Ihi i ueji tambuijila se a kuibhula, “Ua mesena kukala ni muenhu ua kalelaku?” Avulu eji xikina, maji eji zuela ué kuila ki kuene muenhu ua kalelaku. Ene amba kuila, athu oso ala ku muenhu kizuua a-nda fua mukonda kiene kia tu bhange.

Maji xinganeka kuila a kuibhuidisa kiki, “Ua mesena kufuá?” O muthu uala ni kilunji ueji tambuijila kana. Kiki kilondekesa ihi? Sumbala ni ibhidi i tuene mu bhita na-iu né kiki tua mesena kukala ku muenhu. O Bibidia i longa kuila Nzambi ua bhange o athu phala kukala ku muenhu. O Bibidia i longa ué kuila, Nzambi ua te ku mixima ia athu o vondadi ia kukala ni muenhu ua kalelaku.​—Ndongixi 3:11.

Maji mu kidi o athu kala ni muenhu ua kalelaku. Mukonda diahi-phe tuene mu fua? O kuila Nzambi ua bhange kima phala kubatula o maka iá? O itambuijilu ia Bibidia i suínisa, i londekesa ué se mukonda diahi Jezú ua tale hadi iu uafu.

O ibatulu itatu ia dianga ia divulu dia Dimatekenu ilondekesa kuila, Nzambi ua bhange o dikaza dia dianga, Adá ni Eva ni vondadi ia kukala ni muenhu ua kalelaku, ua a tangela ihi ia tokalele kubhanga phala ku u tambula. O musoso u londekesa kiebhi kia kambe kubelesela Nzambi ni kutexi o ujitu ua kutambula o muenhu ua kalelaku. O musoso ki u bhonzo ku u tendela, mukonda dia kiki, saí athu a banza kuila ki musoso ua kidi, sabhu ngó. Maji o milongi iala mu divulu dia Dimatekenu ia kidi muene kála o milongi i tu sanga mu Madivulu a Matesu, Marku, Luka ni Nzuá. *

Ihi iene mu bhita mukonda dia Adá kukamba kubelesela o kitumu kia Nzambi? O Bibidia i tambuijila: “Mukuâ ni kia bokona o ituxi mu ngongo ku muthu umoxi, [Adá] o kufua kù kuejila mu ituxi; kiene ue kia bhiti o kufua ku thandu dia athu oso, kuma ene oso ituxi a i te.” (Loma 5:12) Mukonda dia kuxibhaka Nzambi, Adá ua te kituxi. Mukonda dia kiki, muéne ua texi o ujitu ua kukala ni muenhu ua kalela-ku, muéne uafu. Kuma tu an’â Adá, tua lundula o kituxi kiê. Mukonda dia kiki, tu kata, tu kuka, tu fua. Kiki kia difuangana ni uhaxi u kuata o tuana  mukonda a u lundula ku jitata. Maji o kuila Nzambi ua bhange kima phala ku tu bhulula ku kituxi ni kufua?

Kidi, Nzambi ua bhange kima phala kukula o an’â Adá n’a kale ni kidielelu kia kutambula o muenhu ua kalela-ku. Ihi-phe ia bhange Nzambi?

O Bibidia mu divulu dia Loma 6:23, i zuela: “O futu ia ituxi kufua.” Kiki kilombolola kuila o kufua kuijila mu ituxi. Adá ua te kituxi, mu kiki uafu. Etu ué tu akua ituxi, mukonda dia kiki tu fua. Maji a tu vuala kiá mu ituxi, ki tuala ni kikuma. Kienhiki Nzambi mu henda iê, ua tumu Mon’ê Jezú, phala ‘kufuila ku ituxi’ ietu. Kiki ki bhita kiebhi?

