Ano ang isabat mo kon pamangkuton ka, “Gusto mo bala mabuhi sing wala katapusan?” Ayhan ang kalabanan masiling nga gusto nila, pero pamatyag nila imposible ini. Bahin na sang pagkabuhi ang kamatayon, siling nila, tanan kita dira mapadulong.

Pero baliskaron naton abi ang pamangkot, “Handa ka na bala mapatay?” Sa normal nga mga kahimtangan, ang kalabanan masabat sing indi. Ngaa? Wala sapayan sang mga pagtilaw kag kabudlayan, ang aton natural nga handum amo ang mabuhi. Ginapakita sang Biblia nga gintuga sang Dios ang mga tawo nga may handum kag luyag nga mabuhi. Nagasiling pa gani ini nga “ginbutang man niya sa ila tagipusuon ang wala sing katubtuban.”—Manugwali 3:11.

Pero ang matuod, wala nagakabuhi sing dayon ang mga tawo. Ngaa natabo ini? Dugang pa, may ginhimo bala ang Dios agod masolusyunan ini? Makalilipay ang mga sabat sang Biblia, kag may kaangtanan gid ini kon ngaa nag-antos kag napatay si Jesus.

Ginasugiran kita sang Biblia sa una nga tatlo ka kapitulo sang Genesis nga katuyuan sang Dios nga mabuhi sing dayon ang una nga mag-asawa nga sanday Adan kag Eva kag ginsilingan sila kon ano ang himuon agod matigayon ini. Dayon ginasugid sang kasaysayan nga wala nila gintuman ang Dios gani wala nila ini matigayon. Simple lang ang pagsaysay sini amo nga ginakabig ini sang iban nga uluistorya lang. Pero pareho sang mga Ebanghelyo, ginapakita sang Genesis nga matuod gid ini nga kasaysayan. *

Ano ang resulta bangod wala magtuman si Adan? Ang Biblia nagasabat: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.” (Roma 5:12) Bangod wala gintuman ni Adan ang Dios, nakasala sia. Gani nawasi niya ang paglaum nga kabuhi nga dayon kag napatay sang ulihi. Bangod mga kaliwat kita niya, napanubli naton ang iya makasasala nga kahimtangan. Bilang resulta, nagabalatian kita, nagatigulang, kag nagakapatay. Ini nga paathag kon ngaa nagakapatay ang tawo nagahisanto sa nadiskobre sang mga sientipiko parte sa mga kinaiya nga ginapanubli sang mga bata sa ila mga ginikanan. Apang may ginhimo bala ang Dios agod masolusyunan ang kahimtangan?

Naghimo sing kahimusan ang Dios agod tubson, ukon gawaron, ang nawasi ni Adan para sa iya mga kaliwat, ang paglaum nga kabuhi nga wala sing katapusan. Paano ini ginhimo sang Dios?

“Ang bayad sa sala amo ang kamatayon,” siling sang Biblia sa Roma 6:23. Buot silingon ang kamatayon resulta sang sala. Nakasala si Adan, gani napatay sia. Nagapakasala man kita, gani mapatay man bilang kabayaran sa sala. Pero bisan indi kita ang balasulon, natawo kita sa sining makasasala nga kahimtangan. Gani mahigugmaon nga ginpadala sang Dios ang iya Anak nga si Jesus, agod bayaran ang aton sala. Paano?

Nagresulta sa sala kag kamatayon sang mga tawo ang indi pagtuman sang isa ka himpit nga tawo nga si Adan, gani ang pagtuman sang isa ka himpit nga tawo tubtob sa kamatayon amo ang kinahanglan agod mahilway kita sa sala kag kamatayon. Ang Biblia nagapaathag sini: “Subong nga paagi sa pagkadimatinumanon sang isa ka tawo madamo ang nangin makasasala, paagi man sa pagkamatinumanon sang isa ka tawo madamo ang mangin matarong.” (Roma 5:19) Si Jesus amo inang “isa ka tawo.” Nagbiya sia sa langit, nangin isa ka himpit nga tawo, * kag napatay para sa aton. Bilang resulta, mahimo na naton matigayon ang matarong nga kahimtangan sa atubangan sang Dios kag ang kabuhi nga wala sing katapusan.

Pero ngaa kinahanglan gid mapatay si Jesus agod mahimo ini? Indi bala puede nga imando lang sang Labing Gamhanan nga Dios nga tugutan nga mabuhi sing dayon ang mga kaliwat ni Adan? May awtoridad sia sa paghimo sini. Pero magalapas ini sa ginsiling niya nga kasuguan nga ang bayad sang sala amo ang kamatayon. Ini nga kasuguan indi witiwiti lang nga pagsulundan nga sarang pasapayanan ukon bag-uhon para sa iya kapuslanan. Importante ini sa matuod nga katarungan.—Salmo 37:28.

Kon wala ginpatuman sang Dios ang katarungan sa sini nga higayon, mahimo maghunahuna ang mga tawo nga basi himuon man niya ini sa iban nga kahimtangan. Halimbawa, mangin makatarunganon  bala sia sa pagpat-od kon sin-o sa kaanakan ni Adan ang kalipikado nga mabuhi sing dayon? Masaligan gid bala sia nga tumanon niya ang iya mga saad? Ang pagpakita sang Dios sing katarungan sa paghatag sa aton sing kaluwasan nagapasalig sa aton nga himuon niya pirme ang husto.

Paagi sa kamatayon ni Jesus bilang halad, ginbuksan sang Dios ang dalan padulong sa kabuhi nga wala sing katapusan sa Paraiso nga duta. Talupangda ang ginsiling ni Jesus sa Juan 3:16: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.” Gani ang kamatayon ni Jesus nagapakita indi lamang sang wala nagabag-o nga katarungan sang Dios kundi ilabi na sang iya daku nga gugma sa mga tawo.

Pero ngaa kinahanglan mag-antos kag mapatay si Jesus suno sa ginalaragway sa mga Ebanghelyo? Paagi sa pag-antos sing mabudlay nga pagtilaw kag pagpabilin nga matutom, ginpamatud-an ni Jesus nga indi matuod ang pangangkon sang Yawa nga ang mga tawo indi magpabilin nga matutom sa Dios kon yara sa pagtilaw. (Job 2:4, 5) Daw matuod ina nga pangangkon sang nahaylo ni Satanas si Adan nga magpakasala. Apang si Jesus—nga katumbas gid ni Adan—nagpabilin nga matinumanon wala sapayan sang grabe nga pag-antos. (1 Corinto 15:45) Gani ginpamatud-an niya nga sarang man kuntani nangin matinumanon si Adan sa Dios kon gusto niya. Paagi sa pagbatas sang mga pagtilaw, nagbilin si Jesus sang huwaran nga dapat naton sundon. (1 Pedro 2:21) Ginpadyaan sang Dios sing imortal nga kabuhi sa langit ang pagtuman sang iya Anak nga si Jesus.

Matuod gid nga napatay si Jesus. Mahimo na matigayon ang kabuhi nga wala sing katapusan. Gusto mo bala mabuhi sing dayon? Ginpakita ni Jesus ang dapat naton himuon sang nagsiling sia: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.”—Juan 17:3.

Ang manugbalhag sini nga magasin nagaagda sa imo nga magtuon sing dugang pa parte kay Jehova, ang matuod nga Dios, kag parte sa iya Anak nga si Jesucristo. Ang mga Saksi ni Jehova sa inyo lugar malipay sa pagbulig sa imo. Makabaton ka man sing dugang nga impormasyon sa amon website nga www.pr418.com/hil.