Vakacava ke dua e tarogi iko, “O via bula tawamudu?” E levu era na vinakata qori, ia era nanuma ni na sega ni yaco. Era na kaya ni mate e tiki ni noda bula, eda na tini kece ga kina.

Ia vakacava ke veisautaki va qo na taro, “O tu vakarau mo mate?” E levu era na sega ni duavata kina. Na vuna? Se mani vakacava na tuvaki dredre eda sotava, e dau kena ivakarau ga meda via bula. Na iVolatabu e vakaraitaka ni Kalou e biuta e lomada na gagadre ni bula. E kaya, ni “biuta mada ga e lomadra na gauna e sega ni mudu.”—Dauvunau 3:11.

Ia eda se sega ni bula tawamudu. Na cava na vuna? Vakacava, e sa cakava e dua na ka na Kalou me walia kina na ituvaki qori? E veivakacegui na isaunitaro ena iVolatabu, e dusia vakamatata tale ga na vuna e mate vakararawa kina o Jisu.

Na imatai ni tolu na wase ena ivola vakaivolatabu na Vakatekivu e vakamacalataka ni Kalou e tukuna vei rau na imatai ni veiwatini o Atama kei Ivi na inuinui ni bula tawamudu, kei na ka me rau cakava me rawati kina. E tukuni tale ga kina na nodrau talaidredre vua na Kalou kei na nodrau vakayalia na inuinui qori. E matata sara tu ga na italanoa qori—na kena matata era tukuna kina eso ni italanoa buli. Me vaka ga na Kosipeli, na veika era kune ena Vakatekivu e vakaraitaka ga ni dodonu vinaka na kena ivolatukutuku makawa. *

Na cava e yaco ni talaidredre o Atama? E sauma na iVolatabu: “Ena vuku ni dua ga na tamata [Atama] e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.” (Roma 5:12) E valavala ca o Atama ni talaidredre vua na Kalou. E vakayalia na inuinui ni bula tawamudu mani tini mate kina. Nida nona kawa, e dewa mai vei keda na nona ivalavala ca. Eda mai vakila kina na tauvimate, bula vaqase kei na mate. Na vakasama qori e veisemati vinaka kei na ka e dau tukuni nikua ni o ira na gone era ucui nodra itubutubu se dewa vei ira eso na ka era kilai kina nodra  itubutubu. Ia vakacava sa cakava na Kalou e dua na ka me walia kina na ituvaki qo?

E vakarautaka na Kalou na ituvatuva me volia lesu kina na veika e vakayalia o Atama vei ira na nona kawa, na bula tawamudu. E cakava vakacava qori?

E tukuni ena Roma 6:23: “Na isau ni ivalavala ca na mate.” Kena ibalebale eda mate ena vuku ni ivalavala ca. E mate o Atama ni valavala ca, qori tale ga na ka e yacovi keda. Ia e sega nida vakavuna noda sucu ivalavala ca. Sa qai tala vakayalololoma na Kalou na Luvena o Jisu, me colata na ‘isau ni valavala ca’ ena vukuda. E rawa vakacava qori?

O Atama a bula uasivi, ia ena vuku ni nona talaidredre e vakavuna kina meda ivalavala ca, meda mate tale ga. Ena vinakati gona e dua na tamata uasivi me talairawarawa me yacova nona mate me vakabulai keda mai na isau ni ivalavala ca. E vakamacalataka va qo na iVolatabu: “Ena nona talaidredre gona e dua ga na tamata e okati kina e levu mera ivalavala ca, ia na nona talairawarawa e dua ga na tamata era na okati kina e levu mera yalododonu.” (Roma 5:19) Na dua ga na “tamata” talairawarawa qori o Jisu. E biuti lomalagi, yaco me tamata uasivi * qai mate ena vukuda. E rawa kina nida yalododonu ena mata ni Kalou da qai nuitaka na bula tawamudu.

Na cava me mate sara kina o Jisu? A rawa vua na Kalou Kaukaua Duadua me vakarautaka e dua na lawa meda bula tawamudu kina na kawa i Atama, se vakaevei? E tu vua na kaukaua me cakava qori. Ia ena vakacala tale kina na lawa sa vakarota me baleta na isau ni ivalavala ca na mate. Qori e sega ni dua wale ga na lawa lailai me vakawaleni tu ga, se veisautaki me rawa nida vakacegui ga kina. Qo e yavu sara ga ni lewadodonu.—Same 37:28.

Ke sega ni lewadodonu na Kalou ena gauna ya, ena rairai lomatarotarotaki eso tale na vakatulewa  e cakava. Kena ivakaraitaki, vakacava ena donu nona vakatulewataka se o cei vei ira na kawa i Atama mera bula tawamudu? E rawa ni nuitaki ni dau dina ena nona yalayala? Nona vakaraitaka na lewadodonu me rawa kina nida bula, e vakadeitaka na Kalou ni na cakava tu ga na ka e dodonu.

Ni mate vakaisoro o Jisu, e dolava kina na Kalou na sala ina bula tawamudu ena vuravura Parataisi. Dikeva na vosa i Jisu ena Joni 3:16: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.” Na mate i Jisu e ivakaraitaki ni nona lewadodonu na Kalou, ia o koya e bibi sara ni lomani keda vakalevu.

Ia na cava me mate vakararawa kina o Jisu me vaka e volai ena Kosipeli? Na nona yalodina tiko ga o Jisu ni sotava na veivakatovolei kaukaua, e vakalasuya kina na nona veibeitaki na Tevoro, oya nida na sega ni talairawarawa vua na Kalou ke da vakatovolei. (Jope 2:4, 5) A rairai dina na veibeitaki qori ena nona rawai o Atama ena veitemaki i Setani. Ia o Jisu—na isosomi uasivi i Atama—e yalodina tiko ga ni vakararawataki vakalevu. (1 Korinica 15:45) E vakadinadinataka o Jisu ni rawa tale ga vei Atama me talairawarawa vua na Kalou ke vinakata. Ena nona vosota na veivakatovolei, e laiva kina vei keda o Jisu na ivakaraitaki meda muria.—1 Pita 2:21. Na Kalou e vakalougatataka nona talairawarawa vakaoti na Luvena, e solia kina vua na bula tawamate mai lomalagi.

A mate dina o Jisu. E dolava kina na sala meda bula tawamudu. Vakacava o via bula tawamudu? E vakaraitaka o Jisu na ka meda cakava ena nona tukuna: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.”—Joni 17:3.

Oni sureti moni vulica e levu tale na ka me baleta na Kalou dina o Jiova, kei na Luvena o Jisu Karisito. Era na marau na iVakadinadina i Jiova ena vanua o vakaitikotiko kina mera vukei iko. E rawa tale ga ni o kunea eso na itukutuku yaga ni o rai ena neimami website, na www.pr418.com.