Ũkakũlw’a kana no wende kwĩkala tene na tene ũsũngĩa ata? Andũ aingĩ no masye kana no mende, ĩndĩ monaa ũndũ ũsu ũtatonyeka. Maasya kana kĩkw’ũ nĩ lasima na kana mũndũ asyawa no nginya akw’e.

Nao nata ũkakũlw’a kana no wende kũkw’a, we ũsũngĩa ata? Andũ aingĩ no masye kana maikwenda kũkw’a. Ũndũ ũsu wĩtũmanyĩsya kyaũ? Kĩla mũndũ nĩwĩthĩawa na wendi wa kwĩkala thayũ o na akwatwa nĩ mathĩna maingĩvĩte ata. Mbivilia nĩyonanasya kana Ngai oombie andũ me na wendi wa kwĩkala thayũ tene na tene.

Ũw’o nĩ kana andũ mayĩkalaa tene na tene. Thĩna wambĩĩie va? No twĩkũlye-ĩ, Ngai ekĩte ata nĩ kana andũ meĩkala tene na tene? Mbivilia nĩtũnengete mosũngĩo ma kũtwĩkĩa vinya, na mosũngĩo asu nĩmekũtũtetheesya kũmanya nĩkĩ Yesũ wathĩniw’e na akw’a.

Ilungu sya mbee itatũ sya ĩvuku ya Mbivilia ya Mwambĩlĩlyo nitũeleetye kana Ngai amombie asyai maitũ ma mbee, Atamu na Eva, me na wĩkwatyo wa kwĩthĩwa na thayũ ũtathela, na amatavya ũndũ matonya kwĩka nĩ kana maũkwate. O na ilungu isu nĩsyonanĩtye ũndũ maleile kũmwĩw’a Ngai na maasya wĩkwatyo ũsu wa kwĩkala tene na tene. Ngewa ĩsu yĩeleetw’e kwa nzĩa yĩ laisi vyũ ũkethĩa andũ amwe no masye nĩ wano. O ta mavuku ma Ũvoo Mũseo, ĩvuku ya Mwambĩlĩĩlyo yĩeleetye maũndũ ma w’o meekĩkie. *

Nĩ kyaũ kyeethĩiwe nũndũ wa Atamu kwĩthĩwa ate mwĩwi? Mbivilia ĩsũngĩĩte atĩĩ: “Nũndũ wa mũndũ ũmwe [Atamu] naĩ yalikile kũũ nthĩ, na kĩkw’ũ kwondũ wa naĩ; na kwa ũu kĩkw’ũ kyavikĩa andũ onthe, nĩkwĩthĩwa onthe nĩmeekie naĩ.” (Alomi 5:12) Nũndũ wa kũlea kũmwĩw’a Ngai, Atamu nĩweekie naĩ. Na nũndũ wa ũu, nĩwaaisye wĩkwatyo wa kwĩthĩwa na thayũ ũtathela, na ĩtina esa kũkw’a. Nũndũ ithyĩ twĩ ũsyao wake, nĩwatũtiĩe naĩ. Na kĩu nĩkyo kĩtumi tũwaa, tũkakũa, na ĩtina tũkakw’a. Ũndũ ũsu nĩwosanĩte na ũkunĩkĩli ũla andũ ma saenzi mekĩte ũkwonany’a kana syana nĩsyĩthĩawa na mĩtuo ya mũsyawa  kuma kwa asyai masyo. Ĩndĩ ve ũndũ Ngai weekie nĩ kana atũtangĩĩe kuma thĩnanĩ ũsu?

Ngai nĩweekie mũvango nĩ kana enenga andũ thayũ ũtathela, ũla Atamu waaisye. Eekie mũvango wĩva?

Mbivilia yaĩtye ũũ ĩandĩkonĩ ya Alomi 6:23: “Ĩtuvi ya naĩ nĩ kĩkw’ũ.” Ũu wĩonany’a kana kĩkw’ũ kĩetawe nĩ naĩ. Atamu nĩweekie naĩ, na nĩkyo kĩtumi wakwie. O ta ũu, o naitũ nĩtwĩkaa naĩ, na nĩkyo kĩtumi tũkwataa ĩtuvi ya naĩ, nayo nĩ kĩkw’ũ. Ĩndĩ o na kau ti ithyĩ twavĩtisye, tũsyaawa twĩ na naĩ. Nũndũ Ngai e wendo, nĩwatũmie Mwana wake, Yesũ, nĩ kana akwate “ĩtuvi ya naĩ” kwondũ witũ. Ũndũ ũsu watonyekie ata?

Nũndũ nĩ mũndũ ũmwe ũtaĩ na naĩ ũla watũeteie naĩ na kĩkw’ũ kwĩsĩla kũlea kwĩw’a, nĩvendekaa mũndũ ũngĩ ũte na naĩ ethĩwe e mwĩwi nginya kĩkw’ũ nĩ kana atũthasye kuma ũkombonĩ wa kĩkw’ũ. Mbivilia yĩeleetye ũndũ ũsu kwa kwasya atĩĩ: “Nũndũ wa kũlea kwĩw’a kwa mũndũ ũmwe aingĩ matwiwe athe, o ta ũu kwondũ wa kwĩw’a kwa ũmwe, aingĩ makatuwa alũngalu.” (Alomi 5:19) Yesũ nĩwe mũndũ ũsu “ũmwe” ũla ũkatuma andũ matuwa alũngalu. Yesũ aumie ĩtunĩ, asyawa ate na naĩ *, na ĩtina esa kũkw’a kwondũ witũ. Na ũu nũtumaa twĩthĩwa na ngwatanĩo nzeo na Ngai na wĩkwatyo wa kwĩsa kũkwata thayũ ũtathela.

