«¿Kateesü poʼu süpüla kaʼikat süpüshuaʼa?», nümünüle amüin wanee wayuu, eeshijaʼa süpüla nümüin: «Jamüsaʼa. Nnojotpejeʼe kasakainjatüin shia watuma, ouktajachia neʼe wayuu waneepia».

«¿Oukteeshi pia jooluʼucheʼechon?», nümünüle amüin wanee wayuu, «nnojottaa» meechi nia. Jaʼitairü kasain alatüin wamüin, nnojoishii waya oukteein. Saashin tü Wiwüliakat, niʼitaatüjülia Maleiwa suluʼu naaʼin chi wayuukai katüinjatüin noʼu süpüla kaʼikat süpüshuaʼa (Eclesiastés 3:11).

Nnojotsü eein wayuu eekai katüin soʼu waneepia maaʼulu yaa. ¿Jamüsüche makaʼa wakuwaʼipa? ¿Kasa naaʼinraka Maleiwa süpüla nnojoluinjatüin ouktüin wayuu? Atalatalaasü waaʼin sutuma tü sümakat tü Wiwüliakat süchiki tia ooʼulaka sünainpünaasü tü alatakat nümüin Jesuu.

Suluʼu Génesis kapiitulo 1 sünainmüin 3, nüküjüin Maleiwa nümüin Adán sümaa Eva tü naaʼinrajatkat süpüla katüinjatüin noʼu süpüla kaʼikat süpüshuaʼa. Aküjünapejeʼe yala sünain neʼrüliijaain wayumüin nümüin Maleiwa, müshiijeseʼe ouktüin naya. Nnojotpejeʼe nanoujain anain tia na wayuukana süka müin shia aka saaʼin wanee kuenta naajüin. Nnojotsü alawaain tü aküjünakat suluʼu Génesis, shiimain tia maʼaka shiimain tü nümakat Mateo, Marcos, Lucas otta Juan. *

¿Kasa alataka sutuma niʼrüijaain wayumüin Adán nümüin Maleiwa? Anuu sünüiki tü Wiwüliakat süchiki tia: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Süka niyouktajaain Adán sümaa nünüiki Maleiwa, laülaashi nia jee ouktüshi saaliijee naainjala. Makaʼa laülaain waya, ayuulin waya jee ouktüin waya shia süka nuuʼuliwoʼuin waya Adán. Tia, shia tü waʼleche niʼipünaalakat wapüla Adán. Joʼu wekirajaai sünain tü naaʼinrakat Maleiwa süpüla nunoukteʼerüin tü alatakat.

Nukumajamaatüin Jeʼwaa sukuwaʼipa süpüla katüinjatüin noʼu waneepia na nuuʼuliwoʼukana Adán. ¿Kasa naaʼinraka Jeʼwaa süpüla nuuntüin tia?

«Chi wayuu ayatakai süchepchiain kaainjalaa, shiimüin ouktajachin nia saaliijee», müsü tü Wiwüliakat (Roma 6:23). Makaʼa ouktüin Adán shia süka kaainjalain nia, akaataajaʼa wayakana, ouktüshii waya süka waleʼeruʼuin tü kaainjalaakat. Amülialaasü naaʼin Jeʼwaa waalin süka nnojoluin wasirüin tü alatakat chayaa Edén, müshijeseʼe nüjütüin Jeʼwaa chi Nüchonkai süpüla «nuwalaajüin» tü waainjalakat. ¿Jamüsü sukuwaʼipa süpüla nuwalaajüin wojuyaala?

Sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktüshiijeseʼe naya saaliijee tia. Shiasaʼa joo süpüla suwalaajünüin saainjala wayuu, acheküshi naapajiraainjachin nikii wanee wayuu maainjalasai. Anuu sünüiki tü Wiwüliakat süchiki tia: «Saaʼujee moonooin Adán sümaa nünüiki Maleiwa, oʼttüsü wayuu ütamüinreʼeya sünain kaainjalaa. Otta müsia jooluʼu, saaʼujee noonooin Jesucristo sümaa nünüiki Maleiwa, eeitpa süpüla anajiraain wayuu maleekalia» (Roma 5:19). Niakalaka Jesuu ouktüin saaʼu waainjala, süka jamüin, niain wanee wayuu maainjalasai *. Suluʼujee tia, wulesü wakuwaʼipa noʼuluʼu Maleiwa otta naapeerü wamüin tü kataakalü oʼuu waneepia.

