Anni tabbagmu nu egga makkiavu nikaw tu, “Kayàmu kari i mattolay tu mannanayun?” Aru i makkagi nga kayàda, ngem para nira, gittana imposible nga mesimmu yatun. Kagiadda nga normal laman nga parte na pattoletam i patay​—i gagangay nga pappangetattam.

Kunnasi nu kunnaw i pakkiavu, “Kayàmu kari ngana i matay?” Ari, i siguradu nga tabbag na mas aru nga totolay. Anni i punto? Normal laman nga kayà tam i mattolay maski nu mepa-arubattam ta aru nga problema. Ipasingan na Biblia nga pinaratu na Dios i totolay nga egga pakkaragana nga mattolay. Kakuruganna, kagian na Biblia nga “nipena i mannanayun nga tiempo ta futuda.”​—Eclesiastes 3:11.

Ngem i realidad ay matay i totolay. Anni kari i nesimmu? Egga kari solusion na Dios tatun nga nesimmu? Makatukkal tu futu i tabbag ira na Biblia anna egga koneksionna nu ngatta nazziga-riga anna natay si Jesus.

Mabibbig ta kapitulo 1 adde ta 3 na libru nga Genesis i iddanama da Adan anni Eva nga mattolay tu mannanayun anna nu kunnasida nga malawa yatun. Nekagi paga tatun i ariadda pattuppal ta Dios yari tu nawawadda yatun nga iddanama. Simple laman i nikevuru-vurana​—yari tu aru i makkakkagi nga appappe laman yatun. Ngem kagitta na Evanghelio ira, mabibbig ta libru na Genesis i kuru-kurug nga nesimmu ta nappasa. *

Anni i resulta na ari pattuppal ni Adan? Kunnaw i tabbag na Biblia: “Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay megafu ta nattagaruli ngamin i totolay.” (Roma 5:12) Nakaliwa si Adan megafu ta arianna pattuppal ta Dios. Yari tu natay yaya anna nawawanna i iddanama nga mattolay tu mannanayun. Megafu ta gaka ittam ni Adan, narensia tam sa i kina-imperfekto. Narresulta yatun tu taki, pallakay, anna patay. Mekunnay yaw nga pakanawag ta nadiskubre na sientista ira meyannung ta nu kunnasi malà na ána i itsura anna i kata-katolay na maganada. Ngem egga kari solusion na Dios tatun nga nesimmu?

Nagangngua i Dios tu unnug tapenu matubus, onu metoli nittam i nawawan ni Adan para ta gaka-gakana​—i iddanama nga mattolay tu mannanayun. Kunnasi nga kingngua na Dios yatun?

“Ta i balo na pattagaruli ay patay,” kagian na Biblia ta Roma 6:23. Kaya na kagian nga i resulta na liwa ay patay. Nakaliwa si Adan yari tu natay yaya. Nakaliwa tam gapa ngamin, yari tu matay tam. Maski nu manaki tam, neyana tam nga imperfekto. Megafu ta aya na Dios, zinogna i anana, si Jesus, tapenu yaya i mangalawa ta “balo na pattagaruli” tam. Kunnasi yatun?

Megafu ta perfekto nga tolay si Adan, i nangirattal nittam tu liwa anna patay gukaban na arianna pattuppal, mawag i tadday nga perfekto nga tolay, nga mattuppal maski adde ta patay, tapenu mapalubbangattam tatun nga liwa. Kunnaw i pangipakanawag na Biblia: “Nu kunnasi i karu na nesipo nga nattagaruli megafu ta ari nga nipakimoray na tadday nga tolay, kunnatun gapa i karu na mapakatunung nga totolay megafu ta pakimoray na tadday gapa nga tolay.” (Roma 5:19) Yatun nga “tadday nga tolay” ay si Jesus. Pinanawanna i langi, nabbalin tu perfekto nga tolay *, tapus natay para nittam. Anni i resultana? Posible nga mapeggattam tu matunung nga taddag ta arubang na Dios anna malawa i iddanama nga mattolay tu mannanayun.

Ngatta mawag nga matay si Jesus tapenu metuppal yaw? Arianna kari awayya nga nipamavulun ngana laman na Makapangngua-ta-ngamin nga Dios nga mattolay tu mannanayun i gaka-gaka ni Adan? Egga i autoridadna nga kuan yatun. Ngem mekontra yatun ta dobna nga i balo na pattagaruli ay patay. Importante yatun nga dob yari tu ari nga babbasta mefuera onu matalianan nu kaya tam. Kawagan yatun ta kurug nga hustisia.​—Salmo 37:28.

Nu ari nga sinuttul ni Jehova i hustisia taw nga situasion, baka nonopan na totolay nga kunnatun gapa i kuanna ta tanakuan nga situasion. Angngariganna, awan kari tu pangirerumana nu mappili yaya nu sinni ta gaka-gaka ni Adan i kualipikadu ta  mannanayun nga inango? Matuppalna pano i promesana ira? I panuttul na Dios ta hustisia tapenu mepaliag ittam i mamasiguradu nittam nga kanayun nga kuanna i fustu.

Gukaban na patay ni Jesus, nivuka na Dios i dalan nga mappange ta mannanayun nga inango ta Paraiso nga davvun. Kinagi ni Jesus ta Juan 3:16: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari mattolay ira adde ta ngangangay.” Ari laman nga megafu ta hustisia na Dios i patay ni Jesus, nu ari, megafu gapa ta dakal nga ayana ta totolay.

Ngem ngatta mawag tu grabe i ziga anna mataka-taki i patay ni Jesus kagitta na mabibbig ta Evanghelio? Gukaban na pagattam ni Jesus ta grabe nga kapurueba anna pattalupaddianna nga matalo, interamente nga napakurugna nga laddug i akusasion na Diablo, nga ari mattalupaddian nga matalo ta Dios i totolay nu mapurueban ira. (Job 2:4, 5) Gittana kurug yatun nga akusasion turi ta natenta ni Satanas i perfekto nga si Adan. Ngem nattalupaddian nga matalo si Jesus​—i eksakto nga katumbas ni Adan​—maski nu nazziga-riga. (1 Corinto 15:45) Napakurugna gafu nga awayya nakuan nga kingngua gapa yatun ni Adan nu pinilina i nattuppal ta Dios. Gukaban na pagattam ni Jesus ta paniga-riga, nangibattang yaya nittam tu apparigan nga tuttulattam. (1 Pedro 2:21) Megafu ta perfekto nga pattuppal ni Jesus, iniddan yaya na Dios tu imortal nga inango ta langi.

Kurug nga nesimmu i patay ni Jesus. Navukatan ngana i dalan ta mannanayun nga inango. Kayamu kari i mattolay tu mannanayun? Kinagi ni Jesus i mawag nga kuattam: “Ay yaw i inango nga adde ta ngangangay: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.”​—Juan 17:3.

Imbitaddaka na nangipublisa ira taw nga magazina nga gigiammuan paga i meyannung kani Jehova, i kurug nga Dios, anna i meyannung ta Anana nga si Jesu-Cristo. Magayaya i Saksi ira ni Jehova ta lugarnu nga manguffun nikaw. Makaleg ka gapa tu makoffun nga informasion ta website-mi nga www.pr418.com/ibg.