Edena bamona do oi haere bema ta ese oi ia nanadaia, “Oi ura oi mauri hanaihanai, a?” Momo be idia gwau, idia ura idia mauri hanaihanai, to idia daradara. Badina idia gwau, mase be taunimanima ibounai dekenai ia vara.

To, dahaka do oi gwau bema oi idia nanadaia, “oi ura do oi mase, a?” Vaia momo edia haere be, lasi. Unai ese dahaka ia hahedinaraia? Ena be hekwakwanai idauidau ita davaria, to iseda ura badana be do ita mauri noho. Baibel ese ia hahedinaraia Dirava ese taunimanima ia karaia idia mauri hanaihanai totona. Oibe, Baibel ia gwau, “ia ese gabeai do ia vara maurina do ita davaria ena ura, be ita dekenai ia henia.”​—Hadibaia Tauna 3:11.

To, taunimanima be idia noho daudau lasi. Dahaka kerere ia vara? Danu, Dirava be gau ta ia karaia unai ia hamaoromaoroa totona, a? Baibel ena haere ese ita ia hagoadaia, bona ita ia hadibaia dahaka dainai Iesu ia hisihisi bona ia mase.

Genese bukana ena karoa ginigunadia toi ese idia hahedinaraia Dirava ese tau bona hahine ginigunadia, Adamu bona Heva, ia hamaorodia dahaka idia karaia idia mauri hanaihanai totona. Danu unai karoa ese idia hahedinaraia edena dala ai idia ese Dirava idia kamonai henia lasi bona mauri hanaihanai ena hahenamo idia haboioa. Momo idia laloa Genese bukana be gori bukana ta sibona. To Evanelia Bukadia hegeregerena, Genese bukana ai idia noho sivaraidia be momokani bona idia be histori ena rekodi namona. *

Adamu ena kamonai lasi karana dainai dahaka ia vara? Baibel ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” (Roma 5:12) Adamu be Dirava ia kamonai henia lasi dainai, ia kara dika. Mauri hanaihanai ena hahenamo ia haboioa bena ia mase. Ita be iena tubudia dainai, ita danu be mai eda kara dika. Unai dainai, ita gorere, buruka bona mase. Unai be saiens taudia ese idia davaria gaudia hegeregerena, idia davaria natudia idia vara neganai edia  toana bona kara haida be edia tama sina bamona. To, Dirava be gau ta ia karaia unai ia hamaoromaoroa totona, a?

Oibe, Dirava be Adamu ese ena tubudia totona ia haboioa gauna, mauri hanaihanai, ia abia o hoia lou totona dala ia karaia. Edena dala ai Dirava ese unai ia karaia?

Roma 6:23 ia gwau: “Kara dika ena davana be mase.” Anina be kara dika taudia be do idia mase. Adamu be ia kara dika dainai ia mase. Unai hegeregerena, ita danu be mai eda kara dika bona do ita mase. Ena be iseda kerere lasi, to ita vara neganai ita be mai eda kara dika. Unai dainai Dirava ese mai lalokau ida ena Natuna, Iesu, ia siaia iseda “kara dika ena davana” ia karaia totona. Edena dala ai unai ia karaia?

Goevadae tauna Adamu ena gwau-edeede karana amo kara dika bona mase ia vara. Unai dainai namona be goevadae tauna ta, ia be Dirava do ia kamonai henia ela bona mase, ese kara dika bona mase amo ita ia ruhaia. Baibel ia gwau: “Tau tamona ena gwau-edeede karana dainai, taunimanima momo be kara dika taudia ai idia lao. Unai hegeregerena, tau tamona ena kamonai karana dainai, taunimanima momo be kara maoromaoro taudia ai do idia lao.” (Roma 5:19) Baibel ese ia herevalaia “tau tamona” be Iesu. Guba ia rakatania, goevadae tauna ai ia lao, * bona ita totona ia mase. Unai amo Dirava vairanai ita goeva bona mauri hanaihanai ita abia diba.

To, dahaka dainai kara dika bona mase kokia totona Iesu ia mase? Siahu Ibounai Diravana be dala ma ta amo Adamu ena tubudia dekenai maoro ia henia idia mauri hanaihanai totona, a? Oibe, ia be mai ena siahu unai ia karaia totona. To unai ese iena taravatu, kara dika ena davana be mase, do ia hakoikoia. Ita gwau diba lasi unai taravatu be anina lasi, o ita haidaua kava diba lasi. Unai taravatu ese hahemaoro goeva karana ia hahedinaraia.​—Salamo 37:28.

Bema Dirava be hahemaoro goevana ia karaia lasi, reana taunimanima do idia laloa gau ma haida dekenai Dirava be unai bamona do ia karaia danu.  Hegeregere, oi laloa Dirava ese Adamu ena natudia amo haida sibona ia makaia mauri hanaihanai idia abia totona be namo, a? Do oi abia dae Ia ese ena gwauhamata iboudiai do ia hagugurua, a? Dirava ese ita ia hamauria dalana dekenai kota maoromaoro ia karaia ese ia hahedinaraia ia be nega ibounai kara maoromaoro do ia karaia.

Iesu ena mase karana amo Dirava ese dala ia kehoa tanobada Paradaiso ai, mauri hanaihanai ita abia totona. Mani Iesu ena hereva Ioane 3:16 ai oi laloa, ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” Iesu ena mase ese Dirava ena hahemaoro goeva karana ia hahedinaraia sibona lasi, to ia hahedinaraia ia ese taunimanima ia lalokau henia.

To, dahaka dainai Iesu be Evanelia bukadia ese idia herevalaia hegeregerena ia hisihisi bona mase? Iesu be mai abidadama ida hahetoho ia haheaukalaidia dainai, ia ese Diabolo ena hereva, hahetoho negadiai taunimanima be Dirava do idia badinaia lasi herevana, ia hakoikoia. (Iobu 2:4, 5) Reana Satani ese goevadae tauna, Adamu, ia tohoa bena ia kara dika neganai, unai hereva ia momokani. To Iesu​—Adamu hegeregerena​—be hisihisi ia haheaukalaia bona Dirava ia badinaia. (1 Korinto 15:45) Iesu ese ia hahedinaraia Adamu danu be abia hidi ia karaia diba Dirava ia badinaia totona. Hahetoho ita haheaukalaidia totona, Iesu ena haheitalai ita tohotohoa be namo. (1 Petero 2:21) Dirava ese iena Natuna ena kamonai karana dainai ia hanamoa bona guba dekenai mase diba lasi maurina ia henia.

Iesu ena mase be ia vara momokani. Mauri hanaihanai abia dalana ia kehoa. Oi ura do oi mauri hanaihanai, a? Iesu ia gwau: “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.”​—Ioane 17:3.

Inai magasin idia karaia taudia ese oi idia boiria Iehova, Dirava momokanina, bona iena Natuna, Iesu Keriso oi dibaia totona. Emu gabu ai idia noho Iehova ena Witnes taudia be mai moale ida oi idia durua diba. Diba ma haida oi abia totona emai Web sait www.pr418.com oi lao diba.