¿Jamüshi niaka aneekünüin Jesuu süpüla ouktajachin saaʼu waainjala? ¿Nnojotsüche süpüla nüikkaleʼerüin Maleiwa wanee pütchi eere nüküjüin sünain katüinjatüin noʼu waneepia na nuuʼuliwoʼukana Adán? Naaʼinrayüleje tia Maleiwa, mojutsüje nümüin tü nünüikikat sünain ouktajachin wanee wayuu saaʼu naainjala. Kapüleesü tia süpüla suʼwanajünakuʼu sümünüinjatüin. Nnojoleerü lotuin nukuwaʼipa Jeʼwaa nuʼwanajaale tia (Salmo 37:28).

Müleka nüikkaleʼerayüleje Jeʼwaa tia pütchikat, nnojotsüje eʼitaain saaʼin wayuu nünain Jeʼwaa, süka jamüin nuʼwanajakuʼu nümüin tü nünüikikat. Nüneeküle Jeʼwaa noʼutku na nuuʼuliwoʼukana Adán süpüla katüinjatüin noʼu süpüla kaʼikat süpüshuaʼa, nnojotsüje nikeraajüin tü pütchi nüpansaajakat paala  sümaiwa. Nnojotpejeʼe naaʼinrüin tia, suluʼujee tia weʼitaain waaʼin sünain aneerüin wakuwaʼipa nutuma Jeʼwaa mapa.

Sutuma naapajiraain nikii Jesuu saaʼu wayuu süpüshuaʼa, eeitpa süpüla katüin noʼu na wayuukana süpüla kaʼikat süpüshuaʼa suluʼu tü Paʼaraiisükat yaa mmapaʼa. Müshijeseʼe nümüin Jesukürisüto: «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain ouktüin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM). Aishaatashii waya nüpüla Jeʼwaa, müshijeseʼe nuluwataain chi nüchonkai süpüla ouktüin nia saaʼu waainjala. Lotusü nukuwaʼipa Jeʼwaa.

¿Jamaka müliaka maʼin Jesuu atumawaa wanaa sümaa nuʼutünüin aaʼin? Waneepiashi Jesuu nümaa Maleiwa ouktaleepa nia. Niiʼiyatüin süka tia naaʼinrakat sünain eein süpüla waneepiain wayuu nümaa Maleiwa jaʼitashi niʼrüin müliaa (Job 2:4, 5). Naashin chi Yolujaakai, nnojoleechi waneepiain wanee wayuu nümaa Maleiwa müleka niʼrüle müliaa. Müsü shiimainyaakai saaʼin tia süka nujutuuin Adán nutuma chi Yolujaakai saʼaka tü kaainjalaakat, eerejeʼe lotuin nukuwaʼipa Adán. Nnojoipejeʼe akanaluuin Jesuu nutuma chi Yolujaakai, ayatshia waneepiain nia nümaa Maleiwa mayaapejeʼe niʼrüin müliaa (1 Corinto 15:45). Anasüje nukuwaʼipa Adán müleka noonooyüireje sümaa nünüiki Jeʼwaa, ichaʼasa Jesuu, isayaala joo shia nüchiki. Akaʼaya wayakana, wainkeerü woonooin sümaa nünüiki Jeʼwaa maʼaka naaʼin Jesuu (1 Pedro 2:21). Anasü nukuwaʼipa Jesuu nutuma Jeʼwaa saaʼu noonooin nümaa waneepia, müichimaʼale nnojoluin ouktüin Jesuu piantua.

Shiimain nuʼutünüshinkain aaʼin Jesuu, suluʼujee tia, eeitpa süpüla katüin soʼu wayuu süpüla kaʼikat süpüshuaʼa. ¿Kateesü poʼu süpüla kaʼikat süpüshuaʼa? Anuu tü paaʼinrajatkat müleka püsaʼwateere tia naashin Jesuu: «Kateerü noʼu waneepia chi wayuu ekirajaakai waneepia püchiki piakai chi Maleiwa shiimainshikai otta nüchiki Jesukürisüto, chi püjünalakai» (Juan 17:3, TNM).

Pikirajaa nünain Maleiwa otta nünain Jesukürisüto naashin na kakumalakana rewiisütakat tüü. Pikirajaweere, pürütkaa nanainmüin na aküjüliikana pütchi nüchiki Jeʼwaa kepiakana pejepünaa pünain. Pütüjeere sooʼomüin, püchajaa suluʼu www.pr418.com.