“Naassaanngitsumik inoorusuppit?” Taama aperineqartuuguit qanoq akissavit? Inuit amerlanerit angissagunarput, oqassappulli taamatut eqqarsarneq piviusorsiornerunngitsoq. Oqartarput toqu inuunerup ilagiinnaraa, kikkut tamarmik atugassarigaat.

Imali aperineqaruit qanoq akissavit: “Toqunissat piareersimaffigiviuk?” Amerlanerit naaggaassagunarput. Tamanna sumik ersersitsiva? Erloqisaraluarluta inoorusunnerput nalinginnaavoq. Biibilimi allassimavoq Guutip ‘naassaanngissuseq inuit uummataanniitikkaa’, tassa inoorusussuseqartillugit pinngortikkai. – Oqaluussisartup oqaasii 3:11, quppernerup ataatungaani ilanngussaq.

Inuilli naassaanngitsumik inuuneq ajorput. Pissutsit qanga ajorsigamik? Aamma pissutsit aaqqinniarlugit Guuti iliuuseqarpa? Akissut Biibilimeersoq tuppallernartoq Jiisusip naalliunneranut toquneranullu pissutaasumut attuumassuteqarluinnarpoq.

Mosesimik allakkani siullerni kapitalini 1-miit 3-mut allassimavoq Guutip inuit aappariit siulliit, Adami Evalu, naassaanngitsumik inuujumagunik qanoq iliortariaqarnerannik oqaluttuukkai. Nangillunilu allassimavoq Guutimut naalannginnermikkut periarfissartik annaagaat. Oqaluttuap paasiuminartumik allagaanera pissutigalugu inuit ilaasa oqaluttualiaannaanerartarpaat. Mosesimilli allakkat siulliit iivangkiiliut assigalugit oqaluttuarisaanermut naapertuullutillu eqqoqqissaarput. *

Adamip naalannginnera qanoq kinguneqarpa? Tamanna Biibilimi ima akineqarpoq: “Soorlu inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” (Romamiut 5:12) Adami Guutimut naalanngilluni ajortuliornermigut naassaanngitsumik inuusinnaajunnaarpoq naggataatigullu toqulluni. Siuaarigatsigu ajortiliuneq kingornupparput. Taamaattumik napparsimasarlutalu utoqqalisarlutalu toqusarpugut. Tamanna meeqqat angajoqqaaminnit timip pinngoqqaataanik kingornussisarnerat pillugu ilisimatuut paasisaannut  naapertuuppoq. Pissutsilli aaqqinniarlugit Guuti iliuuseqarpa?

Aap, Guuti pissutsit aaqqinniarlugit – imaluunniit Adamip kinguaaminut ingerlateqqissinnaanngisaa, tassa naassaanngitsumik inuuneqalersinnaaneq, utertinniarlugu – iliuuseqarpoq. Qanoq?

Romamiunut allakkani 6:23-mi allassimavoq ‘ajortip akissarsiarititaa tassaasoq toqu’. Adami ajortuliorami toquvoq. Taamatuttaaq uagut ajortiliugatta toqusarpugut. Guutilli asanninnermigut ajortimit nammineq pisuussutiginngisatsinnit aniguisikkumalluta ernini Jiisusi aallartippaa.

Taamaaliorpoq angutip ataatsip, Adamip naammalluinnartuusup, naalannginnermigut ajorti toqulu atuutilersitai angutip ataatsip naammalluinnartup toqumut allaat naalannermigut atuukkunnaarsissinnaammagit. Tamanna Biibilimi ima nassuiarneqarpoq: “Soorlumi inuup ataatsip naalanngitsuliorneratigut inuit amerlasuut ajortilinngortut, taamatut inuup ataasiinnarluinnaap naalanneratigut inuit amerlasuut iluartunngorumaarput.” (Romamiut 5:19) Matumani ‘inuk naalattoq’ tassaavoq Jiisusi. Taanna qilammit aqqarpoq inunngorlunilu naammalluinnartoq * uagut pilluta toqusoq. Tamanna pissutigalugu Guutimit naapertuilluartutut isigineqarsinnaanngorlutalu naassaanngitsumik inuunissamut periarfissaqalerpugut.

Tamannali pisinnaassappat sooq Jiisusi toqusariaqarpa? Adamip kinguaavi naassaanngitsumik inuusinnaanerat Guutip Ajugaqanngitsup nalunaarutigiinnarsinnaannginnamiuk? Taamaaliornissamut soorunami oqartussaassuseqarpoq. Tamannali toqup ajortimut akissarsiarititaaneranut tunngatillugu inatsisaanut naapertuutissanngilaq. Inatsit taanna naapertuilluarnermut tunngaviusoq nammineq iluarisat naapertorlugit allanngortinneqarsinnaanngilaq. – Tussiaat 37:28.

Guuti matumani naapertuilluartumik iliorsimanngitsuuppat allanut tunngatillugu naapertuilluassanersoq inuit immaqa apeqqusissagaluarpaat. Assersuutigalugu  Adamip kinguaavisa ilaat kikkut naassaanngitsumik inuuneqalersinnaasut aalajangeruniuk naapertuilluassava? Neriorsuutiminik eqqortitsisartutut tatigineqarsinnaassava? Naapertuilluarneq tunngavigalugu aniguisinneqarnerput Guutip eqqortumik iliortuaannarneranut uppernarsaataavoq.

Jiisusip pilliutitut toquneratigut Guutip inuit nunarsuarmi paratiisiusumi naassaanngitsumik inuuneqalernissamik periarfissippai. Jiisusip oqaasii uku maluginiakkit: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” (Johannesi 3:16) Taamaattumik Jiisusip toqunera Guutip naapertuilluartumik iliuuseqartuaannarneranut ersiutaaginnarani inunnik asanningaarneranut ersiutaavoq.

Iivangkiiliunili allaatigineqartutut sooq Jiisusi naalliungaarluni toqusariaqarpa? Jiisusip misilinneqangaarnermini aalajaannermigut Diaavulup inuit misilinneqarnerminni Guutimut ilumoorfiginnissinnaannginnerat pillugu oqaasiisa ilumuunnginnerat uppernarsarpaa. (Jobi 2:4, 5) Saatanip Adamimik ajortuliortitsinerata kingorna taamatut oqarneq tunngavissaqarpasippoq. Jiisusili – Adamitut naammalluinnartoq – naalliungaaraluarluni naalattuarpoq. (1 Korinthimiut 15:45) Taamaalilluni Adamip Guutimut naalassimasinnaagaluarnera uppernarsarpaa. Jiisusip misilinneqarnermini pinertusaarnermigut maligassippaatigut. (1 Petrusi 2:21) Jiisusip naalalluinnarnera pillugu qilammi toqusuitsunngortinneratigut Guutip ernini akissarsisippaa.

Jiisusip toqunera oqaluttualiaannaanngilaq. Naassaanngitsumik inuuneqalersinnaavugut. Illit naassaanngitsumik inoorusuppit? Jiisusip qanoq iliortariaqarnerput oqaatigimisaarpaa ima oqarami: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” – Johannesi 17:3.

Atuagassiamik matuminnga saqqummersitsisut Jehova, Guuti ilumoortoq, erneralu Jiisusi Kristusi pillugit ilikkagaqarneroqqullutit kajumissaarpaatsit. Jehovap Nalunaajaasuisa ikiorusungaarpaatsit. Aamma nittartakkatsinni, www.pr418.com/kl-imi, iluaqutigisinnaasannik paasissutissaqarpoq.