathian bia an ngaih lo caah zungzal nunnak an sunghnak a ruang zong aa tel. Thil sining cu a sawhsawh te a si caah mi cheukhat nih tuanbia men in an ruah. Asinain Thawngṭha cauk bantukin Genesis Baibal cauk cu a hmaanmi a si ti a langhtermi tuanbia lei kong tampi a um. *

Adam nawlngaih lo ruangah zeidah a cang? Baibal nih hitin a ti: “Sualnak cu mipa [Adam] pakhat thawngin vawleicung ah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) Adam nih Pathian bia ngaih loin sualnak a tuah. Cucaah zungzal nunnak nawl a hmuhmi kha a sung i a donghnak ah a thi. A tefa a simi kannih zong mah sualnak ro kha kan co ve. Mah ruangah kan zaw, kan tar i kan thi. Kan thihnak a ruang fianternak cu tuchan Scientist pawl nih an cohlanmi cikor zawtnak he aa lo. Asinain mah thil sining remh awkah Pathian nih thil pakhatkhat a tuah maw?

Adam ruangah a tefa nih an sunghmi zungzal nunnak hmuh ṭhan awkah Pathian nih a timhtuah. Zeitindah Pathian nih a timhtuah?

Rom 6:23 ah “sualnak man cu thihnak a si” tiah a ti. Mah cu sualnak nih thihnak a chuahter tinak a si. Adam cu sualnak a tuah caah a thi. Cu bantukin kannih zong sualnak kan tuah caah sualnak man a simi thihnak kha kan in ve. Asinain kan thihmi cu kanmah sualnak ruangah si loin kan comi sualnak ruangah a si. Cucaah kan sualnak in tlanh awkah Pathian nih a Fapa Jesuh kha a rak thlah. Mah nih zei ṭhatnak dah a chuahter?

Mitling a simi, mipa pakhat Adam nawlngaih lonak nih sualnak le thihnak a chuahter caah mah in kan luat nakhnga a tlingmi mipa pakhat nih a thih tiang nawl a ngaih a hau. Baibal nih hitin a fianter: “Mipa pakhat nawlngaih lo ruangah mi tampi kha misual i ser an si bantukin mipa pakhat nawlngaih ruangah mi tampi cu miding ah ser an si lai.” (Rom 5:19) Mah “mipa pakhat” timi cu Jesuh a si. Jesuh nih vancung kha a kaltak, cun a tlingmi minung pakhat * a hung si i kan caah a nunnak a pek. Cucaah Pathian hmaiah a dingmi kan hung si kho i zungzal nunnak kan hmu kho.

Jesuh nih zeicah a nunnak a pek a herh? Cungnung Bik Pathian nih Adam tefa zungzal nunnak hmuh awkah nawl a chuah kho lo maw? Pathian nih cutin tuahnak nawl a ngei ko. Asinain cutin a tuah ahcun sualnak man cu thihnak a si timi amah nih a rak chuahmi nawlbia a upat lo a si lai. Nawlbia timi cu thil sining cungah i hngat in hrawh khawhmi le thlen khawhmi phunglam pakhat a si lo. Dinnak taktak caah a hrampi a si.—Salm 37:28.

Mah thil sining ah Pathian nih dinnak kha zeirel loin a tuah ahcun a dang thil sining zongah cutin a tuah ko lai tiah mi nih an ruah khawh men. Tahchunhnak ah, Adam tefa chungin ahote dah zungzal nunnak hmuh awkah aa tlak timi biakhiahnak ah tah Pathian nih ding tein a tuah lai maw? A biakam  hna tah zumhawk an tlak maw? Kanmah khamh awk i rian a ṭuan tikah dinnak aa tlaih peng caah Pathian tuahmi kip cu a ding zungzal lai tiah kan zumh khawh.

Jesuh tlanhnak man thawngin Pathian nih vawleicung Paradis i zungzal nun awkah lam a kan awnpiak. Johan 3:16 ah aa ṭialmi Jesuh bia hi i cinken: “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.” Jesuh thihnak nih Pathian i zumhawktlakmi a dinnak lawng si loin minung cungah a langhtermi a nganmi a dawtnak zong a langhter.

Asinain Thawngṭha cauk ah aa ṭial bantukin zeicah Jesuh cu fahnak in buin a thih? Jesuh nih a fak tukmi hneksaknak lakah zumhfek tein a umnak thawngin minung nih harnak an in tikah zumhawktlak tein an um kho lai lo timi Satan sualphawtnak kha voikhat ah zaa lakin a rak leh khawh. (Job 2:4, 5) Satan nih a tlingmi Adam kha a tukforh khawh caah mah sualphawtnak bia cu a hmaanmi a lo. Asinain Adam bantukin mitling a simi Jesuh nih fahnak tampi a in buin nawlngaihnak kha a rak langhter. (1 Korin 15:45) Cucaah Adam nih nawlngaih awkah aa thim ahcun Pathian nawl a ngaih khawh ko ti kha Jesuh nih a langhter. A fak tukmi hneksaknak hna a tei khawhnak thawngin Jesuh nih kan caah zohchunh awk ṭha a chiah. (1 Piter 2:21) Jesuh nih tling tein nawlngaihnak a rak langhter caah Jehovah nih a thi kho lomi vancung nunnak laksawng a pek.

Jesuh thihnak cu a cang taktakmi a si. Asinain zungzal nun khawhnak lam a um ko. Zungzal in nun na duh maw? Jesuh nih kan tuah dingmi kong he aa tlaiin hitin a chim: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.”—Johan 17:3.

Hi mekazin a chuahtu hna nih a hmaanmi Pathian Jehovah le a Fapa Jesuh Khrih kong tam deuh in hngalh awkah bawmh an in duh. Na umnak hmun ah a ummi Jehovah Tehte Hna nih lunglawm tein an in bawmh lai. Tam deuh in hngalh na duh ahcun kan website, www.pr418.com/cnh ah zoh khawh a si.