Mukonda dia Adá kuxibhaka, o kituxi ni kufua kua bokona mu ngongo. Mu kiki, phala ku tu bhulula ku kituxi ni kufua, kueji bhinga ué muthu umoxi ua iuka u belesela katé ku ufuilu uê. O Bibidia i jimbulula kiki: “Mu kuxibhaka kua muthu umoxi, mundu a di bhangele akua ituxi, kiene kimoxi ue, mu kutumaka kua muthu umoxi, mundu a di bhanga akua kulunga, mbata ene oso a a xikina kua Nzambi.” (Loma 5:19) Jezú muéne o “muthu umoxi” a mu tange bhabha. Muéne ua xisa o diulu, ua kituka muthu mu xitu ua kambe ituxi * iu ua tu fuila bhu kididi. Mukonda dia kiki, tu tena kukala ni ukamba uambote ni Nzambi ni kukala ni kidielelu kia kutambula o muenhu ua kalela-ku.

Maji mukonda diahi Jezú ua tokalele kufua? Mukonda diahi o Nzambi Muteni-a-Ioso kambe kia ngó kuila ana oso a Adá a kale ni muenhu ua kalela-ku? Muéne ua kexile ni ungana ua kubhanga kiki. Maji se ua ki bhangele o kitumu kiê kia kuila o futu ia kituxi o kufua, ki kieji kala ni valolo. O kitumu kiki ka tokala ku ki lungulula mu ki ngoho kala ki bhita ni itumu ia athu. Kiki kia tokala kubhita muene mukonda Nzambi mukua kidi.​—Jisálamu 37:28.

Se mu maka enhá Nzambi ua kambele kukumbidila o kizuelu kiê, o athu eji banza kuila, mu maka a mukua eji moneka muéne keji kumbidila ué. Mu kifika, o kuila muéne ueji tena kusola kiambote nanhi  bhu kaxi ka an’â Adá ua tokala kutambula o muenhu ua kalela-ku? O kuila o athu eji kala ni kixikanu kuila Nzambi ua-nda kumbidila o ikanenu iê ioso? Mu kukumbidila o kizuelu kiê mu ku tu bhulula, Nzambi ua tu dielelesa kuila muéne ua-nda kumbidila jinga o izuelu iê.

Mukonda dia kufua kua Jezú, Nzambi ua jikula o njila phala o athu kukala ni muenhu ua kalela-ku mu Palaízu mu ixi. Jezú mu divulu dia Nzuá 3:16, muéne uambe: “Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.” Kienhiki, o kufua kua Jezú ki kulondekesa ngó kuila Nzambi mukua kidi kana, maji kulondekesa ué o henda iê ia dikota ku athu.

Maji mukonda diahi Jezú ua tale hadi iavulu katé kiafu, kala kilondekesa o Divulu dia Matesu, Marku, Luka ni Nzuá? Mu kukolokota sumbala ni hadi, Jezú ua londekesa kuila o ia zuelele Diabhu kuila o athu ka-nda tena kukala jifiiele kua Nzambi se a bhita mu ibhidi, makutu. (Jobe 2:4, 5) O makutu iá eji kala kidi mukonda Satanaji ua tenene kubhangesa Adá kuta kituxi. Maji Jezú ua iukile kála kiexile Adá ande dia kuta kituxi, muéne ua kolokota fiiele kua Nzambi sumbala ni hadi iavulu. (1 Kolindo 15:45) Kienhiki, muéne ua londekesa kuila Adá se ua mesenene ueji tena kukala ué fiiele kua Nzambi. Mu kukolokota kuê, Jezú ua tu xila phangu phala ku i kaiela. (1 Phetele 2:21) Nzambi ua besoala o kubelesela kua Jezú, Mon’ê ua iuka, mu ku mu bhana muenhu sé kufua ku diulu.

Sé phata, Jezú uafu muene. Mu kiki, o njila ia muenhu ua kalela-ku, ia jikuka. Ua mesena kukala ni muenhu ua kalela-ku? Jezú ua londekesa ihi i tua tokala o kubhanga, muéne uambe: “O muenhu ki uábhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jezú Kristu, ió ua mu tumu eie.”​—Nzuá 17:3.

Mu kiki, di longe ia lungu ni Jihova, o Nzambi ia kidi ni Mon’ê, Jezú Kristu. O Jimbangi ja Jihova mu diembu diê a-nda sanguluka kiavulu mu ku ku kuatekesa kuijiia Nzambi. U tena ué kusanga milongi iambote mu kijimbuete kietu, www.pr418.com.