Nĩkĩ yaĩ no nginya Yesũ akw’e nĩ kana eanĩsye ũndũ ũsu? O na no twĩkũlye-ĩ, We Ngai Mwene Vinya W’onthe ndaĩ atonya kumya mwĩao nĩ kana ũsyao wa Atamu ũkekala tene na tene? Kwa w’o, Ngai aĩ na ũkũmũ wa kwĩka ũu. Ĩndĩ keka nĩweekie ũu ethĩwa avũthĩĩisye mwĩao wake ũla waĩtye kana ĩtuvi ya naĩ nĩ kĩkw’ũ. Ũsu ndwaĩ mwĩao ũtonya kũvĩndũawa o kĩla ĩvinda ĩla maũndũ mathũka. Ĩndĩ mwĩao ũsu nĩ wa vata mũno nthĩnĩ wa ũsili wa katĩ.—Savuli 37:28.

Takethĩwa Ngai nĩwavũthĩĩisye mwĩao ũsu ũndũnĩ ũũ, andũ no methĩwe mambĩĩie kũsũanĩa ta ũtonya kwĩka ũu maũndũnĩ angĩ. Kwa ngelekany’o, no methĩwe mambĩĩie kwĩkũlya kana Ngai akanyuva  nesa ala maĩle kũkwata thayũ ũtathela. O na ĩngĩ, no mambĩĩe kwĩthĩwa na nzika kana akeanĩsya mawatho make. Ĩndĩ nũndũ Ngai nĩwaatĩĩie ũsili wa katĩ ũndũnĩ ũsu ũkonetye ũtangĩĩo witũ, nĩtwĩthĩawa na mũĩkĩĩo kana mavinda onthe akeekaa ũla waĩle.

Kwĩsĩla kĩkw’ũ kya Yesũ, Ngai nĩwavingũĩe andũ nzĩa ya kũkwata thayũ ũtathela nthĩnĩ wa Nthĩ Nzaũ. Kwasisya ndeto ii sya Yesũ ila syĩ ĩandĩkonĩ ya Yoana 3:16: “Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.” Kwoou, kĩkw’ũ kya Yesũ nĩkyoonanisye kana Ngai nũsilaa katĩ, na ũndũ ũla mũnene vyũ, nĩkyoonanisye kana nĩwendete andũ mũno vyũ.

Ĩndĩ ĩkũlyo nĩ, Nĩkĩ yaĩ no nginya Yesũ athĩnw’e na aikw’a kĩkw’ũ kĩ woo o tondũ vaeleetw’e mavukunĩ ma Ũvoo Mũseo? Nĩ kenda aĩkĩĩthye kana Ndevili nĩwakenganie ĩla waisye kana andũ mayĩsa kwĩthĩwa me aĩkĩĩku ĩla makwatwa nĩ motato. Oonanisye ũu kwĩsĩla wĩnyivyo wake na kwĩthĩwa e mũĩkĩĩku nginya kĩkw’ũ. (Yovu 2:4, 5) Satani nũtonya kwoneka ta waneenaa ũw’o ĩla wamũtatie Atamu eke naĩ. Ĩndĩ Yesũ, ũla ũtaĩ na naĩ o ta Atamu, nĩweethĩiwe e mwĩwi o na ĩla wakwatiwe nĩ motato momũ. (1 Akolintho 15:45) Kwa kwĩka ũu, Yesũ nĩwoonanisye kana o nake Atamu aĩ atonya kwĩthĩwa e mwĩwi keka nĩwendaa. Kwa kũmĩĩsya, Yesũ nĩwatũtiĩe ngelekany’o ya kũatĩĩa. (1 Vetelo 2:21) Nũndũ Yesũ nĩweethĩiwe e mwĩwi vyũ, ĩla waendie ĩtunĩ, Ngai nĩwamũnengie mũthĩnzĩo wa thayũ ũtatonya kũkw’a.

Kwa w’o ki, Yesũ nĩwakwie. Nayu ve nzĩa ya kũkwata thayũ ũtathela. We no wende kwĩkala tene na tene? Yesũ nĩwoonanisye ũndũ twaĩle kwĩka ĩla waisye atĩĩ: “Na thayũ ũtathela nĩw’o ũũ, nĩ kana makũmanye we Ngai ũla wa w’o weka, na ũla wamũtũmie, nake nĩ Yesũ Klĩsto.”—Yoana 17:3.

Aumĩthya ma ĩkaseti yĩĩ nĩmeũkũthokya wĩmanyĩsye ĩũlũ wa Yeova, Ngai ũla wa w’o, na ĩũlũ wa Mwana wake, Yesũ Klĩsto. Ngũsĩ sya Yeova ila syĩ kĩsionĩ kyenyu nĩmeũkũtetheesya kwĩka ũu. O na no ũkwate ũvoo ũngĩ ũtonya kũũtetheesya kwa kũvingũa Kĩsese kya www.pr418.com/kam.